ທ່ານ ສົມພາວ ໄຟສິດ ຜູ້ວ່າການທະນາຄານແຫ່ງ
ສປປ ລາວ ໄດ້ຂຶ້ນຊີ້ແຈງຕໍ່ສະພາແຫ່ງຊາດໃນວັນທີ 11 ກໍລະກົດນີ້ ກ່ຽວ ກັບມາດຕະການຄວບຄຸມອັດຕາແລກປ່ຽນທີ່ພວມມີຜົນກະທົບຕໍ່ຫົວໜ່ວຍທຸລະກິດສົ່ງອອກຂອງລາວໃນປັດຈຸບັນ
ໂດຍທ່ານກ່າວວ່າ: ທະນາຄານແຫ່ງ ສປປ.ລາວ ໄດ້ຈັດຕັ້ງປະຕິບັດນະໂຍບາຍອັດ ຕາແລກປ່ຽນຕາມກົນໄກຕະ
ຫລາດທີ່ມີການຄຸ້ມຄອງຂອງລັດເພື່ອຮັກສາອັດຕາແລກປ່ຽນໃຫ້ມີຄວາມສະຫງົບໂດຍມາດຕະການແຊກແຊງເມື່ອເຫັນວ່າຈຳເປັນ
ເພື່ອຄວບຄຸມອັດຕາແລກປ່ຽນໃຫ້ເໜັງຕີງຢູ່ໃນຂອບບໍ່ໃຫ້ເກີນ 5% ທັງຮັບປະກັນຮັກສາຄັງສຳຮອງເງິນຕາຕ່າງປະເທດໃຫ້ສາ
ມາດກຸ້ມການນຳເຂົ້າໃຫ້ໄດ້ຫລາຍກວ່າ 5 ເດືອນ.
ຜູ້ວ່າການທະນາຄານ ແຫ່ງ ສປປ ລາວ ກ່າວວ່າ:
2-3 ປີຜ່ານ ມາ,ທຫລ ສາມາດຮັກສາຄ່າຂອງເງິນກີບໃຫ້ມີຄວາມໝັ້ນທ່ຽງຕໍ່ພາຍໃນ
ແລະ ຕ່າງປະເທດ. ສຳ ລັບ 6 ເດືອນຕົ້ນສົກປີ 2012-2013 ເຫັນວ່າ:ເງິນກີບມີທ່າອ່ຽງແຂງຄ່າເຊິ່ງການແຂງຄ່າຂອງເງິນກີບເປັນໄປຕາມທ່າອ່ຽງລວມຂອງເສດຖະກິດການເງິນພາຍໃນ
ແລະ ສາກົນ ຍ້ອນວ່າມີກະແສທຶນໄຫລເຂົ້າໃນຂົງເຂດພາກພື້ນອາຊີຢ່າງຫລວງຫລາຍ.
ສະນັ້ນ ຈຶ່ງເຮັດໃຫ້ເງິນຕາຂອງ
ບັນດາປະເທດອາຊີແຂງຄ່າຂຶ້ນ.ຍົກຕົວຢ່າງໃນ 6
ເດືອນຕົ້ນປີ 2013 ທຽບໃສ່ 6 ເດືອນຕົ້ນ ປີ 2012 ຄືເງິນບາດແຂງຄ່າ 2,67% ແລະ
ເງິນຢວນແຂງຄ່າຂຶ້ນ 3,74% ທຽບໃສ່ເງິນໂດລາ, ເງິນເອີໂຣກໍແຂງຄ່າເຊັ່ນດຽວກັນເຖິງ
5,83%. ຢູ່ປະເທດເຮົາ,ເງິນກີບແຂງຄ່າ 2,41% ທຽບໃສ່ເງິນໂດລາ ແລະ ເງິນກີບຄ່າແຂງ
0,25% ທຽບໃສ່ເງິນບາດ ເຊິ່ງການແຂງຄ່າດັ່ງກ່າວແມ່ນນອນໃນຂອບຂອງແຜນ ການທີ່ກຳນົດໄວ້.ທະ
ນາຄານແຫ່ງ ສປປ ລາວ ໄດ້ດຳເນີນນະໂຍບາຍອັດຕາແລກປ່ຽນຕາມກົນໄກຕະຫລາດທີ່ມີການຄຸ້ມຄອງຂອງລັດ
ໂດຍໃຫ້ອັດຕາແລກ ປ່ຽນເງິນກີບທຽບໃສ່ເງິນໂດລາຂຶ້ນ ແລະ ລົງຕາມສະພາບຕະ ຫລາດສາກົນ
ແລະ ພາຍໃນປະເທດ, ແຕ່ມີການແຊກແຊງບາງຄັ້ງ ເພື່ອບໍ່ໃຫ້ອັດຕາແລກປ່ຽນຜັນຜວນ
ຈຶ່ງເຮັດໃຫ້ອັດຕາແລກ ປ່ຽນໃນໄລຍະຜ່ານມາມີຄວາມສະຫງົບປົກກະຕິ.
