ອັກຄີໄພຍັງສືບຕໍ່ເກີດຂຶ້ນ.

          ເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ມອດໄຟ ນະຄອນຫຼວງວຽງຈັນ ໃຫ້ຮູ້ວ່າ: ໃນອາທິດຜ່ານມາຢູ່ນະ ຄອນຫຼວງວຽງຈັນ ມີສະພາບອັກຄີໄພເກີດຂຶ້ນ 3 ຄັ້ງຄື: ໃນວັນທີ 19 ກຸມພາ ໄດ້ເກີດເຫດໄຟໄໝ້ກຸດຕິຢູ່ວັດນາຊອນ ບ້ານນາຊອນ ເມືອງນາຊາຍທອງ ນະຄອນຫຼວງວວຽງຈັນ ເຮັດໃຫ້ກຸດຕິ 1 ຫຼັງເສຍຫາຍ ມູນຄ່າ 300 ລ້ານກີບ, ໃນວັນທີ 22 ກຸມພາ ກໍເກີດເຫດໄຟໄໝ້ເຮືອນຂອງປະຊາຊົນຢູ່ບ້ານສວນມອນ ເມືອງສີສັດຕະນາກ ນະຄອນຫຼວງວຽງຈັນ ໂດຍມີ ເຮືອນ 2 ຫຼັງໄດ້ຮັບຄວາມເສຍຫາຍ ແລະ ໃນວັນທີ 24 ກຸມພານີ້ ໄດ້ມີເຫດໄຟໄໝ້ເຮືອນຂອງປະຊາຊົນຢູ່ບ້ານດົງປ່າແຫຼບ ເມືອງ ຈັນທະບູລີນະຄອນຫຼວງວຽງຈັນ ເຮັດໃຫ້ເຮືອນຄົວ 1 ຫ້ອງໄດ້ຮັບຄວາມເສຍຫາຍໂດຍເຈົ້າໜ້າທີ່ໃຫ້ຮູ້ວ່າ: ສາເຫດສ່ວນໃຫຍ່ ແມ່ນເກີດມາຈາກໄຟຟ້າລັດວົງຈອນ.

          ໃນປີຜ່ານມາ ຢູ່ນະຄອນຫຼວງວຽງຈັນ ມີອັກຄີໄພເກີດຂື້ນ 67 ຄັ້ງມີ: ເຮືອນ 8 ຫຼັງ, ຫ້ອງເຄື່ອງ 13 ຫ້ອງ, ຮ້ານ ຂາຍເຄື່ອງ 30 ຮ້ານ, ລົດຈັກ 7 ຄັນ, ລົດໃຫຍ່ 2 ຄັນ, ກອງໄມ້ 11 ກອງ ແລະ ຊັບສິນອື່ນໆຖືກໄຟໄໝ້ລວມມູນຄ່າເສຍຫາຍ 37 ຕື້ກວ່າກີບ.