ຍີ່ປຸ່ນຢືນຢັນໃຫ້ການຊ່ວຍເຫລືອລາວຕໍ່ໄປ

      ທ່ານ ຮິໂຣຢຸກິ ຄິຊິໂນະ ເອກ ອັກຄະຣາຊາທູດຍີ່ປຸ່ນປະຈຳ ລາວ ກ່າວໃນໂອ ກາດການສະ​ເຫຼີມສະຫຼອງ​ວັນ​ຄ້າຍ​ວັນ​ປະ ສູດ ຄົບຮອບ 80 ພັນ​ສາ ຂອງ​ພະ​ເຈົ້າ​ຈັກກະພັດ ອາ​ກິ​ຮິ​ໂຕະ ທີ່​ກົງ​ກັບ​ວັນ​ທີ 23 ທັນວາ ຢູ່​ເຮືອນພັກ​ທ່ານ​ທູດ ນະຄອນ ຫຼວງວຽງຈັນ ວ່າ: ເພື່ອເປັນການສົ່ງເສີມການ ລົງທຶນ ແລະ ການພັດທະນາ ພວກ ເຮົາຈະສືບຕໍ່ຄວາມພະຍາຍາມໃນການສະໜັບ ສະໜູນລັດຖະບານລາວ ເພື່ອປັບ ປຸງສະພາບ ແວດລ້ອມທາງທຸລະກິດ ໂດຍ ແບ່ງປັນຄວາມຮູ້ ແລະ ປະສົບການລວມ ທັງ ຊ່ວຍປັບປຸງໂຄງ ລ່າງພື້ນຖານນຳອີກ. ໃນປີນີ້ໂຄງ ການຊ່ວຍເຫຼືອ ODA  ກໍມີການ ພັດທະນາດີຂຶ້ນ ພາຍຫຼັງຍີ່ປຸ່ນຕົກລົງ

ໃຫ້ການຊ່ວຍເຫຼືອຮູບແບບ ເງິນກູ້ດອກເບ້ຍຕ່ຳ ໃນປີ 2012 ແລະ ລັດຖະບານຍີ່ປຸ່ນໄດ້ເຊັນສັນ ຍາ 3 ໂຄງການກູ້ຢືມໃໝ່ຈຳ ນວນ 15 ຕື້ເຢນ ຫຼື ປະມານ 150 ລ້ານໂດລາສະຫະລັດ, ໂຄງການ ດັ່ງກ່າວ ລວມທັງການຜະລິດພະ ລັງງານໄຟຟ້າ, ການຂະ ຫຍາຍສະໜາມບິນ ແລະ ການຫຼຸດຜ່ອນຄວາມທຸກຍາກ. ນອກນັ້ນ, ຍັງມີໂຄງການຊ່ວຍເຫຼືອລ້າອີກ 2 ໂຄງການໄດ້ຖືກລົງ ນາມໃນ ເດືອນທັນວານີ້ ເພື່ອສະໜັບສະໜູນການພັດທະນາພື້ນຖານໂຄງລ່າງໃນລະດັບພາກພື້ນ ແລະ ການເກັບກູ້ລະເບີດຍັງ ບໍ່ທັນແຕກ, ພວກເຮົາເຊື່ອໜັ້ນວ່າ: ໂຄງການດັ່ງກ່າວຈະຊ່ວຍຊຸກຍູ້ ການພັດທະນາດ້ານເສດຖະກິດ ແລະ ສັງຄົມຂອງລາວ ແລະ ປະກອບສ່ວນສຳຄັນເຂົ້າໃນສາຍພົວພັນມິດຕະພາບ ແລະ ການຮ່ວມມືຂອງ ລາວ-ຍີ່ປຸ່ນ ໃຫ້ມີຄວາມເຂັ້ມແຂງເຖິງວ່າ ຈະຜ່ານການ ປ່ຽນແປງ ແລະ ຄວາມທ້າທາຍ ນັບບໍ່ຖ້ວນໃນຍຸກສະໄໝນີ້ ເພື່ອ ສະແດງອອກໃຫ້ເຫັນເຖິງຄວາມເຂັ້ມແຂງ ຂອງການເປັນຄູ່ຮ່ວມມືຮອບດ້ານທີ່ພວມເຕີບໃຫຍ່.

     ງານສະເຫຼີມສະຫຼອງສຳຄັນ ດັ່ງກ່າວ ໄດ້ຈັດຂຶ້ນໃນຕອນຄ່ຳ ຂອງວັນທີ 19 ທັນວານີ້ ໂດຍການໃຫ້ກຽດເຂົ້າຮ່ວມຂອງ ທ່ານ   ທອງລຸນ ສີສຸລິດ ຮອງນາຍົກ ລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແລະ ມີບັນດາທູດຕານຸ ທູດ ແລະ ຜູ້ຕາງໜ້າຈາກອົງການຈັດຕັ້ງສາກົນ ແລະ ການນຳຂັ້ນສູງຂອງລາວເຂົ້າຮ່ວມ.