ເກີດເຫດໃຊ້ມີດແທງກັນຈົນເສຍຊີວິດຫນຶ່ງຄົນ

           ເຈົ້າໜ້າທີ່ ປກສ ນະຄອນຫຼວງວຽງຈັນ ໃຫ້ຮູ້ວ່າ: ໃນເວລາປະມານ 5 ໂມງ ຂອງວັນທີ 20 ທັນວານີ້ ໄດ້ເກີດ ເຫດ ການໃຊ້ມີດແທງກັນຕາຍຢູ່ບ້ານໂພນຄໍ້ ເມືອງໄຊທານີ ນະຄອນຫຼວງວຽງຈັນ, ພາຍຫຼັງໄດ້ຮັບແຈ້ງທາງເຈົ້າໜ້າທີ່ພະແນກສືບ

ສວນ-ສອບສວນ ນະຄອນຫຼວງວຽງຈັນ ຈຶ່ງໄດ້ສົມທົບກັບພາກສ່ວນທີ່ກ່ຽວ ຂ້ອງລົງກວດສະຖານທີ່ເກີດເຫດ ແລະ ພົບວ່າຈຸດເກີດເຫດມີການປ່ຽນແປງເພາະ ສົບຜູ້ເສຍຊີວິດແມ່ນໄດ້ຖືກນຳສົ່ງໂຮງໝໍຕອນຖືກບາດເຈັບແຕ່ເສຍຊີວິດລະຫວ່າງ ທາງ ແລະ ສະຖານທີ່ເກີດເຫດກໍໄດ້ເຊັດລ້າງເກັບມ້ຽນ ແລ້ວ, ໃນເຮືອນວິນລາຊັ້ນ ດຽວປຸກສ້າງຍັງບໍ່ແລ້ວຂອງນາງ ວະນິດາ ເລືອດສົງຄາມ ອາຍຸ 50 ປີ, ຜູ້ເສຍຊີວິດຊື່ທ້າວ ພອນ ອາຍຸ 35 ປີ ຫວ່າງງານ ຢູ່ບ້ານ ໂພນຄໍ້ ເມືອງໄຊທານີ ນະຄອນຫຼວງວຽງຈັນ ເຊິ່ງຖືກແທງດ້ວຍມີດ ປາຍແຫຼມມີຄົມຕາມລຳຕົວ 4 ຈຸດ ໂດຍຜູ້ກໍ່ເຫດແມ່ນທ້າວ ເກດສະໜາ ຢູ່ບ້ານດຽວກັນ ເຊິ່ງພາຍ ຫຼັງກໍ່ເຫດຜູ້ກ່ຽວກໍໄດ້ເຂົ້າມອບຕົວກັບເຈົ້າໜ້າທີ່ ແລະ ຖືກຄຸມຕົວເພື່ອດຳເນີນຄະດີ.

    ຜ່ານການສືບສວນ-ສອບສວນ ຂອງເຈົ້າໜ້າທີ່ ໃຫ້ຮູ້ວ່າ: ທ້າວ ພອນ ຜູ້ເສຍຊີວິດ ໄດ້ສ້າງຄອບຄົວແລ້ວ ຢູ່ບ້ານໂພນຄໍ້ ເມືອງ ໄຊທານີ, ຕົກມາຮອດໄລຍະ ເດືອນສິງຫາ ປີ 2013 ເຫັນວ່າ ທ້າວ ພອນ ມີການເຄື່ອນໄຫວ ໄປມາຜິດປົກກະຕິ ແລະ ໄດ້ມີ ການພົວພັນແບບຊູ້ສາວກັບນາງ ເນດດາວ ອາຍຸ 17 ປີ ຄົນເຮືອນ ໃກ້ຄຽງ, ໃນເວລາປະມານ 22 ໂມງວັນທີ 19 ທັນວາ 2013 ທ້າວ ພອນ ໄດ້ມາຫານາງ ເນດດາວ ຢູ່ເຮືອນແລ້ວໄດ້ນອນນຳກັນຈົນຮອດເວລາປະມານ 3 ໂມງຂອງ ເຊົ້າວັນທີ 20 ທັນວານີ້ ຈຶ່ງໄດ້ ຍິນສຽງທ້າວ ເກດສະໜາ ຜູ້ເປັນ ອ້າຍຂອງນາງ ເນດດາວ ມາພົບ ຈຶ່ງເກີດມີປາກສຽງກັບ ທ້າວ ພອນ ຢ່າງ ຮຸນແຮງ ແລະ ທ້າວ ເກດສະໜາ ກໍໄດ້ໃຊ້ມີດແທງໃສ່ ທ້າວ ພອນ ຈົນໄດ້ຮັບບາດເຈັບຢ່າງໜັກກ່ອນຜູ້ກ່ຽວຈະແລ່ນອອກ ໄປຂໍຄວາມຊ່ວຍ ເຫຼືອນຳຊາວບ້ານ ແລະ ໄດ້ນຳຜູ້ກ່ຽວສົ່ງໂຮງໝໍ ແຕ່ທົນຕໍ່ຄວາມເຈັບປວດບໍ່ໄຫວ ຈຶ່ງເສຍຊີວິດໃນໄລຍະນຳສົ່ງໂຮງໝໍ.