ກອງປະຊຸມລັດຖະບານສະໄໝສາມັນປະຈຳເດືອນມີນາ 2014 ພິຈາລະນາຫຼາຍບັນຫາສຳຄັນ.

        ໂດຍການເປັນປະທານຂອງ ທ່ານ ທອງສິງ ທໍາມະວົງ ນາຍົກລັດຖະມົນຕີ, ໃນວັນທີ 20-21 ມີນານີ້ ກອງປະຊຸມ ລັດຖະບານສະໄໝສາມັນປະຈຳເດືອນມີນາ 2014 ໄດ້ໄຂຂຶ້ນ ຢ່າງເປັນທາງການຢູ່ທີ່ຫ້ອງວ່າການລັດຖະບານ,  ພິຈາລະນາ ແລະ ຮັບຮອງເອົາວຽກງານ ແລະ ນິຕິກຳທີ່ສຳຄັນຈຳນວນໜຶ່ງຄື:   

          1. ກອງປະຊຸມໄດ້ພິຈາລະນາ ແລະ ຮັບຮອງດ້ານຫຼັກການ ກ່ຽວກັບແຜນດຳເນີນ ງານແຫ່ງຊາດວ່າດ້ວຍການປ້ອງກັນ ແລະ ລຶບລ້າງການໃຊ້ຄວາມຮຸນແຮງຕໍ່ເພດຍິງ ແລະ ເດັກນ້ອຍໃນ ສປປ ລາວ 2014-2020 ຊຶ່ງເນື້ອໃນແຜນງານດັ່ງກ່າວ ປະກອບມີ 3 ແຜນ ງານຄື: 1). ແຜນງານທົບທວນນະໂຍບາຍ ແລະ ນິຕິກຳ, ສ້າງຖານຂໍ້ມູນສະຖິຕິ ແລະ ສຶກສາ ຄົ້ນຄວ້າ. 2). ແຜນງານປ້ອງກັນບໍ່ໃຫ້ເກີດຄວາມຮຸນແຮງຕໍ່ແມ່ຍິງ ແລະ ເດັກ. 3). ແຜນງານແກ້ໄຂຄວາມຮຸນແຮງຕໍ່ແມ່ຍິງ ແລະ ເດັກ. ທັງໝົດນີ້ເພື່ອປະຕິບັດຕາມວິໄສທັດທີ່ວ່າ: “ສ້າງສັງຄົມທີ່ສິດສະເໝີພາບຍິງ-ຊາຍແລະປາສະຈາກທຸກຮູບການ

ຈຳແນກບົນພື້ນ ຖານທາງເພດ ຊຶ່ງປົກປ້ອງທາງສັງຄົມໂດຍສະເພາະແມ່ຍິງ ແລະ ເດັກນ້ອຍຈາກຄວາມຮຸນແຮງ ແລະ ການ ຂູດຮີດທຸກຮູບ ການ”.   

         2. ບົດລາຍງານການແຜ່ລະບາດຂອງພະຍາດຕິດຕໍ່ທີ່ເກີດຂຶ້ນໃນເດືອນມີນາ 2014 ເປັນຕົ້ນ ພະຍາດໄຂ້ຫວັດສັດປີກ (H7N9, H5N1)  ແລະ ໄຂ້ຍຸງລາຍ ທີ່ກໍາລັງລະບາດຢູ່ພາກພື້ນ ແລະ ສປປ ລາວ. ຕໍ່ບັນຫາດັ່ງກ່າວ ກອງປະ ຊຸມໄດ້ຊີ້ນໍາ
ໃຫ້ກະຊວງສາທາລະນະສຸກຮ່າງຄໍາສັ່ງຂອງທ່ານ ນາຍົກລັດຖະມົນຕີໃຫ້ໄວເພື່ອໃຫ້ອົງການປົກຄອງທ້ອງຖິ່ນ, ອົງ ການຈັດ ຕັ້ງມະຫາຊົນ, ທຸກພາກສ່ວນເຂົ້າຮ່ວມດໍາເນີນການໃຫ້ໄວ. ພ້ອມດຽວກັນນັ້ນ, ກໍ່ໃຫ້ປຸກລະດົມ ແລະ ສ້າງຂະບວນການໃຫ້ ທຸກພາກສ່ວນຂອງສັງຄົມເຂົ້າຮ່ວມກໍາຈັດແຫຼ່ງເພາະພັນຂອງຍຸງລາຍ. ລວມທັງຖອດຖອນບົດຮຽນ ແລະ ເຜີຍແຜ່ ໃຫ້ທັນ ກັບສະພາບການເພື່ອປ້ອງກັນ ແລະ ເຝົ້າລະວັງ.    

