ການລະເມີດລະບຽບການຂັບຂີ່ຍັງມີຫລາຍ

            ປີ 2012, ປະເທດເຮົາມີອຸປະຕິເຫດຕາມຖະໜົນເກີດຂຶ້ນຫລາຍກວ່າ 5 ພັນກໍລະນີ, ມີຜູ້ເສຍຊີວິດເຖິງ 888 ຄົນ ແລະ ປີນີ້ ຄາດວ່າຕົວເລກການສູນເສຍທີ່ບໍ່ເພິ່ງ ປາດຖະໜາຈາກອຸປະຕິເຫດຕາມຖະໜົນນີ້ກໍອາດ ຈະສູງຂຶ້ນຄືດັ່ງທຸກປີຜ່ານມາ. ຈາກບັນ ຫາດັ່ງກ່າວເຮັດໃຫ້ປະເທດເຮົາເປັນປະເທດໜຶ່ງຕິດອັນດັບຕົວເລກເກີດອຸປະຕິເຫດ ສູງໃນພາກ ພື້ນ, ອັນໄດ້ສ້າງ ຄວາມສູນເສຍທາງດ້ານຊັບສີນ, ຊີວິດ ແລະ ເສດຖະກິດຂອງຊາດເປັນຈຳ ນວນບໍ່ໜ້ອຍໃນໄລຍະຜ່ານມາ.

          ໃນໄລຍະຜ່ານມາ, ເຖິງວ່າລັດຖະບານ, ໄດ້ມີຄວາມພະຍາຍາມໃນການຊອກທຸກວິທີ ທາງເພື່ອໃຫ້ບັນຫາດັ່ງກ່າວຫລຸດຜ່ອນລົງດ້ວຍການແຕ່ງຕັ້ງຄະນະກຳມະການໃນລະດັບຕ່າງໆ ເພື່ອຮ່າງລະບຽບ, ກົດໝາຍໃນການປ້ອງກັນ ແລະ ສະກັດ ກັ້ນການ ເກີດອຸປະຕິເຫດຕາມຖະ ໜົນລວມໄປເຖິງການສຸມທຶນຮອນຢ່າງຫລວງຫລາຍເພື່ອປັບປຸງລະບົບການຄົມມານາຄົມ ໃຫ້ມີຄວາມສະດວກປອດໄພໃ ນຂອບເຂດທົ່ວປະເທດ. ແຕ່ສະພາບອຸປະຕິເຫດຍັງເຫັນວ່າບໍ່ມີທ່າອ່ຽງຫລຸດລົງ, ບາງໄລຍະຈຳນວນຄັ້ງອຸປະຕິເຫດຫລຸດລົງ ແຕ່ຕົວເລກຜູ້ເສຍຊີວິດພັດສູງຂຶ້ນອັນນີ້ໄດ້ສະແດງໃຫ້ເຫັນວ່າແມ່ນສິ່ງທ້າທາຍໜຶ່ງທີ່ທຸກພາກສ່ວນຕ້ອງໄດ້ຮ່ວມແຮງຮ່ວມ ໃຈກັນແກ້ໄຂຢ່າງຈິງຈັງ.

                ອຸປະຕິເຫດທີ່ເກີດຂຶ້ນສ່ວນຫລາຍແມ່ນມາຈາກການລະເມີດລະບຽບການຂັບຂີ່ເປັນຕົ້ນ: ເມົາແລ້ວຂັບ, ຂັບຂີ່ ລົດໄວເກີນຄວນ, ລ່ວງໄຟອຳນາດ, ຂັບຂີ່ລົດຜິດລະບຽບ ແລະ ຂັບຂີ່ໂດຍປະໝາດອື່ນໆ. ຕາມການລາຍຂອງເຈົ້າໜ້າທີ່ຈະ ລາຈອນນະຄອນຫລວງວຽງຈັນໃຫ້ຮູ້ວ່າ: ໂດຍສະເລ່ຍແລ້ວໃນໜຶ່ງອາທິດຈະມີຜູ້ລະເມີດລະບຽບການຂັບຂີ່ປະມານ 300-500 ກໍລະນີ ແລະ ເສັ້ນທາງ ຫລື ຈຸດໄຟອຳນາດໃດທີ່ບໍ່ມີເຈົ້າໜ້າທີ່ປະຈຳການແມ່ນມັກມີການລະເມີດລະບຽບ ແລະ ເກີດອຸ ປະຕິເຫດຫລາຍທີ່ສຸດເນື່ອງຈາກວ່າຜູ້ຂັບຂີ່ຈຳນວນບໍ່ໜ້ອຍມັກສວຍໂອກາດໃນເມື່ອບໍ່ມີເຈົ້າໜ້າທີ່ຕຳຫລວດຄ່ອຍຄວບຄຸມ ສຸດທ້າຍກໍພາໃຫ້ເກີດອຸປະຕິເຫດຕາມມາ.

         ຂ່າວໄດ້ໃຫ້ຮູ້ຕື່ມວ່າ: ໃນຕອນເຊົ້າວັນທີ 5 ກັນຍານີ້, ໄດ້ເກີດອຸປະຕິເຫດລົດໂດຍສານສາຍເໜືອໝາຍເລກທະບຽນ ບຄ 2229 ກຳແພງນະຄອນ, ທີ່ມີຜູ້ໂດຍສານນັ່ງມານຳລົດຈຳນວນ 15 ຄົນຕຳເຊິ່ງໜ້າກັບລົດບັນທຸກໝາຍເລກທະບຽນ ບກ 1835 ກຳແພງນະຄອນຢ່າງຮຸນແຮງ, ເຮັດໃຫ້ຜູ້ຂັບລົດໂດຍສານຊື່ທ້າວ ຫວັດ ເສຍຊີວິດໃນຂະນະນຳສົ່ງໂຮງໝໍ, ສ່ວນຜູ້ຂັບ ລົດບັນທຸກ ແລະ ຜູ້ໂດຍສານແມ່ນໄດ້ຮັບບາດເຈັບເລັກໜ້ອຍ, ອຸປະຕິເຫດຄັ້ງນີ້ເກີດຂຶ້ນຢູ່ຂົວນ້ຳປັດ (ເສັ້ນທາງເລກ 13 ເໜືອ ), ເມືອງຫີນເຫີບແຂວງວຽງຈັນ.