ພະນັກງານລັດຖະກອນມີຄຸນນະພາບວຽກຈຶ່ງສຳເລັດ ( ຄໍລຳ ແລກປ່ຽນຄຳເຫັນ )

 ໂດຍ : ຄຳກອງ ທຳມະເທວາ

     ພະນັກງານລັດຖະກອນແມ່ນຜູ້ຕັດສິນຜົນສຳເລັດຕ່າງໆຂອງວຽກງານ, ຖ້າພະນັກງານລັດຖະກອນມີຄຸນນະພາບ, ວຽກ ງານກໍຈະມີປະສິດທິຜົນ. ດັ່ງນັ້ນ ພັກເຮົາເວລາໃດກໍຖືສຳຄັນຕໍ່ກັບບັນຫາພະນັກງານລັດຖະກອນໃນມະຕິກອງປະຊຸມໃຫຍ່ ຄັ້ງທີ IX ກໍ ໄດ້ກຳນົດເນື້ອໃນ 4 ບຸກທະລຸໜຶ່ງ ໃນນັ້ນກໍແມ່ນການບຸກທະລຸທາງດ້ານການພັດທະນາຊັບພະຍາກອນມະນຸດ ໃຫ້ມີຄຸນນະພາບເພື່ອກາຍເປັນພະນັກງານລັດຖະກອນທີ່ມີຄຸນນະພາບຄືໃນໄລຍະຜ່ານມາ, ພັກ-ລັດເຮົາໄດ້ມີນະໂຍບາຍຮັບ ເອົາພະນັກງານລັດຖະກອນໃນແຕ່ລະປີເປັນຈຳນວນຫລາຍພັນຄົນເພື່ອສັບຊ້ອນເຂົ້າໃນຂະແໜງການຕ່າງໆນັບທັງສູນກາງລົງ ຮອດທ້ອງຖິ່ນຮາກຖານ, ແຕ່ໃນນັ້ນການຮັບລັດຖະກອນສ່ວນຫລາຍຍັງເຫັນວ່າບໍ່ທັນໄປຕາມທິດນຳທີ່ພັກ-ລັດເຮົາຕ້ອງ ການຕ້ອງເປັນຜູ້ທີ່ມີຄວາມຮູ້, ຄວາມສາມາດ, ມີຄຸນສົມບັດສິນທຳປະຕິວັດໜັກແໜ້ນ, ແຕ່ຜ່ານມາການຄັດເລືອກຂອງ ພວກ ເຮົາພັດບໍ່ໄດ້ແນວນັ້ນ ກໍແມ່ນຍ້ອນກົນໄກເກື້ອກູນມັນຍັງມີຢູ່, ຄັດເລືອກເອົາແຕ່ເດັກຝາກ ແລະ ຍາດພີ່ນ້ອງຂອງຕົນ, ສ່ວນ ຜູ້ອື່ນຈະເສັງໄດ້, ເກັ່ງມີຄວາມສາມາດກໍຕາມ ຫລື ຮ້າຍແຮງໄປກວ່ານັ້ນ ມີບາງບ່ອນຍັງມີລັກສະນະວິ້ງເຕັ້ນເຂົ້າເປັນພະນັກ ງານລັດຖະກອນກໍມີ. ດ້ວຍເຫດຜົນດັ່ງກ່າວນັ້ນ ຈຶ່ງເຮັດໃຫ້ຄຸນນະພາບພະນັກງານລັດຖະກອນບໍ່ສາມາດຕອບສະໜອງໄດ້ຕໍ່ ກັບໜ້າທີ່ວຽກງານທີ່ພັກ-ລັດຕ້ອງການ, ເຖິງວ່າຈະເພີ່ມເງິນເດືອນຂຶ້ນສູງພຽງໃດ, ແຕ່ໜ້າວຽກນັ້ນກໍບໍ່ສຳເລັດໄດ້ຍ້ອນຄົນ ຂາດຄຸນນະພາບ.

    ມາໃນສົກປີນີ້ (2013-2014), ລັດຖະບານໄດ້ປັບປຸງລະບຽບກ່ຽວກັບຮັບເອົາລັດຖະກອນໃໝ່ໂດຍຮູບການສອບເສັງ ຄັດເລືອກເພື່ອຊອກໄດ້ຜູ້ທີ່ມີເງື່ອນໄຂເໝາະສົມທັງຄວາມຮູ້ຄວາມສາມາດຫລີກເວັ້ນການຮັບລັດຖະກອນແບບເກື້ອກູນຄື ຜ່ານມາ ໂດຍມອບໃຫ້ກະຊວງພາຍໃນເປັນຜູ້ຮັບຜິດຊອບເລື່ອງນີ້ໂດຍກົງ. ໃນການສອບເສັງແມ່ນລວມມີ 2 ພາກ ຄືພາກ ຄວາມຮູ້ທົ່ວໄປ (ພາກທິດສະດີ) ແລະ ພາກວິຊາສະເພາະ, ຖ້າເສັງໄດ້ຄະແນນ 50% ຂຶ້ນໄປ ຈຶ່ງອອກໃບຢັ້ງຢືນໃຫ້ແລ້ວເອົາ ໃບຢັ້ງຢືນໄປຍື່ນຕໍ່ເພື່ອກຽມສອບເສັງເຂົ້າວິຊາສະເພາະທີ່ໄດ້ຮຽນມາໃນແຕ່ລະອົງການສຳນັກງານ ແລະ ກ້າວໄປເຖິງການເຂົ້າ ເປັນພະນັກງານລັດຖະກອນຕໍ່ໄປ.

    ນີ້ຖືວ່າແມ່ນເທື່ອທຳອິດທີ່ຄັດເລືອກເອົາຄົນທີ່ມີຄຸນນະພາບເຂົ້າມາເປັນພະນັກງານລັດຖະກອນ, ຮອດປີ 2015 ລາວເຮົາ ຈະກ້າວເຂົ້າສູ່ AEC (ປະຊາຄົມເສດຖະກິດອາຊຽນ). ສະນັ້ນ ພະນັກງານລັດຖະກອນຕ້ອງມີຄວາມພ້ອມນັບທັງດ້ານພາສາ ສາກົນ ແລະ ຄວາມຮູ້ຄວາມສາມາດດ້ານວິຊາສະເພາະ. ດັ່ງນັ້ນ ໃນໂອກາດນີ້ ຈຶ່ງຂໍຝາກເຖິງຜູ້ທີ່ມີໜ້າທີ່ກວດກາບົດສອບເສັງ ຈົ່ງຢຶດໝັ້ນໃນຫລັກການຄວາມເປັນທຳ, ຊື່ສັດສຸຈະລິດເພື່ອຈະໄດ້ມາພະນັກງານລັດຖະກອນທີ່ມີຄຸນນະພາບຕາມທີ່ພັກລັດ ເຮົາຕ້ອງການ.