         3. ສໍາຄັນອີກບັນຫາໜຶ່ງ, ກອງປະຊຸມໄດ້ປະກອບຄໍາເຫັນດ້ວຍຄວາມຮັບຜິດຊອບສູງ ແລະ ຮັບຮອງດ້ານຫຼັກການ ຕໍ່ຮ່າງຄຳສັ່ງຂອງທ່ານນາຍົກລັດຖະມົນຕີວ່າດ້ວຍການຈັດຕັ້ງປະຕິບັດດໍາລັດວ່າດ້ວຍການປະຢັດ ແລະ ຕ້ານການຟຸມເຟືອຍ ຈຸດປະສົງ ເພື່ອເພີ່ມເຕີມ ແລະ ອະທິບາຍບາງເນື້ອໃນທີ່ບໍ່ທັນຈະແຈ້ງໃນນິຕິກຳທີ່ໄດ້ປະກາດໃຊ້ໃນໄລຍະຜ່ານມາ. ພ້ອມນັ້ນ, ກອງປະຊຸມຍັງໄດ້ຊີ້ນຳໃຫ້ພາກສ່ວນທີ່ກ່ຽວຂ້ອງນຳໄປປັບປຸງບາງມາດຕາ ແລະ ບາງເນື້ອໃນຂອງນິຕິກຳທີ່ປະກາດໃຊ້ໃນໄລ ຍະຜ່ານມາໃຫ້ຮັດກຸມ, ຈະແຈ້ງ ແລະ ສາມາດຈັດຕັ້ງປະຕິບັດໄດ້ຢ່າງເຂັ້ມງວດ.

          4. ກອງປະຊຸມໄດ້ພິຈາລະນາ ແລະ ເຫັນດີຮັບຮອງຮ່າງຂໍ້ ຕົກລົງຂອງລັດຖະບານວ່າດ້ວຍການກຳນົດອັດຕາສ່ວນ ຄັງສະສົມແຫ່ງລັດເປັນເງິນ, ເປັນວັດຖຸ, ສິນຄ້າສະສົມແຫ່ງລັດ, ການແບ່ງຄວາມຮັບຜິດຊອບຂອງບັນດາກະຊວງ ແລະ ການສະສົມເຂົ້າສານ, ອັນນີ້ເພື່ອຈັດຕັ້ງຜັນຂະຫຍາຍດໍາລັດວ່າດ້ວຍຄັງສະສົມແຫ່ງລັດ, ຈຸດປະສົງເພື່ອໃຫ້ ການປະຕິບັດມີ ຄວາມເປັນເອກະພາບ, ມີປະສິດທິພາບຖືກຕ້ອງ ແລະ ສອດຄ່ອງກັບລະບຽບກົດໝາຍແນໃສ່ຕອບສະໜອງຄວາມຮຽກຮ້ອງ ຕ້ອງການອັນຮີບດ່ວນ, ສຸກເສີນໃຫ້ແກ່ວຽກງານປ້ອງກັນ, ຕ້ານ ແລະ ຟື້ນຟູຜົນກະທົບຈາກໄພພິບັດ ແລະ ປະກອບ ສ່ວນດັດສົມຕະຫຼາດໃຫ້ມີຄວາມໝັ້ນທ່ຽງ, ປະກອບສ່ວນເຂົ້າໃນວຽກງານປ້ອງກັນຊາດ, ປ້ອງກັນຄວາມສະຫງົບແນໃສ່ຮັບ ປະກັນສະຖຽນລະພາບທາງດ້ານເສດຖະກິດ. ສ້າງເງື່ອນໄຂເອື້ອອຳນວຍແກ່ການຈັດຕັ້ງປະຕິບັດແຜນພັດທະນາເສດຖະກິດ -ສັງຄົມຂອງລັດຖະບານໃຫ້ບັນລຸຄາດໝາຍທີ່ກຳນົດໄວ້.  

         5. ສໍາລັບຮ່າງດຳລັດວ່າດ້ວຍຮູບເງົາກອງປະຊຸມເຫັນດີດ້ານຫຼັກການຮັບຮອງເອົາ ຊຶ່ງຈຸດປະສົງຂອງຮ່າງດຳລັດສະບັບ ນີ້ ໄດ້ກຳນົດຫຼັກການ, ລະບຽບການ ແລະ ມາດຕະການກ່ຽວກັບການຄຸ້ມຄອງ, ກວດກາ, ການຈັດຕັ້ງ ແລະ ການເຄື່ອນ ໄຫວວຽກງານຮູບເງົາໃຫ້ເປັນເອກະພາບໃນຂອບເຂດທົ່ວປະເທດໃນການປົກປັກຮັກສາ ແລະ ສົ່ງເສີມມູນມໍລະດົກທາງດ້ານ ວັດທະນະທຳອັນດີງາມຂອງຊາດ ແລະ ຂອງບັນດາເຜົ່າໃຫ້ຍືນຍົງຕະຫຼອດໄປ.   

