ສະພາບລັກລົດຈະແກ້ໄຂແນວໃດ ເບິ່ງນັບມື້ຮ້າຍແຮງ ?

      ປັດຈຸບັນ ສະພາບລົດເສຍຍ້ອນການຂີ້ລັກຂອງພວກມືກາວ, ເບິ່ງຄືວ່ານັບມື້ຍິ່ງຮ້າຍແຮງ, ໂດຍສະເພາະຢູ່ນະຄອນ ຫລວງວຽງຈັນ. ຊຶ່ງຕາມການລາຍງານຂອງເຈົ້າຫນ້າທີ່ໃຫ້ຮູ້ວ່າ: ພຽງປີ 2013 ຜ່ານມາ, ຢູ່ນະຄອນຫລວງວຽງຈັນ ມີລົດ ເສຍຫາຍຫລາຍກ່ວາ 300 ຄັນ, ທຽບໃສ່ປີ 2012 ເພີ່ມຂຶ້ນ 100 ກ່ວາຄັນ, ໃນນັ້ນເຈົ້າຫນ້າທີ່ສາມາດ ເກັບກູ້ຄືນໄດ້ພຽງ ສ່ວນໜ້ອຍເທົ່ານັ້ນ, ລົດຈັກທີ່ເສຍຫາຍສ່ວນຫລາຍຈະແມ່ນປະເພດລົດທີ່ມີລາຄາແພງ ແລະ ມີຄວາມນິຍົມກັນໃນສັງ ຄົມຄື: ລົດປະເພດຮອນດາເວບ, ຢາມາຮາຟີໂນ ແລະ ອື່ນໆທີ່ສາມາດຈຳຫນ່າຍໄດ້ງ່າຍ.     

       ເຈົ້າຫນ້າທີ່ໃຫ້ຮູ້ວ່າ: ສາເຫດສ່ວນໃຫຍ່ທີພາໃຫ້ເກີດມີສະພາບຂີ້ລັກດັ່ງກ່າວແມ່ນເນື່ອງມາຈາກສອງສາເຫດຫລັກຄື: ຫນຶ່ງແມ່ນຍ້ອນກຳລັງເຈົ້າຫນ້າທີ່ຢູ່ຫລາຍທ້ອງຖິ່ນບໍ່ສາມາດຄວບຄຸມພາຫະນະໃນເຂດຄວາມຮັບຜິດຊອບຂອງຕົນໄດ້, ລົດບໍ່ ຕິດປ້າຍ ທະບຽນຍັງສັນຈອນໄປມາມີຫລາຍຍ້ອນການກວດກາຂອງຫນ່ວຍງານທະບຽນລົດບໍທັນເຂັ້ມງວດ, ຊຶ່ງເປັນຊ່ອງ

ຫວ່າງຫນຶ່ງໃຫ້ແກ່ການຊື້ຂາຍລົດເຖື່ອນມີຂຶ້ນ, ສາເຫດທີ່ສອງແມ່ນມາຈາກສະພາບສັງຄົມ, ໂດຍສະເພາະແມ່ນບັນຫາຢາ ເສບຕິດ, ການມົ້ວສຸມຫລິ້ນກິນຟູມເຟືອຍຊຶ່ງຈຳເປັນຕ້ອງການເງິນມາໃຊ້ຈ່າຍ ແລະ ອີກອັນຫນຶ່ງກໍມາຈາກການບໍ່ມີວຽກ ເຮັດງານທຳຂອງໄວຫນຸ່ມໄດ້ປະກົດມີຂຶ້ນຫລາຍ.

       ແຕ່ເພື່ອຢາກແກ້ໄຂບັນຫາດັ່ງກ່າວຊຶ່ງກ່ອນອື່ນຫມົດກໍແມ່ນເບື້ອງເຈົ້າຫນ້າທີ່ຈະລາຈອນ, ຕ້ອງມີຄວາມເຂັ້ມງວດໃນ ການກວດຂັນ, ຂະແຫນງຄົມມະນາຄົມຕ້ອງເອົາໃຈໃສ່ຕື່ມອີກໃນການຄຸ້ມຄອງ ແລະ ການຂຶ້ນທະບຽນພາຫະນະ, ຈາກນັ້ນ ກໍແມ່ນເບື້ອງສັງຄົມຈະຕ້ອງໄດ້ເພີ່ມທະວີເຮັດວຽກງານໂຄສະນາສຶກສາອົບຮົມຊາວຫນຸ່ມໃຫ້ຫນີໄກຈາກສິ່ງເສບຕິດ, ຕ້ານ ປະກົດການຫຍໍ້ທໍ້ໃຫ້ແຂງແຮງກ່ວາເກົ່າ ພ້ອມນັ້ນກໍຈະຕ້ອງໄດ້ເອົາໃຈໃສ່ການສ້າງວຽກເຮັດງານທຳໃນຫມູ່ຊາວຫນຸ່ມໄວຫນຸ່ມ ໃຫ້ກວ້າງຂວາງດ້ວຍວິທີການທີ່ເຫມາະສົມໃນການຍົກສູງວິຊາຊີບໃຫ້ເຂົາເຈົ້າ.