laophatthananewspaper: ໂຈນລັກຊັບຕາມໂຮງໝໍຖືກຈັບດຳເນີນຄະດີແລ້ວ

ໃນບໍ່ດົນມານີ້ ທາງໜັງສືພິມລາວພັດທະນາພວກເຮົາໄດ້ນຳສະເໜີຂ່າວເຕືອນສັງຄົມໃຫ້ລະວັງ ໂດຍສະເພາະປະຊາ ຊົນທີ່ໄປນອນເຝົ້າຍາດພີ່ນ້ອງຄົນເຈັບ ຢູ່ຕາມໂຮງໝໍ ພາຍຫຼັງມີກຸ່ມຄົນບໍ່ດີໄດ້ເຄື່ອນໄຫວລັກຊັບສິນຂອງ ຍາດຄົນເຈັບ ຫຼື ຜູ້ມາຢ້ຽມຢາມຄົນປ່ວຍນັ້ນ ເຊິ່ງເຫດການດັ່ງ ກ່າວກໍເກີດຂື້ນ ມາແລ້ວໃນໄລຍະເດືອນ ກໍລະກົດ ຜ່ານມານີ້ ຢູ່ໂຮງໝໍມິດຕະ ພາບ 150 ຕຽງເຊິ່ງ ມີຍາດຄົນເຈັບທ່ານໜຶ່ງທີ່ເປັນຜູ້ເສຍຫາຍ ໄດ້ເຂົ້າແຈ້ງ ຄວາມຕໍ່ເຈົ້າໜ້າທີ່ ປກສ ເມືອງຈັນທະບູລີ ນະ ຄອນຫຼວງວຽງຈັນ ພາຍຫຼັງເກີດເຫດຄົນຮ້າຍລັກເອົາກະເປົາເງີນທີ່ມີຊັບສິນ ໂທລະສັບມືຖື 2 ໜ່ວຍ ແລະ ເງີນອີກຈຳນວນ ໜຶ່ງລົບໜີໄປ.

ທ່ານ ນາງ ອ່ອນສີ ສຸວັນຄຳ ຢູ່ບ້ານ ສີສະຫວາດ ເມືອງ ຈັນທະບູລີ ນະຄອນຫຼວງວຽງຈັນ ໃຫ້ຮູ້ວ່າ: ໃນວັນທີ 17 ກໍ ລະກົດຜ່ານມານີ້ ຕົນເອງໄດ້ໄປເຝົ້າແມ່ທີ່ປິ່ນ ປົວຢູ່ໂຮງໝໍ 150 ຕຽງ ຢູ່ຊັ້ນ 3 ໂດຍໃນເວລາປະມານທ່ຽງຄືນຂອງວັນທີ 18 ກໍລະກົດໄດ້ມີຄົນຮ້າຍເຂົ້າມາລັກເອົາກະເປົາຂອງຕົນທີ່ປະໄວ້ຢູ່ໃນຫ້ອງນອນຂອງໂຮງໝໍດັ່ງກ່າວ ຫຼົບໜີໄປຈາກນັ້ນຈຶ່ງໄດ້ແຈ້ງຕໍ່ເຈົ້າໜ້າທີ່ຕິດ ຕາມຕົວມາດຳເນີນຄະດີ.

ຈາກການກວດກາ ແລະ ເກັບກຳຂໍ້ມູນ ວິຊາສະເພາະ ທາງເຈົ້າໜ້າທີ່ ປກສ ເມືອງ ຈັນທະບູລີ ໄດ້ຮູ້ວ່າ: ເປົ້າໝາຍຜູ້ກະທຳຜິດແມ່ນ ທ້າວ ພູແກ້ວ ຫຼື ປ໋ອກ ອາຍຸ 34 ປີ ຢູ່ບ້ານ ຈອມເພັດໃຕ້ເມືອງ ສີສັດຕະນາກ ນະຄອນ ຫຼວງວຽງ ຈັນ, ຈາກນັ້ນ ຈຶ່ງໄດ້ປະສານກັບ ປກສ ເມືອງດັ່ງກ່າວເພື່ອຊ່ວຍຕິດຕາມຕົວມາດຳເນີນຄະດີ ເຊິ່ງ ໃນວັນທີ 18 ສິງຫາ ນີ້ ທາງເຈົ້າ ໜ້າທີ່ ປກສ ເມືອງ ສີສັດຕະນາກ ສາມາດຈັບຕົວ ທ້າວ ພູແກ້ວ ພາຍຫຼັງທີ່ຜູ້ກ່ຽວໄດ້ມາລີ້ ຊ້ອນຢູ່ເຮືອນຂອງ ພໍ່-ແມ່ ຕົນເອງ ແລະ ໄດ້ເກັບກູ້ເຄື່ອງຂອງກາງຈຳ ນວນໜຶ່ງມາດຳເນີນຄະດີ.

