ໃນຕອນເຊົ້າວັນທີ 17 ພະຈິກ 2013 ນີ້, ທ່ານ ຈູມມາລີ
ໄຊຍະສອນ ປະ ທານປະເທດແຫ່ງ ສປປ ລາວ ໄດ້ໃຫ້ກຽດ ຕ້ອນຮັບການເຂົ້າຢ້ຽມຂ່ຳນັບຂອງທ່ານ ຊິນໂຊ
ອາເບະ ນາຍົກລັດຖະມົນຕີຍີ່ປຸ່ນພ້ອມດ້ວຍຄະນະຢູ່ທຳນຽບປະທານປະ ເທດໃນໂອກາດທ່ານ ແລະ ຄະນະໄດ້ເດີນທາງມາຢ້ຽມຢາມ
ສປປ ລາວ ຢ່າງເປັນທາງການ ຕາມຄຳເຊີນຂອງນາຍົກລັດຖະ ມົນຕີແຫ່ງ ສປປ ລາວ.
ໂອກາດນີ້, ປະທານປະເທດ ຈູມມາລີ ໄຊຍະສອນ
ໄດ້ສະແດງຄວາມ ຍິນດີຕ້ອນຮັບ ແລະ ຊົມເຊີຍຕໍ່ການເດີນ ທາງມາຢ້ຽມຢາມລາວຂອງທ່ານ ຊິນໂຊ ອາເບະ
ນາຍົກລັດຖະມົນຕີຍີ່ປຸ່ນ ພ້ອມດ້ວຍຄະນະໃນຄັ້ງນີ້ ຊຶ່ງເປັນການປະກອບສ່ວນສຳຄັນເຂົ້າໃນການສົ່ງເສີມການພົວ ພັນຮ່ວມມືລະຫວ່າງ
ສອງປະເທດລາວ-ຍີ່ປຸ່ນ ໃຫ້ນັບມື້ຂະຫຍາຍຕົວ ແລະ ແຕກດອກອອກຜົນຍິ່ງໆຂຶ້ນ. ພ້ອມທັງຕີລາຄາສູງຕໍ່ການຊ່ວຍເຫລືອຂອງລັດຖະບານ
ແລະ ປະຊາຊົນຍີ່ປຸ່ນໃຫ້ແກ່ລັດຖະບານ ແລະ ປະຊາຊົນລາວໃນການ ພັດທະນາເສດຖະກິດ-ສັງຄົມນັບມື້ດີຂຶ້ນ.
ທ່ານ
ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ພ້ອມດ້ວຍຄະນະໄດ້ເດີນທາງມາເຖິງນະຄອນຫລວງວຽງຈັນ
ໃນ ຕອນເຊົ້າວັນທີ 17 ພະຈິກ 2013 ນີ້ ເພື່ອດຳເນີນການຢ້ຽມຢາມ ສປປ ລາວ ຢ່າງເປັນທາງການຕາມຄຳເຊີນຂອງທ່ານ
ທອງສິງ ທຳມະວົງ ນາຍົກລັດຖະມົນຕີແຫ່ງ ສປປ ລາວ ຊຶ່ງພິທີຕ້ອນຮັບຢ່າງເປັນທາງການໄດ້ຈັດຂຶ້ນຢູ່ຫ້ອງວ່າການລັດຖະບານ
ໃນເວ ລາ 09:45 ໂມງ ໂດຍມີນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະໄດ້ໃຫ້ການຕ້ອນຮັບຢ່າງອົບອຸ່ນ
ແລະ ສົມກຽດ. ຈາກນັ້ນ ກໍໄດ້ມີການພົບປະສອງຝ່າຍຢ່າງເປັນທາງການລະຫວ່າງທ່ານ
ທອງສິງ ທຳມະວົງ ນາຍົກລັດຖະມົນແຫ່ງ ສປປ.ລາວ ແລະ ທ່ານ ຊິນໂຊ ອາເບະ ນາຍົກລັດຖະມົນຍີ່ປຸ່ນ
ໂດຍເຂົ້າຮ່ວມຂອງການນຳຂັ້ນສູງ ແລະ ພະນັກງານວິຊາການຂອງສອງປະເທດ.
