ກົມສົ່ງເສີມ ແລະ ພັດທະນາສິນຄ້າ
ກະຊວງອຸດສາ ຫະກຳ ແລະ ການຄ້າ ສປປ ລາວ ແລະ ກົມສົ່ງເສີມການຄ້າລະຫວ່າງປະເທດ
ແຫ່ງຣາຊະອານາຈັກໄທ ໄດ້ຮ່ວມກັນເປີດງານວາງສະແດງສິນຄ້າ ລາວ-ໄທ ປະຈຳປີ
2013 ຂຶ້ນ ໃນລະຫວ່າງວັນທີ 3-7 ກໍລະກົດນີ້ ຢູ່ສູນການຄ້າລາວ-ໄອເຕັກ
ນະຄອນຫລວງວຽງຈັນ ໂດຍການເຂົ້າຮ່ວມເປີດພິທີຂອງທ່ານ ສົມຫວັງ ນິນທະວົງ
ຫົວໜ້າກົມສົ່ງເສີມ ແລະ ພັດທະ ນາສິນຄ້າ ແຫ່ງ ສປປ ລາວ ແລະ ທ່ານ ວະລາຍຸດ
ໄຊຍະກຸນ ອຸປະທູດໄທປະຈຳລາວ.
ທ່ານນາງ ພິມົນ ປົງກອງແກ້ວ
ອັກຄະລາຊະທູດທີ່ປຶກສາຝ່າຍການພານິດທູດໄທປະຈຳລາວ ກ່າວວ່າ:
ງານວາງສະແດງສິນຄ້າຄັ້ງນີ້ມີຈຸດປະສົງເພື່ອສ້າງຄວາມສຳພັນອັນດີໃນການສົ່ງເສີມການຄ້າລະ
ຫວ່າງຜູ້ປະກອບການ ລາວ-ໄທ ເພື່ອເພີ່ມມູນຄ່າ ການຄ້າລະຫວ່າງສອງປະເທດ
ແລະ ຊຸກຍູ້ສົ່ງເສີມໃຫ້ນັກທຸລະ ກິດຂະໜາດນ້ອຍ ແລະ ກາງ (SME)
ໄດ້ມີໂອກາດຂະຫຍາຍຕະຫລາດການຄ້າໃນປະເທດເພື່ອນບ້ານໃກ້ຄຽງ ເພື່ອຮອງຮັບການເປັນປະຊາຄົມເສດຖະກິດອາຊຽນ
ໃນປີ 2015 ທີ່ຈະເຖິງນີ້. ງານວາງສະແດງຄັ້ງນີ້ມີຜູ້ປະກອບການນຳສິນຄ້າເຂົ້າຮ່ວມປະ
ມານ
300 ຫ້ອງ, ໃນນັ້ນ ຈາກຜູ້ປະກອບການຂອງລາວ 50 ຫ້ອງ ແລະ ໄທ 250 ຫ້ອງ
ເຊິ່ງປະກອບມີສິນຄ້າປະເພດອາໄຫລ່ລົດ, ເຄື່ອງກໍ່ສ້າງ, ເຄື່ອງໃຊ້ໄຟຟ້າ,
ຜະລິດຕະພັນອາຫານ, ເສື້ອຜ້າ, ເຄື່ອງປະດັບ, ເຄື່ອງຕົບແຕ່ງເຮືອນ,
ເຄື່ອງສຳອາງ, ເຄື່ອງໃຊ້ໃນຄົວເຮືອນ ແລະ ອື່ນໆ. ນອກ ຈາກນີ້
ໃນໄລຍະຂອງການວາງ ສະແດງກໍຈະມີການເຈລະຈາຈັບຄູ່ທາງທຸລະກິດ
ເພື່ອໃຫ້ນັກທຸລະ ກິດ ລາວ-ໄທ ໄດ້ມີໂອກາດພົບປະດ້ານທຸລະກິດ, ການບໍລິການ
ແລະ ຊອກຫາວັດຖຸດິບ, ການເຝິກອາຊີບໄລຍະສັ້ນໂດຍບໍ່ເສຍຄ່າ ແລະ
ການສະແດງຄອນເສີດຈາກສິລະປິນລາວ ແລະ ໄທໃນທຸກຄ່ຳຄືນຕະຫລອດການຈັດງານ.
