ຫຼອກເປັນເຈົ້າໜ້າທີ່ເພື່ອຊີງຊັບ

       ໜ່ວຍງານສືບສວນ-ສອບສວນ ປກສ ເມືອງ ສີສັດຕະນາກ ນະຄອນຫຼວງວຽງຈັນ ໄດ້ ຈັດກຳລັງ ເຈົ້າໜ້າທີ່ຕິດຕາມ ຕົວຄົນຮ້າຍ ຢູ່ບ້ານ ສີເມືອງ ເມືອງ ສີສັດຕະນາກ ນະຄອນຫຼວງວຽງຈັນ ມາດຳເນີນຄະດີ ໃຫ້ໄດ້ຫຼັງກໍ່ເຫດອ້າງເປັນ ປກສ ບ້ານ ເຂົ້າຊ່ວຍປະຊາຊົນທີ່ເຮັດລົດລົ້ມກ່ອນຈະຊີງຊັບໄປ.

           ໃນວັນທີ 10 ທັນວາ 2013 ເຈົ້າໜ້າທີ່ ໄດ້ສະເໜີອອກຄຳສັ່ງກັກຕົວ ທ້າວ ສົມພານ ໄຊຍະວົງ ອາຍຸ 36 ປີ ຢູ່ບ້ານ ສີເມືອງ ເມືອງ ສີສັດຕະນາກ ນະຄອນຫຼວງວຽງຈັນ ເພື່ອເປີດກ້ວາງຂະຫຍາຍຜົນການດຳເນີນຄະດີ ແລະ ສືບສວນ-ສອບ ສວນ ໃນຂໍ້ຫາເຈດຕະນາຊີງຊັບພົນລະເມືອງ ແລະ ແອບອ້າງເປັນເຈົ້າໜ້າທີ່ຜ່ານການສືບສວນ-ສອບສວນ ຜູ້ຕ້ອງຫາໄດ້ຮັບ ສາລະພາບວ່າ: ໃນເວລາ ປະມານ 22 ໂມງ ຂອງວັນທີ 11 ຕຸລາ 2013 ຜ່ານ ມາຕົນ ເອງໄດ້ເຂົ້າໄປຊ່ວຍເຫຼືອ ທ້າວ ສີສຸພັນ ທີ່ເຮັດລົດຈັກລົ້ມຢູ່ຕໍ່ ໜ້າວັດສີເມືອງ ແລະ ໄດ້ຕົວະວ່າເປັນ ເຈົ້າໜ້າທີ່ ປກສ ບ້ານສີເມືອງ, ຈາກນັ້ນໄດ້ຂັບລົດຈັກໄປສົ່ງ ທ້າວ ສີສຸພັນ ພໍໄປຮອດເຄິ່ງທາງ ໄດ້ສົ່ງຜູ້ກ່ຽວເຂົ້າໄປ ນອນຢູ່ເຮືອພັກ ແລະ  ພາຍຫຼັງ ທ້າວ ສີສຸພັນ ນອນຫຼັບ ແລ້ວຕົນເອງ ກໍໄດ້ສວຍໂອກາດລັກເອົາເງີນ ແລະ ຊັບ ສິນຈຳນວນໜຶ່ງ ພ້ອມທັງລົດຈັກແລ້ວຫຼົບໜີໄປ,  ກ່ອນຈະຖືກເຈົ້າໜ້າທີ່ຈັບຕົວ

ມາດຳເນີນຄະດີທ່ານ ພັນໂທ ທອງ ສະຫວັດ ແສນສຸວາດ ຮອງກອງບັນຊາການ ປກສ ເມືອງສີສັດຕະນາກ ມີຄຳເຫັນຕໍ່ຄະ ດີດັ່ງກ່າວວ່າ: ພາຍຫຼັງ ເຈົ້າໜ້າທີ່ໄດ້ຮັບແຈ້ງກໍໄດ້ພະຍາຍາມຕິດຕາມຈັບຕົວຄົນຮ້າຍມາດຳເນີນຄະດີ ແລະ ຮູ້ໄດ້ຕົວຜູ້ຕ້ອງ ສົງໄສ ຄື ທ້າວ ສົມພານ ຊຶ່ງຜູ້ຕ້ອງຫາດັ່ງກ່າວເຄີຍຖືກດຳເນີນຄະດີ ຢູ່ ປກສ ເມືອງ ໄຊເສດຖາ 1 ຄັ້ງ ໃນຂໍ້ຫາລັກຊັບພົນ ລະເມືອງ, ນອກຈາກນີ້ ຜູ້ຕ້ອງຫາກໍເຄີຍຮ່ວມກັບໝູ່ກໍ່ເຫດລັກຊັບຂອງພົນລະເມືອງ ຢູ່ເຂດ ເມືອງສີສັດຕະນາກ ມາແລ້ວ ຫຼາຍຄັ້ງ ກ່ອນຈະຖືກເຈົ້າໜ້າທີ່ກັກຕົວພ້ອມທັງເກັບກູ້ຊັບໄດ້ຈຳນວນໜຶ່ງ, ຊຶ່ງໃນວັນທີ 21 ມັງກອນນີ້ ຢູ່ ກອງບັນຊາການ ປກສ ເມືອງສີສັດຕະນາກ ທາງເຈົ້າໜ້າທີ່ກໍໄດ້ຮ້ອງ ທ້າວ ສີສຸພັນ ເຂົ້າມາຮັບເອົາຊັບສິນຂອງຕົນເອງທີ່ເຈົ້າໜ້າທີ່ສາມາດເກັບ ກູ້ມາໄດ້ ແລະ ສົ່ງມອບ.