ການວາງຂາຍສິນຄ້າໃນບຸນຊ່ວງເຮືອຍັງບໍ່ເປັນລະບຽບເທົ່າທີ່ຄວນ

         ການເປີດຕະຫຼາດນັດວາງຂາຍສິນຄ້າໃນໂອກາດບຸນອອກພັນສາ ແລະ ຊ່ວງເຮືອທ່າວັດຈັນປະຈຳປີ 2013 ນັບວ່າ ເປັນປາງບຸນໃຫຍ່ໜຶ່ງຄືດັ່ງທຸກໆປີທີ່ຜ່ານ ມາໂດຍມີສິນຄ້າເກືອບທຸກຊະນິດໄດ້ນຳມາວາງຂາຍບໍ່ວ່າຈະເປັນສິນຄ້າຈາກພາຍໃນ ແລະ ຕ່າງປະເທດ ແລະ ຂາຍບໍລິການຕ່າງໆທີ່ຄະນະກຳມະການຈັດບຸນໄດ້ອະນຸຍາດ ໃຫ້ໃນຄວາມຮັບຜິດ ຊອບຂອງໃຜມັນນັບຕັ້ງແຕ່ສາມແຍກປາກປ່າສັກ-ເສັ້ນ ທາງ ລຽບແຄມຂອງຈົນຮອດສາມແຍກທາດ ຂາວ ແລະ ລວມໄປເຖິງທາງຮ່ອມຕ່າງໆ ຕາມຄຸ້ມບ້ານວັດຈັນ, ຊຽງຍືນ ແລະ ບ່ອນ ອີ່ນໆອີກນັບເປັນຈຳນວນຫຼວງຫຼາຍເບິ່ງ ແລ້ວເຫັນວ່າຍັງບໍ່ຄ່ອຍຈະເປັນລະບຽບ ຮຽບຮ້ອຍເທົ່າທີ່ຄວນເຮັດໃຫ້ເກີດຄວາມ ແອອັດ , ກີດຂວາງການສັນຈອນຂອງມວນຊົນທີ່ມາທ່ຽວບຸນ.

        ຄືດັ່ງທີ່ພວກເຮົາຮູ້ນຳກັນ ແລ້ວວ່າ:ກ່ອນຈະມີການວາງສະແດງ ແລະ ຂາຍສິນຄ້ານັ້ນ, ຊາວຄ້າຂາຍຈະຕ້ອງໄດ້ຈອງ ແລະ ເຊົ່າເນີ້ອທີ່ດິນບ່ອນຂາຍຈາກບໍລິສັດຜູ້ຮັບສຳປະທາ, ໂດຍໄດ້ມີຂໍ້ກຳນົດ, ກົດລະບຽບໃຫ້ຜູ້ປະກອບການຕ່າງໆໃນບຸນ ເພື່ອພ້ອມກັນປະຕິບັດໃຫ້ຖືກຕ້ອງ, ເປັນຕົ້ນ:ແຕ່ລະລ໊ອກຂອງຮ້ານຈະຖືກຈັດສັນໃຫ້ຍາວ  4  ແມັດ ແລະ ກວ້າງ 2 ແມັດ ຫຼື ຫຼາຍກວ່າ ນັ້ນແລ້ວແຕ່ຄວາມສາມາດໃນ ການຈ່າຍຄ່າເຊົ່າ,ໃນນີ້ສຳລັບ ການຕັ້ງເຕັ້ນຂອງແຕ່ລະຮ້ານແມ່ນບໍ່ໃຫ້ກາຍຂອບ

ທາງຍ່າງ ແລະ ຂະໜາດທີ່ກຳນົດໃຫ້, ເຊັ່ນດຽວກັບການວາງສະແດງ ແລະ ຂາຍສິນຄ້າກໍຕ້ອງໃຫ້ນອນຢູ່ໃນຂອບເຂດລ໊ອກ ຂອງຕົນ. ແຕ່ໃນຂະນະດຽວກັນກໍສັງເກດເຫັນວ່າ:ຮ້ານຂາຍສິນຄ້າພັດບໍ່ປະຕິບັດຕາມຂໍ້ກຳນົດດັ່ງກ່າວເກີນເຂົ້າມາໃນບໍລິເວນ ທາງຍ່າງໄປມາເຮັດໃຫ້ການສັນຈອນພົບກັບຄວາມຍຸງຍາກ ແລະ ເກີດສະ ພາບແອອັດກວ່າເກົ່າຖ້າເກີດສະພາບບໍ່ດີຫຼືອັກຄີໄພ ເກີດຂຶ້ນແມ່ນຍາກທີ່ຈະເອົາຫລົບຫຼີກ ແລະ ກູ້ໄພໄດ້. ນອກຈາກນີ້ຢູ່ບໍລິເວນຫວງຫ້າມເຊັ່ນ: ເຂດເດີນຫຍ້າສວນເຈົ້າອະນຸວົງ, ສວນສະຫຼອງໄຊ ແລະ ຈຸດຫ້າມອື່ນໆຍັງປາກົດເຫັນມີການຕັ້ງຮ້ານບໍລິການອື່ນໆເກີດຂື້ນ. ດັ່ງນັ້ນ, ຖ້າຫາກບໍ່ມີການກວດກາ ແລະ ຕັກ ເຕືອນຕໍ່ຜູ້ລະເມີດຈາກພາກສ່ວນກ່ຽວຂ້ອງ, ແນ່ນອນວ່າສວນຫຍ້າບໍລິເວນນີ້ຈະຖືກທຳລາຍ ແລະ ເຕັມໄປດ້ວຍ ເສດຂີ້ເຫຍື້ອ ດັ່ງປີຜ່ານມາ. ດັ່ງນັ້ນຈຶ່ງສະເໜີໃຫ້ພາກສ່ວນກ່ຽວຂ້ອງຄວນມີວິທີແກ້ໄຂ ເພື່ອບໍ່ໃຫ້ບັນຫາດັ່ງກ່າວເກີດຂຶ້ນດັ່ງ ທີ່ເຄີຍເປັນມາແລ້ວ.