ຜູ້ວ່າທະນາຄານໄດ້ຍົກໃຫ້ເຫັນການປະຕິບັດນະໂຍບາຍອັດຕາແລກປ່ຽນຄືດັ່ງກ່າວມີຜົນດີ
ແລະ ຜົນເສຍຕໍ່ລະບົບເສດຖະ ກິດວ່າ:ຜົນດີແມ່ນໄດ້ປະກອບ ສ່ວນເຮັດໃຫ້ເສດຖະກິດມະຫາພາກມີສະຖຽນລະພາບ,ການລົງ
ທຶນຈາກຕ່າງປະເທດ ແລະ ພາຍໃນປະເທດມີບັນຍາກາດທີ່ດີ,ສັງ ຄົມມີຄວາມເຊື່ອໝັ້ນຕໍ່ຄ່າເງິນກີບເຮັດໃຫ້ເສດຖະກິດຂອງປະເທດເຕີບໃຫຍ່ຢ່າງຕໍ່ເນື່ອງໄດ້ປະກອບ
ສ່ວນເຮັດໃຫ້ອັດຕາເງິນເຟີ້ຢູ່ໃນລະດັບຕ່ຳຍ້ອນວ່າປະເທດເຮົາເປັນປະເທດນຳເຂົ້າສິນຄ້າເພື່ອການລົງທຶນ,ວັດຖຸດິບ,ເຄື່ອງກົນຈັກ,ເຕັກໂນໂລຊີຕ່າງໆ
ແລະ ນ້ຳ ມັນເຊື້ອໄຟ ເຊິ່ງເປັນສິນຄ້າທີ່ຈຳເປັນຕ້ອງນຳເຂົ້າມາເພື່ອພັດທະ
ນາພື້ນຖານໂຄງລ່າງເສດຖະກິດມີລາຄາຖືກລົງ ເຮັດໃຫ້ອັດຕາເງິນເຟີ້ສະເລ່ຍຕ່ຳລົງ.ຕົວຢ່າງຖ້າລາຄານ້ຳມັນເຊື້ອໄຟແພງຂຶ້ນຢູ່ຕ່າງປະເທດ
ຫລື ລາຄານ້ຳມັນເຊື້ອໄຟນຳເຂົ້າແພງຂຶ້ນຍ້ອນອັດ ຕາແລກປ່ຽນອ່ອນຄ່າ ຈະເຮັດໃຫ້ລາຄາໝວດສິນຄ້າປະເພດອື່ນແພງຂຶ້ນຕາມມາ
ແລະ ຈະເຮັດໃຫ້ອັດຕາເງິນເຟີ້ສູງຂຶ້ນ,ໜີ້ສິນຂອງລັດຖະບານຕໍ່ຕ່າງປະເທດຕ່ຳລົງໂດຍປຽບທຽບ
ຍ້ອນວ່າເມື່ອລັດຖະບານຕ້ອງການຊຳລະໜີ້ໃຫ້ຕ່າງປະເທດຈະນຳໃຊ້ເງິນກີບຈຳນວນໜ້ອຍລົງ
ເພື່ອແລກ ປ່ຽນເອົາເງິນໂດລາໄປຊຳລະໜີ້ ຕ່າງປະເທດ,ລາຍຮັບສະເລ່ຍຕໍ່ຫົວຄົນເພີ່ມຂຶ້ນຍ້ອນວ່າລາຍຮັບເປັນເງິນກີບຂອງພົນລະເມືອງລາວ
ເມື່ອຕີລາຄາເປັນເງິນໂດລາແລ້ວມີຈຳນວນຫລາຍຂຶ້ນ.ຂະ ນະດຽວກັນກໍມີຜົນເສຍຕາມມາ
ເຊິ່ງ ທຫລ ຮັບຮູ້ວ່າການແຂງຄ່າຂອງເງິນກີບອາດມີຜົນກະທົບຫລາຍຂົງເຂດເປັນຕົ້ນຕໍຂົງເຂດການສົ່ງອອກເຊັ່ນ:ທຸລະກິດຕັດ
ຫຍິບ,ທຸລະກິດສົ່ງອອກກາເຟສຳເລັດຮູບ, ສົ່ງອອກສິນຄ້າກະສິກຳແປຮູບ ແລະ ອື່ນໆ
ເພາະເຮັດໃຫ້ລາຍຮັບເປັນເງິນຕາຕ່າງປະເທດ ທີ່ໄດ້ມາເມື່ອປ່ຽນມາເປັນເງິນກີບແລ້ວໄດ້ຈຳນວນໜ້ອຍລົງ.ແນວໃດກໍຕາມ,ໃນນາມຜູ້ຮັບຜິດຊອບດູແລຄ່າເງິນ,ທະນາຄານແຫ່ງ
ສປປ ລາວ ເຫັນວ່າເມື່ອສົມທຽບຜົນໄດ້-ຜົນເສຍໂດຍລວມຕໍ່ລະບົບເສດຖະກິດແລ້ວ,
ການແຂງຄ່າຂອງເງິນກີບໃນສະພາບຜັນຜວນຄືແນວນີ້ມີຜົນດີຫລາຍກວ່າຜົນເສຍ,
ແຕ່ສະພາບການແຂງຄ່າດັ່ງກ່າວກໍມີຂອບເຂດເວລາຂອງມັນ ເມື່ອເສດຖະກິດການເງິນສາກົນ
ແລະ ພາຍໃນອຳນວຍຄວາມສະດວກແລ້ວ, ທຫລ ຈະຄວບຄຸມອັດຕາແລກປ່ຽນທີ່ສົມດູນທີ່ສຸດ
ເພື່ອໃຫ້ທຸກພາກສ່ວນເສດຖະກິດມີຜົນກະທົບໜ້ອຍທີ່ສຸດ.
No comments:
Post a Comment