ທ່ານອັກຄະລາຊະທູດທີ່ປຶກສາຝ່າຍພານິດ ກ່າວວ່າ:
ງານດັ່ງກ່າວຈະມີໂຕເລກຈຳໜ່າຍສິນຄ້າຫລາຍກວ່າ 20 ລ້ານບາດ (ສະກຸນເງິນໄທ)
ແລະ ຈະເຮັດໃຫ້ຍອດການຄ້າຮ່ວມລະຫວ່າງ ລາວ-ໄທ
ໃນປີນີ້ເພີ່ມຂຶ້ນຫລາຍກວ່າປີຜ່ານມາປະມານ 25%
ທັງປະກອບເຮັດໃຫ້ສາຍພົວພັນດ້ານການຄ້າຂອງສອງປະເທດມີບາດ
ກ້າວຂະຫຍາຍຕົວແໜ້ນແຟ້ນຍິ່ງຂຶ້ນ.
ສະຖານທູດໄທປະຈຳລາວ ໃຫ້ຮູ້ວ່າ: ໃນປີ 2012
ຜ່ານມາ, ການຮ່ວມມືທາງດ້ານເສດຖະກິດ ,ການຄ້າລະຫວ່າງ ສປປ.ລາວ ແລະ ຣາຊະອານາຈັກໄທບັນລຸ
ຫລາຍກວ່າ 4.848 ລ້ານໂດລາສະຫະ ລັດ, ໃນນັ້ນ ສີນຄ້າຈາກໄທເຂົ້າມາລາວມີມູນຄ່າ 3.609
ກວ່າ ລ້ານໂດລາສະຫະລັດ ແລະ ສີນຄ້າຈາກລາວສົ່ງ ໄປໄທມີມູນຄ່າ 1.238ກວ່າລ້ານໂດລາສະຫະລັດ,
ສະເພາະແຕ່ເດືອນມັງກອນ- ເດືອນເມສາ 2013 ມູນ ຄ່າການຄ້າລະຫວ່າງສອງປະເທດບັນລຸ
ຫລາຍກວ່າ1.691 ລ້ານໂດລາສະຫະລັດ, ໃນນັ້ນ ເປັນສີນຄ້າຈາກ ໄທມາລາວມີມູນຄ່າ 1.301 ລ້ານ
ກວ່າໂດລາສະຫະລັດ ແລະ ສີນ ຄ້າຈາກລາວໄປໄທມີມູນ ຄ່າ 390 ລ້ານກວ່າໂດລາສະຫະລັດ ເຊິ່ງ
ເຫັນວ່າມີອັດຕາສ່ວນເພີ່ມຂຶ້ນ ຕາມລຳດັບ ໂດຍສາເຫດທີ່ມູນ ຄ່າການສົ່ງ ອອກຈາກໄທເຂົ້າມາ
ລາວຫລາຍກວ່າມູນຄ່າການສົ່ງ ອອກຈາກລາວໄປໄທກໍເພາະວ່າ ສປປ.ລາວ ຢູ່ໃນໄລ ຍະຂອງການພັດທະນາພື້ນຖານໂຄງລ່າງ
ແລະ ໂຄງການກໍ່ສ້າງເຂື່ອນໄຟຟ້າຫລາຍແຫ່ງທີ່ສຳຄັນຈຶ່ງມີ ຄວາມຈຳເປັນຕ້ອງນຳເຂົ້າເຄື່ອງຈັກ,
ວັດສະດຸການກໍ່ສ້າງ ແລະ ສ່ວນປະກອບອື່ນໆເປັນຈຳນວນຫລາຍ ເພື່ອພັດທະນາພື້ນຖານໂຄງລ່າງໃຫ້ສຳເລັດ.
No comments:
Post a Comment