laophatthananewspaper: ທ່ານປະທານປະເທດຢ້ຽມຢາມ ແລະ ຊີ້ນຳວຽກງານຢູ່ເມືອງຮົ່ມແຂວງໄຊສົມບູນ

ໃນວັນທີ 24 ມີນານີ້, ທ່ານ ຈູມມາລີ ໄຊຍະສອນ ເລຂາທິການໃຫຍ່ປະທານປະເທດ, ໄດ້ລົງຢ້ຽມຢາມ ແລະ ຊີ້ນຳວຽກງານການພັດທະນາເສດຖະກິດ, ການຜະລິດເປັນສິນຄ້າຢູ່ເມືອງຮົ່ມ ແຂວງໄຊສົມບູນໂດຍການຕ້ອນຮັບຂອງທ່ານເຈົ້າເມືອງຮົ່ມ ແລະ ເມືອງລ້ອງຊານ ແລະ ປະຊາຊົນຢ່າງອົບອຸ່ນ.

ໃນໂອກາດດັ່ງກ່າວ, ທ່ານ ປະທານປະເທດ ກໍໄດ້ຮັບຟັງການລາຍງານສະພາບການຊີ້ນຳ-ນຳພາວຽກງານການພັດທະນາເສດຖະກິດ-ສັງຄົມຂອງທັງສອງເມືອງຕາມລຳດັບ, ເຊິ່ງທ່ານເຈົ້າເມືອງຮົ່ມ ໄດ້ລາຍງານວ່າ: ພາຍຫລັງ, ໄດ້ຮັບການແຕ່ງຕັ້ງເມືອງ ຮົ່ມໃນວັນທີ 16 ມັງກອນ 2014 ທັງເມືອງກໍໄດ້ ຈັດຕັ້ງຊັບຊ້ອນພະນັກງານລັດຖະກອນຄືນໃໝ່ເພື່ອໃຫ້ເທດເໝາະກັບວຽກງານໃໝ່. ຈາກນັ້ນກໍໄດ້ຈັດຕັ້ງຄະນະພັກເພື່ອຊີ້ນຳການຈັດຕັ້ງປະຕິບັດ ແລະ ໄດ້ປັບປຸງການຈັດຕັ້ງສຳນັກງານອົງການຄືນໃໝ່ເພື່ອໃຫ້ສອດຄ່ອງກັບວຽກງານ ແລະ ພາລະບົດບາດຂອງຕົນໃນຂົງເຂດວຽກງານທີ່ຕົນຮັບຜິດຊອບ

ເມືອງຮົ່ມມີ 13 ບ້ານ, ມີ1.147 ຄອບຄົວ, ພົນລະເມືອງທັງໝົດ 10.695 ກວ່າຄົນ, ຍິງ 5.199 ຄົນ.

ເມືອງຮົ່ມເປັນເມືອງໜຶ່ງທີ່ເປັນວິລະຊົນ, ແຕ່ເມືອງຮົ່ມເປັນເມືອງພູດອຍ ມີຫລາຍຊົນເຜົ່າຢູ່ຮ່ວມກັນ, ມີແນວຄິດຮີດ ຄອງປະເພນີຍັງຮັກສາຄົງເດີມ, ປະຊາຊົນສ່ວນຫລາຍປະກອບອາຊີບໃນການປູກຝັງລ້ຽງສັດເປັນສ່ວນໃຫຍ່, ເນື້ອທີ່ການຜະ ລິດມີຈຳກັດ, ຊົນລະປະທານຍັງບໍ່ທັນອຳນວຍຄວາມສະດວກ ຊຶ່ງບໍ່ສາມາດສະໜອງນ້ຳໄດ້ໃນການຜະລິດທັງສອງລະດູ, ເສັ້ນ ທາງຄົມມະນາຄົມກໍມີຄວາມສະດວກ ແລະ ໄດ້ຮັບການບູລະນະສ້ອມແປງ ແຕ່ກໍຍັງເປແພຫລາຍ, ໂຄງລ່າງພື້ນຖານລົງທຶນຫລາຍຜົນໄດ້ຮັບນ້ອຍ.

ເມືອງຮົ່ມນອກຈາກການປູກຝັງລ້ຽງສັດ ແລ້ວຍັງມີທ່າແຮງຫລາຍດ້ານເປັນຕົ້ນ ມີສະຖຽນລະພາບທາງດ້ານການເມືອງ, ມີຄວາມສະຫງົບໂດຍພື້ນຖານປະຊາຊົນບັນດາບັນດາເຜົ່າມີມູນເຊື້ອຮັກຊາດ, ຮັກບ້ານເກີດເມືອງນອນ, ຕໍ່ສູ້ບໍ່ຍົມຈຳນົນຕໍ່ສັດຕູ, ມີມູນເຊື້ອອັນດຸໝັ່ນໃນການປະກອບອາຊີບພັດທະນາຕົນເອງ ກໍຄືການພັດທະນາປະເທດຊາດ, ມີທຳມະຊາດອຸດົມ ສົມບູນ, ມີພູຜາທີ່ສວຍສົດງົດງາມ ແລະ ເຕັມໄປດ້ວຍປ່າໄມ້,ມີສາຍນ້ຳ ທີ່ສາມາດຜະລິດກະເສໄຟຟ້າ, ມີສະຖານທີ່ທ່ອງທ່ຽວທາງທຳມະຊາດ ແລະ ມີດິນເໝາະສົມການປູກຟັງລ້ຽງສັດ. ຈາກນັ້ນເຈົ້າເມືອງລ້ອງຊາກກໍລາຍງານການພັດທະນາເສດຖະກິດ-ສັງຄົມຂອງເມືອງລ້ອງຊານໃຫ້ທ່ານປະທານປະເທດຮັບຊາບ.