ການພົບປະດັ່ງກ່າວໄດ້ມີຂຶ້ນໃນທ່າມກາງສາຍພົວພັນມິດຕະພາບ
ແລະ ຮ່ວມມືລະຫວ່າງ ສປປ ລາວ ແລະ ຍີ່ປຸ່ນທີ່ພວມໄດ້ຮັບການຂະຫຍາຍຕົວ ແລະ
ແຕກດອກອອກຜົນພ້ອມທັງເປັນການຜັນຂະຫຍາຍເນື້ອໃນຈິດໃຈ ແລະ ຄຳໝັ້ນສັນຍາຂອງການນຳສູງສຸດຂອງສອງປະເທດທີ່ໄດ້ຍົກລະດັບການຮ່ວມມືເປັນປະເທດຄູ່ຮ່ວມມືຮອບດ້ານເພື່ອສັນຕິພາບອັນຍາວນານ
ແລະ ຄວາມວັດທະນາຖາວອນຂອງຂົງເຂດ. ການພົບປະຄັ້ງນີ້, ສອງຝ່າຍໄດ້ສະຫລຸບຕີລາຄາການຮ່ວມມືໃນຂອບສອງຝ່າຍ
ແລະ ຫລາຍຝ່າຍໃນໄລຍະຜ່ານມາ ພ້ອມທັງປຶກສາຫາລືທິດທາງແຜນການຮ່ວມມືໃນຕໍ່ໜ້າເປັນຕົ້ນແມ່ນການສະ
ໜັບສະໜູນ ຊ່ວຍເຫລືອໃນການພັດທະນາເສດຖະກິດ-ສັງຄົມຂອງ ສປປ ລາວ ໂດຍຜ່ານການຊ່ວຍເຫລືອທາງການເພື່ອການພັດທະນາ
(ODA) ກໍຄືການອະນຸມັດຊ່ວຍເຫລືອ 4 ໂຄງການ ຄື ໂຄງການກູ້ຢືມດອກເບ້ຍຕ່ຳ ເພື່ອຫລຸດຜ່ອນຄວາມ
ທຸກຍາກ ( Poverty Reduction Support Operation Project ), ໂຄງການຂະຫຍາຍອາຄານໂດຍສານສະໜາມບິນສາກົນວັດໄຕໄລຍະ
3, ໂຄງການເກັບກູ້ລະເບີດທີ່ບໍ່ທັນແຕກ(UXO) ແລະ ໂຄງການອອກແບບກໍ່ສ້າງຂົວເຊກອງ ຊຶ່ງ 4
ເອ ກະສານແລກປ່ຽນດັ່ງກ່າວ ຈະມີການລົງນາມໃນໂອກາດຢ້ຽມຢາມ ແລະ ເຂົ້າຮ່ວມກອງປະຊຸມສຸດຍອດ
ອາຊຽນ-ຍີ່ປຸ່ນ ຢູ່ໂຕກຽວໃນຕົ້ນເດືອນທັນວາ 2013 ທີ່ຈະມາເຖິງນີ້ພ້ອມດ້ວຍການເຫັນດີທີ່ຈະອະນຸມັດໃຫ້ຊ່ຽວຊານເດີນທາງມາສຳຫລວດໂຄງ
ການກໍ່ສ້າງຂົວເຊກອງ ຊຶ່ງທັງໝົດນີ້ ເປັນໂຄງການທີ່ຝ່າຍລາວໄດ້ສະເໜີຕໍ່ຍີ່ປຸ່ນ
ໃນໂອກາດຢ້ຽມຢາມຍີ່ປຸ່ນ ຢ່າງເປັນທາງການຂອງນາຍົກ ລັດຖະມົນຕີ ແຫ່ງ ສປປ ລາວ
ໃນເດືອນມີນາ 2012 ຜ່ານມາ.ພ້ອມ ດຽວກັນນັ້ນ,ນາຍົກລັດຖະມົນຕີ ແຫ່ງ ສປປ ລາວ
ກໍໄດ້ຢືນຢັນການເຂົ້າຮ່ວມກອງປະຊຸມສຸດຍອດ ອາຊຽນ-ຍີ່ປຸ່ນ ແລະ ກອງປະຊຸມສຸດຍອດ
ແມ່ຂອງ-ຍີ່ປຸ່ນ ຢູ່ ໂຕກຽວ ແຕ່ວັນທີ 13-16 ທັນວາ 2013 ຕາມການເຊື້ອເຊີນຂອງນາ
ຍົກລັດຖະມົນຕີຍີ່ປຸ່ນ.