      ນອກນັ້ນ, ກອງປະຊຸມຍັງໄດ້ປຶກສາຫາລືປະກອບຄໍາເຫັນຢ່າງກົງໄປກົງມາດ້ວຍຄວາມຮັບຜິດຊອບສູງຕໍ່ບົດລາຍງານຜົນ ການຄົ້ນຄວ້າປັບປຸງລະບົບເງິນເດືອນ, ເງິນນະໂຍບາຍ ແລະ ເງິນອຸດໜູນຂອງພະນັກງານລັດຖະກອນ; ການປັບປຸງ ດຳລັດວ່າ ດ້ວຍການສຳຫຼວດວັດແທກ, ໃຫ້ແທດເໝາະກັບເງື່ອນໄຂ ແລະ ສະພາບຕົວຈິງຂອງການເຕີບໃຫຍ່ການພັດທະນາເສດ ຖະກິດ-ສັງຄົມຂອງຊາດ.    

           ຕອນທ້າຍກອງປະຊຸມ ທ່ານນາຍົກລັດຖະມົນຕີໄດ້ຊີ້ນໍາໃຫ້ສະມາຊິກລັດຖະບານນໍາເອົາເນື້ອໃນທີ່ໄດ້ຕົກລົງເປັນ ເອກະພາບລວມທັງບັນດາວຽກງານທີ່ເປັນຈຸດສຸມເດືອນເມສາ 2014 ໄປຈັດຕັ້ງຜັນຂະຫຍາຍ ແລະ ປະຕິບັດດ້ວຍຄວາມ ຮັບຜິດຊອບຢ່າງເອົາການເອົາງານ ແລະ ໃຫ້ໄດ້ຮັບຜົນສໍາເລັດດ້ານປະລິມານ ແລະ ຄຸນນະພາບເປັນຕົ້ນ: ຈັດຕັ້ງນຳພາການ ເກັບລາຍຮັບເຂົ້າງົບປະມານໃຫ້ໄດ້ຕາມຄາດໝາຍ, ກ່ຽວຂ້ອງຕ້ອງມີຄວາມຮັບຜິດຊອບຕໍ່ການເບີກຈ່າຍເງິນເດືອນ, ເງິນບໍລິ ຫານໃຫ້ທັນເວລາ ແລະ ໃຫ້ກະຊວງກະສິກຳ ແລະ ປ່າໄມ້ ແລະ ກະຊວງອຸດສາຫະກຳ ແລະ ການຄ້າຍູ້ແຮງການ ເກັບກ່ຽວ ເຂົ້ານາແຊງ ແລະ ພືດລະດູແລ້ງໃຫ້ໄດ້ຮັບຜົນດີ, ຮີບຮ້ອນແກ້ໄຂພະຍາດໄຂ້ຫວັດສັດປີກທີ່ກວດພົບໃນສັດປີກຢູ່ແຂວງ ໄຊຍະບູລີ, ເດັດຂາດບໍ່ໃຫ້ແຜ່ລະບາດໄປບ່ອນອື່ນ ແລະ ມີມາດຕະການແກ້ໄຂແຕ່ຫົວທີກ່ຽວກັບພະຍາດໄຂ້ຍູງລາຍ.   

       ພ້ອມນັ້ນກໍໃຫ້ຮີບຮ້ອນກວດກາ ແລະ ແກ້ໄຂການຍົກຍ້າຍຂອງປະຊາຊົນມາຢູ່ແຂວງໄຊສົມບູນ ແລະ ແຂວງບໍລິຄຳໄຊ ແບບຊະຊາຍໃຫ້ມີຄວາມສະຫງົບ, ສືບຕໍ່ລົງຊ່ວຍແຂວງ, ເມືອງສ້າງຕັ້ງໃໝ່ໂດຍຕິດພັນກັບການຍູ້ແຮງວຽກງານເຮັດທົດລອງ 3 ສ້າງ ແລະ ເອົາໃຈໃສ່ຈັດຕັ້ງຫຼິ້ນບຸນປີ ໃໝ່ລາວ ພສ 2557 ໃຫ້ມີບັນຍາກາດເບີກບານມ່ວນຊື່ນ, ຖືກຕ້ອງຕາມຮີດຄອງ ປະເພນີ ແລະ ດ້ວຍຈິດໃຈປະຢັດມັດທະຍັດບໍໍ່ນຳໃຊ້ງົບປະມານຂອງລັດຈັດງານລ້ຽງ ແລະ ນຳໃຊ້ລົດລັດໄປ ທ່ອງທ່ຽວຫຼິ້ນ ກິນຢ່າງຟຸມເຟືອຍ ເພີ່ມທະວີການຮັກສາຄວາມສະຫງົບ-ປອດໄພ ແລະ ຄວາມເປັນລະບຽບຮຽບຮ້ອຍໃນສັງຄົມໃຫ້ດີ, ຮັບປະກັນໃຫ້ແກ່ການສະ ຫຼອງບຸນປີໃໝ່ລາວມີບັນຍາກາດເບີກບານມ່ວນຊື່ນ ແລະ ພ້ອມທັງກໍໃຫ້ສືບຕໍ່ເຜີຍແຜ່ ແລະ ຈັດ ຕັ້ງປະຕິບັດບັນດາຂໍ້ຕົກລົງຂອງຜູ້ນຳເຮົາກັບຜູ້ນຳຕ່າງປະເທດ ໃຫ້ເກີດໝາກເກີດຜົນຕົວຈິງ.