ຕອນທ້າຍ, ທ່ານປະທານ ປະເທດ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານໃນການຈັດຕັ້ງປະຕິບັດຊີ້ນຳ-ນຳພາວຽກງານການພັດທະນາທ້ອງຖິ່ນ ຂອງເຈົ້າເມືອງທັງສອງໃນໄລຍະຜ່ານມາ, ພ້ອມທັງໄດ້ຊີ້ນຳວຽກງານໃນຕໍ່ໜ້າວ່າ: ສອງເມິືອງ ຕ້ອງໄດ້ສຸມໃສ່ໃນການພັດທະນາແກ້ໄຂຄວາມທຸກຍາກ ເຖິງວ່າພວກເຮົາຈະບໍ່ສາມາດແກ້ໄດ້ໝົດກໍຕາມ, ແຕ່ຊີວິດການເປັນຢູ່ຂອງປະຊາຊົນນັບມື້ນັບດີຂື້ນ. ດ້ານສຶກສາ, ສາທາລະນະສຸກລ້ວນແລ້ວແຕ່ໄດ້ຮັບການພັດທະນາ, ການພັດທະນາກໍມີຈຸດສຸມໂດຍສະເພາະແມ່ນທ່າແຮງທີ່ບົ່ມຊ້ອນການປູກຝັງລ້ຽງສັດ, ການຜະລິດເປັນສິນຄ້າກໍນັບມື້ນັບຫລາຍຂຶ້ນ. ໃຫ້ທັງສອງເມືອງ ລອງທົດລອງປູກຫຍ້າລ້ຽງສັດ ຖ້າເຮັດໄດ້ກໍສາມາດລົບລ້າງຄວາມທຸກຍາກໄດ້ພ້ອມກັນນີ້ ທ່ານກໍໄດ້ເນັ້ນໃຫ້ທັງສອງເມືອງສ້າງຊັບພະຍາກອນມະນຸດ, ສ້າງ ບຸກຄະລາກອນໝຸ່ມເຂົ້າໃນການຄະນະພັກ ແລະ ໃຫ້ເລືອກເອົາພະ ນັກງານໝຸ່ມທີ່ມີຄວາມຫ້າວຫັນ, ມີຄວາມຮູ້, ຄວາມສາມາດ, ມີຄວາມດີຮອບດ້ານ, ມີຄຸນສົມບັດດີ, ມີຄວາມໃກ້ຊິດກັບປະຊາຊົນ ແລະ ສາມາດລົງຊີ້ນຳນຳພາປະ ຊາຊົນເຂົ້າຮ່ວມຂະບວນການຜະ ລິດເປັນສິນຄ້າຫລາຍຂຶ້ນ. ທາງດ້ານການຈັດຕັ້ງໃຫ້ເອົາໃຈໃສ່ພັກ, ໃຫ້ເລືອກເອົາຜູ້ມີລະດັບ,ເອົາຊົນເຜົ່າ ແລະ ເພດຍິງເຂົ້າໃນຄະນະພັກ ເພື່ອເປັນຜູ້ນຳພາປະ ຊາຊົນໃນການພັດທະນາບ້ານ,ເມືອງກໍຄືການພັດທະນາປະເທດຊາດ ແລະ ນຳພາປະຊາຊົນເຂົ້າຮ່ວມຂະບວນການຜະລິດເປັນສິນຄ້າຫລາຍຂື້ນ ອິກດ້ານໜື່ງກໍລົງຊີ້ນຳນຳພາດ້ານແນວຄິດ ການເມືອງພາຍໃນທ້ອງຖິ່ນ ເພື່ອໃຫ້ບ້ານເມືອງມີຄວາມສະຫງົບ ປອດໄພ ແລະ ສັງຄົມສີວິໄລ.

ຕອນແລງຂອງວັນດຽວກັນ ທ່ານຈູມມາລີ ໄຊຍະສອນເລຂາທິການໃຫຍ່ປະທານປະເທດກໍໄດ້ຢ້ຽມຢາມ ແລະ ໂອ້ລົມການນຳ ແລະ ພະນັກງານຫລັກແຫລ່ງຂອງແຂວງຢູ່ສະໂມສອນໃຫຍ່ແຂວງໄຊສົມບູນໂດຍການຕ້ອນຮັບຂອງທ່ານ ດຣ ສົມບັດ ເຢຍລິເຮີ ເຈົ້າແຂວງໄຊສົມບູນ ພ້ອມຄະນະພັກ ແລະ ພະນັກງານຫລັກແຫລງຂອງແຂວງເຂົ້າຮ່ວມ.