ໃນການຈັດປະຕິບັດແຜນພັດທະນາຊົນນະບົດ ແລະ ລຶບລ້າງຄວາມທຸກຍາກ
5 ປີ (2011- 2015) ໃນການແກ້ໄຂບ້ານ ທຸກຍາກໃຫ້ຍັງເຫລືອບໍ່ເກີນ 11% ແລະ ການສ້າງບ້ານພັດທະນາໃຫ້ກວມຫລາຍກວ່າ
50% ຂອງຈຳນວນບ້ານໃນທົ່ວປະ ເທດທີ່ທາງລັດຖະບານໄດ້ວາງຄາດໝາຍສູ້ຊົນໃຫ້ໄດ້ຕາມເປົ້າໝາຍ
ໃນປີ 2015.
ອິງຕາມບົດຕີລາຄາການຈັດຕັ້ງປະຕິບັດຄາດໝາຍສູ້ຊົນ
ຂອງແຜນການພັດທະນາຊົນນະບົດ ແລະ ລຶບລ້າງຄວາມທຸກ ຍາກທີ່ສະເໜີໂດຍຫ້ອງແຜນການ ແລະ ພົວພັນຕ່າງປະເທດຄະນະພັດທະນາຊົນນະບົດ
ແລະ ລຶບລ້າງຄວາມທຸກຍາກ (ຄພທສ) ໃນກອງປະຊຸມ ຄພທສ ຮ່ວມກັບກອງທຶນຫລຸດຜ່ອນຄວາມທຸກຍາກ
(ທລຍ 2) ໃນທ້າຍເດືອນມັງກອນທີ່ຜ່ານມາໃຫ້ຮູ້ວ່າ: ໃນ ຕົ້ນສະໄໝມີບ້ານທຸກຍາກ ຈຳນວນ
3216 ບ້ານກວມ 37,16 % ລັດຖະບານໄດ້ວາງຄາດໝາຍສູ້ຊົນ ໃນທ້າຍສະໄໝໃຫ້ຍັງເຫລືອບໍ່ເກີນ
960 ບ້ານ 11%. ມາຮອດໄລຍະເຄີ່ງສະໄໝໃນປີ 2013 ນີ້ ຍັງມີບ້ານທຸກຍາກ 2.289 ບ້ານ ກວມ
26,70%, ສະແດງວ່າທຽບ ໃສ່ຕົ້ນສະໄໝມີ 886 ບ້ານໄດ້ພົ້ນທຸກ ຫລື ວ່າບ້ານທຸກຍາກໄດ້ຫລຸດລົງ
10% ເວົ້າລວມແລ້ວ ໃນເຄິ່ງສະໄໝຜ່ານມານີ້, ອັດຕາຄວາມທຸກຍາກຫລຸດລົງປະມານ 4-5% ຕໍ່ປີ ຊຶ່ງເກີນຄາດໝາຍທີ່ວາງໄວ້
ໃນແຕ່ລະປີທີ່ສະແດງໃຫ້ເຫັນວ່າຄອບຄົວທຸກຍາກ ແລະ ບ້ານທຸກຍາກໄດ້ຫລຸດລົງຢ່າງສົມສ່ວນກັນຄືແຕ່
ປີ 2011-2012, ຄອບຄົວທຸກຍາກໄດ້ຫລຸດລົງ 6% ແລະ ບ້ານທຸກຍາກຫລຸດລົງປະມານ 7%, ປີ
2012-2013 ຄອບຄົວທຸກຍາກໄດ້ຫລຸດ ລົງ 2,7% ສ່ວນບ້ານທຸກຍາກຫລຸດລົງ 3,4%. ສຳລັບວຽກງານການສ້າງບ້ານພົ້ນທຸກນະຄອນຫລວງວຽງຈັນ
ແມ່ນບໍ່ມີ, ແຂວງທີ່ມີອັດຕາສ່ວນບ້ານທຸກຍາກຕ່ຳກວ່າ 10% ມີຄື: ແຂວງ ຈຳປາສັກ, ໄຊຍະບູລີ,
ວຽງຈັນ ແລະ ຄຳມ່ວນ, ສ່ວນອີກ 2 ແຂວງຄື: ບໍລິຄຳໄຊ ແລະ ສາລາວັນ ນີ້ມີອັດຕາສ່ວນບ້ານທຸກ
ຍາກຕ່ຳກວ່າ 20%, ອັດຕາຄວາມທຸກຍາກຍັງສູງຫລາຍຕັ້ງແຕ່ 21% ເຖິງ 40% ລວມມີ ແຂວງອຸດົມໄຊ,
ຜົ້ງສາລີ, ຫົວພັນ, ອັດຕະປື ແລະ ເຊກອງ. ໃນເຄິ່ງສະໄໝຜ່ານມາຈຳນວນ ເມືອງທຸກຍາກໄດ້ຫລຸດລົງ
16 ເມືອງ, ຈາກ 53 ເມືອງໃນປີ 2011, ຍັງພຽງ 37 ເມືອງໃນປີ 2013.