ຈາກການກວດກາປະ ຫວັດຂອງເຈົ້າໜ້າທີ່ ໄດ້ຮູ້ວ່າ: ຜ່ານມາຜູ້ກ່ຽວເຄີຍມີການພົວພັນກັບຢາເສບຕິດ ແລະ ປັດຈຸບັນກໍຕິດຢາເສບຕິດຢ່າງຮຸນແຮງ ແລະ ເຄີຍຖືກອຳນາດການປົກຄອງສຶກສາອົບຮົມພຶດຕິກຳຜູ້ກ່ຽວ, ແນວໃດກໍຕາມ ຜູ້ຕ້ອງຫາຍັງເປັນຄົນທີ່ບໍ່ມີທີ່ຢູ່ແນ່ນອນ ແລະ ໄດ້ຍ້ຍາຍສະຖານທີ່ພັກເຊົາຢູ່ ເລື້ອຍໆ ພາຍຫຼັງ ມີບັນຫາກັບຄອບຄົວ ກ່ອນທີ່ຈະກັບມາອາໄສຢູ່ນຳພໍ່-ແມ່ ແລະ ໄດ້ເຄື່ອນໄຫວລັກຊັບພົນລະເມືອງ.

ຜ່ານການສືບສວນ-ສອບສວນ ຜູ້ຕ້ອງຫາຮັບສາລະພາບຕໍ່ເຈົ້າໜ້າທີ່ວ່າ: ໃນວັນທີ 17 ກໍລະ ກົດ ຕົນເອງໄດ້ໄປໂຮງໝໍ 150 ຕຽງ ແລະ ເຮັດຄືວ່າໄປຢ້ຽມ ຢາມຍາດພີ່ນ້ອງຢູ່ໃນໂຮງໝໍ ຈາກນັ້ນໃນເວລາທ່ຽງຄືນວັນທີ 18 ກໍລະກົດ ຕົນເອງໄດ້ເລາະຕາມຫ້ອງນອນ ແລະ ເຫັນກະເປົາໜ່ວຍໜຶ່ງຂອງປະຊາຊົນວາງຢູ່ ເຊິ່ງສັງເກດຜູ້ຄົນນອນຫຼັບ ຈຶ່ງໄດ້ເຂົ້າໄປຈັບເອົາກະເປົາເງີນແລ້ວຫຼົບໜີໄປ ແລະ ກໍໄດ້ເອົາຊັບສິນຄື: ໂທລະສັບມືຖື 2 ໜ່ວຍ ທີ່ຢູ່ນັ້ນໄປຂາຍໃຫ້ປະຊາຊົນເຂດບ້ານ ຈອມເພັດ ໄດ້ເງີນ 5 ພັນກ່ວາບາດແລ້ວນຳເອົາໄປຊື້ຢາບ້າມາເສບ ແລະ ຈ່າຍຫຼີ້ນ ກິນຟຸມເຟືອຍ.

ທ່ານ ພັນຕີ ທອງສະຫວັດ ແສນສຸວາດ ຮອງກອງບັນຊາການ ປກສ ເມືອງ ສີສັດຕະນາກ ກ່າວວ່າ: ເຫດການລັກຊັບຍາດຄົນເຈັບທີ່ໄປນອນເຝົ້າຢູ່ຕາມໂຮງໝໍ ມັກເກີດຂື້ນເລື້ອຍໆ, ສະ ນັ້ນ ຈຶ່ງຢາກເຕືອນໃຫ້ປະຊາຊົນ ມີຄວາມລະວັງຕື່ມ ໃນການເກັບຮັກສາຊັບສິນ ແລະ ກໍຮຽກຮ້ອງ ຜູ້ທີ່ເສຍຫາຍນັ້ນ ໃຫ້ເຂົ້າມາຊີ້ຕົວ ແລະ ໃຫ້ຂໍ້ມູນທີ່ເຄີຍຖືກເສຍຫາຍ ເພື່ອທາງເຈົ້າໜ້າທີ່ຈະໄດ້ນຳເປັນຂໍ້ມູນຫຼັກຖານດຳເນີນຄະດີຕໍ່ຜູ້ ກ່ຽວຕື່ມອີກ, ຂະນະດຽວກັນ ກໍໄດ້ສົ່ງສຳນວນເພື່ອຂໍກັກຂັງພາງຈາກ ໄອຍະການ ເພື່ອຈະໄດ້ສືບ ສວນ-ສອບສວນ ຂະຫຍາຍຜົນ ແລະ ດຳເນີນຄະດີຕາມລະບຽບ ກົດໝາຍ.