ສານປະຊາຊົນນະຄອນຫຼວງວຽງຈັນລົງໂທດຜູ້ຄ້າຂາຍຢາເສບຕິດ

     ໃນວັນທີ 13 ມີນານີ້ ສານ ປະຊາຊົນນະຄອນຫຼວງວຽງຈັນ ໄດ້ດຳເນີນປະຊຸມສານເພື່ອ ຕັດສິນລົງໂທດທ້າວ ດ່ອນ ເລື່ອງສະໄໝ ຫຼື ຕ້າ ອາຍຸ 23 ປີ ອາຊີບ ຫວ່າງງານ ຢູ່ບ້ານ ສີເກີດ ເມືອງ ນາຊາຍທອງ ນະຄອນຫຼວງວຽງຈັນ ໃນຂໍ້ຫາຄ້າຂາຍຢາເສບຕິດ ແລະ ນຳໃຊ້ອາວຸດ ເສີກ ໂດຍບໍ່ຖືກຕ້ອງຕາມກົດໝາຍຈຳຄຸກ 5ປີ 6 ເດືອນພ້ອມປັບໃໝ 10,5 ລ້ານກີບ, ຜູ້ ກ່ຽວຖືກກັກ ຕົວໃນວັນທີ 28 ພຶດສະພາ 2013 ທີ່ຄ້າຍຄຸມຂັງ ເມືອງສີໂຄດຕະບອງ ນະຄອນຫຼວງວຽງຈັນ.

      ຕາມບົດຖະແຫຼງສຳນວນ ຄະດີໃຫ້ຮູ້ວ່າ: ເມື່ອວັນທີ 22 ມີນາ 2013, ໃນຂະນະຜູ້ຕ້ອງ ຫາຂີ່ລົດໄປຮັບຊື້ຢາບ້າ ຈຳນວນ 2 ເມັດ ກັບໝູ່ຢູ່ບ້ານສີເກີດ ເມືອງນາຊາຍທອງ ເພື່ອຈະນຳ ໄປຂາຍໃຫ້ໄວລຸ້ນເຂດ ແລະ ເວລາກັບມາໄດ້ຂີ່ລົດ ກວນເມືອງ, ສົ່ງ ສຽງດັງຕາມທາງຊຶ່ງເຮັດໃຫ້ປະຊາຊົນຢູ່ເຂດ ບ້ານສີເກີດ ນັ້ນບໍ່ພໍໃຈຮ້ອງດ່າ ແລະ ໃຊ້ແກ້ວເບຍດຶກໃສ່, ຈາກນັ້ນຈຶ່ງເຮັດໃຫ້ຕົນເອງໂມໂຫຈຶ່ງໂທຊວນໝູ່ມາອອກມາຍິງປືນໃສ່ເຮືອນ

ແລະ ດຶກກ້ອນຫີນໃສ່ເຮືອນຂອງຜູ້ ທີ່ດຶກແກ້ວ ເບຍໃສ່ຕົນເອງ ແລະ ໃນວັນຕໍ່ມາຈຶ່ງຖືກເຈົ້າໜ້າທີ່ຈັບຕົວມາດຳເນີນຄະດີ.

        ຜ່ານການສືບສວນ-ສອບສວນຂອງເຈົ້າໜ້າທີ່ຜູ້ກ່ຽວໄດ້ຮັບສາລະພາບວ່າ: ເປັນຜູ້ຍິງປືນ ແລະ ດຶກກ້ອນຫີນໃສ່ເຮືອນ ປະຊາຊົນຫຼັງດັ່ງກ່າວແທ້ພ້ອມດຽວກັນກໍຍັງຍອມຮັບວ່າໄດ້ເຄື່ອນໄຫວຊື້-ຂາຍຢາເສບຕິດມາແຕ່ປີ 2012 ກ່ອນຈະຖືກເຈົ້າ ໜ້າທີ່ຈັບ ຕົວມາດຳເນີນຄະດີຕາມລະບຽບກົດໝາຍ.

        ຂ່າວໃຫ້ຮູ້ອີກວ່າ: ໃນກາງ ເດືອນກຸມພາທີ່ຜ່ານມານີ້, ເຈົ້າ ໜ້າທີ່ຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງ ຈຳປາສັກໄດ້ປະສານສົມທົບກັບອຳນາດການປົກຄອງທ້ອງຖິ່ນ ດຳເນີນການຈັບກຸມຕົວ ທ້າວ ຄຳດາວັນ, ອາຍຸ 53 ປີ, ສັນຊາດ ລາວ, ອາຊີບຄ້າຂາຍຢູ່ບ້ານຫ້ວຍຍາງຄຳ, ເມືອງປາກເຊ ແຂວງຈຳປາສັກ, ພ້ອມດ້ວຍໝູ່ 3 ຄົນ, ໃນຂໍ້ຫາຄ້າຂາຍ ແລະ ມີຢາເສບຕິດໃວ້ໃນຄອບຄອງ, ຊຶ່ງ ຍຶດເຄື່ອງຂອງກາງຢາບ້າໄດ້ 6000 ເມັດ, ປືນລູກຊອງ 1 ກະ ບອກ, ປຶນເຊກາເຊ 1 ກະບອກ, ລົດກະບະໄຮລັກວິໂກ້ 1 ຄັນ, ລົດ ກະບະຮຸນໃດ 1 ຄັນ, ອາຍັດ ເຮືອນວິນລາ 1 ຫຼັງ ແລະ ຊັບສິນ ຕ່າງໆທີ່ຫາມາ ໄດ້ຈາກການຄ້າ ຂາຍຢາເສບຕິດຈຳນວນໜຶ່ງ, ມາ ດຳເນີນຄະດີຕາມລະບຽບກົດ ໝາຍ.