ສຳລັບການສ້າງບ້ານພັດທະນາລັດຖະບານໄດ້ວາງຄາດຮອດປີ
2015 ຕ້ອງສ້າງໃຫ້ໄດ້ຫລາຍກວ່າເຄິ່ງໜຶ່ງຂອງຈຳນວນບ້ານທັງໝົດໃນທົ່ວປະເທດ.
ໃນປີ 2013 ໄດ້ມີບ້ານທີ່ປະກາດໃຫ້ເປັນບ້ານພັດທະນາໃນທົ່ວປະເທດລວມມີ
2.353 ບ້ານກວມເອົາ 27,45% ຂອງຈຳນວນບ້ານທັງໝົດ. ທຽບໃສ່ຕົ້ນສະໄໝແມ່ນເພິ່ມຂຶ້ນ
1.471 ບ້ານເທົ່າ 17,26%. ອັດຕາສ່ວນບ້ານທຸກຍາກ ໃນປີ 2013 ຊຶ່ງແມ່ນໄລຍະກາງສະໄໝເກືອບເທົ່າກັບອັດຕາສ່ວນບ້ານພັດທະນາຄື
26,7% ຫລື 2.267 ບ້ານ ກັບ 27,45% ຫລື 2.353 ບ້ານ, ສ່ວນບ້ານພົ້ນທຸກທີ່ຍັງບໍ່ທັນໄດ້ເປັນບ້ານພັດທະນາມີຈຳນວນ
3.933 ບ້ານ ເທົ່າ 45,75%, ອັດຕາສ່ວນດັ່ງກ່າວສະແດງໃຫ້ເຫັນວ່າການສ້າງບ້ານພັດທະນາໃຫ້ກວມຫລາຍກວ່າ
50% ຂອງຈຳນວນ 8.573 ບ້ານໃນທົ່ວປະເທດໃນປີ 2015 ຈະສາມາດບັນລຸໄດ້ຕາມຄາດໝາຍທີ່ວາງໄວ້.
ອັນຕາສ່ວນບ້ານທຸກຍາກຫລຸດລົງກໍຍ້ອນວ່າມີຫລາຍເງື່ອນໄຂທີ່ເອື້ອອຳນວຍໂດຍໄດ້ມີບ້ານນ້ອຍ
ແລະ ບ້ານທີ່ບໍ່ທັນໄດ້ມີການຈັດສັນໃຫ້ມີຄວາມໝັ້ນຄົງຈຳນວນປະມານ 1.100 ບ້ານ,
ຖ້າວ່ານະໂຍບາຍການຈັດສັນພູມລຳເນົາຄົງທີ່ບ່ອນທຳມາຫາກິນຖາວອນໄດ້ຮັບການຈັດຕັ້ງປະຕິບັດຕາມແຜນທີ່ວາງໄວ້ຈະເປັນການຍູ້ແຮງຂະບວນການສ້າງບ້ານພົ້ນທຸກ
ແລະ ສ້າງບ້ານໃຫ້ກາຍເປັນຫົວໜ່ວຍພັດທະນາ ແລະ ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ.
ແຂວງທີ່ບັນລຸຄາດໝາຍສ້າງບ້ານພັດທະນາໄດ້ເຄິ່ງໜຶ່ງຂອງຈຳນວນບ້ານໃນທົ່ວແຂວງລວມ
ມີ 4 ແຂວງຄື: ນະຄອນຫລວງວຽງຈັນ, ແຂວງໄຊຍະບູລີ, ບໍລິຄຳໄຊ ແລະ ຈຳປາສັກ, ສ່ວນອີກ
7 ແຂວງສາມາດບັນລຸ 25% ຂຶ້ນໄປຄື: ແຂວງ ຫລວງນ້ຳທາ, ບໍ່ແກ້ວ, ຫລວງພະບາງ, ຊຽງຂວາງ,
ວຽງຈັນ, ຄຳມ່ວນ ແລະ ອັດຕະປື. ນອກນັ້ນ ການສ້າງຄອບຄົວພັດທະນາຊຶ່ງເປັນໜຶ່ງໃນເງື່ອນໄຂຂອງບ້ານພັດທະນາກໍໄດ້ຮັບການຊຸກຍູ້ສົ່ງເສີມຢ່າງຕັ້ງໜ້າເຮັດໃຫ້ເຄິ່ງສະໄໝຜ່ານມາຄອບຄົວພັດທະນາໄດ້ເພີ່ມຂຶ້ນຈາກ
495.626 ຄອບຄົວ ກວມ 47,05% ມາເປັນ 724.792 ຄອບ ຄົວ ເທົ່າກັບ 65,60% ຜົນສຳເລັດທັງໝົດດັ່ງກ່າວໄດ້ຢືນຢັນຕື່ມອີກເຖິງຄວາມເປັນໄປໄດ້ທີ່ຈະບັນລຸຄາດໝາຍສູ້ຊົນສ້າງ
ບ້ານພັດທະນາໃຫ້ໄດ້ 50% ຂອງຈຳນວນບ້ານໃນທົ່ວປະເທດໃນທ້າຍສະໄໝ.
No comments:
Post a Comment