ນາຍົກລັດຖະມົນຕີທັງສອງປະເທດ ຍັງໄດ້ເປັນສັກຂີພະຍານ
ໃນການລົງນາມບົດບັນ ທຶກການຮ່ວມມືວ່າດ້ວຍການຮ່ວມມືໃນຂົງເຂດການຮັກສາສຸຂະພາບ
ຊຶ່ງທັງສອງຝ່າຍເຫັນດີສືບຕໍ່ປະຕິບັດໂຄງການແລກ ປ່ຽນເຄືອຂ່າຍສຳລັບນັກ ຮຽນ
ແລະ ຊາວໜຸ່ມຍີ່ປຸ່ນອາຊີຕາເວັນອອກ ໂດຍມີຜູ້ເຂົ້າຮ່ວມປະມານ 1.500 ຄົນໃນໄລຍະ
5 ປີຕໍ່ໜ້າ. ຝ່າຍລາວໄດ້ປະ ກາດຍົກເວັ້ນວິ ຊາລັດຖະການໃຫ້ແກ່ຍີ່ປຸ່ນ ເພື່ອເຮັດໃຫ້ການໄປມາຫາສູ່
ເຊິ່ງກັນ ແລະ ກັນ ໃຫ້ສະດວກຍິ່ງຂຶ້ນ. ພ້ອມນີ້ ສອງຝ່າຍໄດ້ຕົກລົງເຫັນດີຈະເປີດຫ້ອງການຜູ້ຕາງໜ້າອົງການການຄ້າສາກົນຍີ່ປຸ່ນ
ຢູ່ນະຄອນຫລວງວຽງຈັນໃນໄວໆນີ້.ສອງຝ່າຍຍິນດີທີ່ຈະປະສານງານ ແລະ ຮ່ວມມືກັນຢ່າງໃກ້ຊິດສ້າງກິດຈະກຳຕ່າງໆເພື່ອສົ່ງເສີມການພົວພັນຮ່ວມມືລະຫວ່າງ
ສອງປະເທດໃນໂອກາດສະເຫລີມ ສະຫລອງ 60 ປີ ແຫ່ງການສ້າງຕັ້ງສາຍພົວພັນທາງການທູດ
ລະຫວ່າງ ລາວ ແລະ ຍີ່ປຸ່ນ ໃນປີ 2015 ທີ່ຈະມາເຖິງນີ້ລວມທັງການແລກປ່ຽນການຢ້ຽມຢາມຂອງການນຳຂັ້ນສູງລະຫວ່າງ
ສອງປະເທດ.ນອກຈາກນັ້ນສອງ ຝ່າຍຍັງໄດ້ແລກປ່ຽນຄຳຄິດຄຳເຫັນກ່ຽວກັບບັນຫາທີ່ພົ້ນເດັ່ນຂອງສາກົນ
ແລະ ພາກພື້ນທີ່ສອງຝ່າຍສົນໃຈຮ່ວມກັນ.
ທ່ານ ທອງສິງ ທຳມະວົງ ນາຍົກລັດຖະມົນຕີແຫ່ງ
ສປ ປ ລາວ ໄດ້ຕາງໜ້າໃຫ້ລັດຖະ ບານ ແລະ ປະຊາຊົນລາວ ກ່າວ ສະແດງຄວາມຮູ້ບຸນຄຸນ
ແລະ ຂອບໃຈຢ່າງຈິງໃຈຕໍ່ການຊ່ວຍເຫລືອອັນມີປະສິດທິຜົນຂອງລັດຖະບານ ແລະ
ປະຊາ ຊົນຍີ່ປຸ່ນ ໃນການພັດທະນາພື້ນຖານໂຄງ ລ່າງເສດຖະກິດ ແລະ ສັງຄົມ ຕໍ່ ສປປ
ລາວ ໃນໄລຍະຜ່ານມາ. ພ້ອມທັງອວຍ ພອນໃຫ້ນາ ຍົກ ລັດຖະມົນຕີຍີ່ປຸ່ນ ມີພະລານາໄມສົມບູນ,ມີສຸຂະພາບເຂັ້ມແຂງ
ແລະ ປະສົບຜົນສຳເລັດໃນໜ້າທີ່ວຽກງານອັນສູງສົ່ງ ແລະ ຫວັງຢ່າງຍິ່ງວ່າ:ຈະໄດ້ພົບກັນອີກເທື່ອໜຶ່ງໃນໂອກາດເຂົ້າຮ່ວມກອງປະຊຸມສຸດຍອດ
ອາຊຽນ-ຍີ່ປຸ່ນ ຢູ່ໂຕກຽວໃນເດືອນທັນວາ 2013 ທີ່ຈະມາເຖິງນີ້.
ທ່ານ ຊິນໂຊ ອາເບະ ນາ ຍົກລັດຖະມົນຕີ ຍີ່ປຸ່ນ
ພ້ອມດ້ວຍຄະນະ ໄດ້ເດີນທາງກັບຄືນປະ ເທດ ໃນຕອນບ່າຍຂອງມື້ດຽວກັນ.
No comments:
Post a Comment