ເກີດເຫດໄຟໄໝ້ເຮືອນປະຊາຊົນ ຢູ່ເຂດບ້ານວຽງຈະເລີນ

      ເຈົ້າໜ້າທີ່ຕຳຫຼວດສະກັດກັ້ນ ແລະ ມອດໄຟນະຄອນຫຼວງວຽງຈັນ ໄດ້ລະດົມກຳ ລັງເຈົ້າໜ້າທີ່ລວມ ທັງລົດດັບເພີງ 3 ຄັນ ເຂົ້າມອດໄຟໄໝ້ເຮືອນປະຊາຊົນຢູ່ເຂດບ້ານ ວຽງຈະເລີນ ເມືອງໄຊເສດຖານະຄອນຫຼວງວຽງຈັນ ໂດຍທາງເຈົ້າໜ້າທີ່ໄດ້ໃຊ້ເວລາປະ ມານ 1 ຊົ່ວໂມງກວ່າຈຶ່ງສາມາດສະກັດກັ້ນກະແສໄຟໄວ້ ໄດ້.

         ເຈົ້າໜ້າທີ່ຕຳຫຼວດສະກັດກັ້ນ ແລະ ມອດໄຟ ໃຫ້ຮູ້ວ່າ: ເຫດການດັ່ງກ່າວ ເກີດ ຂຶ້ນເວລາປະມານ 8 ໂມງ ຂອງວັນທີ 13 ມີນາ ນີ້ ຊຶ່ງເຮືອນທີ່ເກີດໄຟໄໝ້ແມ່ນ ເເຮືອນ ຂອງນາງ ລື້ນ ອິນ ທະພອນ ເດດ ອາຍຸ 68 ປີ ຢູ່ບ້ານວຽງຈະເລີນ ເມືອງໄຊເສດຖາ ນະຄອນຫຼວງວຽງຈັນ ເປັນເຮືອນສອງ ຊັ້ນ,ຊັ້ນລຸ່ມ ກໍ່ຊັ້ນເທີງໄມ້. ເຈົ້າຂອງເຮືອນໄດ້ໃຫ້ການຕໍ່ເຈົ້າໜ້າທີ່ວ່າ: ກ່ອນເກີດເຫດໄດ້ຍິນສຽງແຕກດັງຢູ່ກອງ ເຕີໄຟ ຟ້າໃຫຍ່ລວມຂອງບ້ານກ່ອນຈະເກີດໄຟລຸກໄໝ້ ແລະ ບວກໃສ່ສະພາບເຮືອນທີ່ເປັນເຮືອນໄມ້ ແລະ ເກົ່າແກ່ຈຶ່ງເຮັດ ໃຫ້ໄຟໄດ້ລຸກໄໝ້ຢ່າງໄວວາ ແລະ ໂຊກດີເຫດການດັ່ງກ່າວບໍ່ມີຜູ້ເສຍຊີວິດຊຶ່ງສາເຫດຂອງ ການເກີດອັກຄີໄພໃນຄັ້ງນີ້ ເຈົ້າໜ້າທີ່ສະຫຼຸບວ່າຍ້ອນໄຟຟ້າລັດວົງຈອນ.

          ປັດຈຸບັນ,ສະພາບອາກາດແມ່ນຮ້ອນເອົ້າຊຶ່ງອາດພາໃຫ້ເກີດອັກຄີໄພໄດ້ງ່າຍ. ສະນັ້ນປະຊາຊົນ ຄວນມີສະຕິລະມັດລະ ວັງໃນການຊົມໃຊ້ຟືນໄຟໂດຍເຈົ້າໜ້າທີ່ສະກັດກັ້ນ ແລະ ມອດໄຟນະຄອນຫຼວງ ວຽງຈັນໃຫ້ຮູ້ວ່າ: ອາທິດຜ່ານມານີ້ ໄດ້ເກີດ ເຫດໄຟໄໝ້ເຮືອນຂອງປະຊາຊົນຢູ່ບ້ານນາທົ່ມໜ່ວຍ 16 ເມືອງ ໄຊທານີ ນະຄອນຫຼວງວຽງຈັນ ຊຶ່ງເປັນເຮືອນຂອງນາງ ວັນສີ ຈິນດາວົງ ຜົນເສຍຫາຍ ແມ່ນ ເຮືອນ ກໍ່ຊັ້ນດຽວໂດຍສາເຫດຍ້ອນໄຟຟ້າລັດວົງຈອນແລະເກີດເຫດໄຟໄໝ້ ໂຮງງານຜະລິດເສັ້ນໝີ່ຢູ່ບ້ານ ສີຊົມ ຊື່ນ ເມືອງສີໂຄດຕະບອງ ນະຄອນຫຼວງວຽງຈັນ ມີມູນຄ່າເສຍຫາຍຫຼາຍກວ່າ 3 ຕື້ກີບ, ຂະນະທີ່ນັບແຕ່ ຕົ້ນປີມານີ້, ນະຄອນຫຼວງວຽງຈັນ ໄດ້ເກີດອັກຄີໄພ  19 ຄັ້ງໂດຍສາເຫດສ່ວນໃຫຍ່ແມ່ນໄຟຟ້າລັດວົງ ຈອນ.