ອັກຄີໄພປ້ອງກັນໄດ້ດ້ວຍການມີສະຕິ

        ຄືດັ່ງຮູ້ແລ້ວວ່າ: ລະດູຮ້ອນ ສະພາບອັກຄີໄພເກີດຂຶ້ນໄດ້ງ່າຍ ແລະ ສ້າງຄວາມ ສູນເສຍບໍ່ໜ້ອຍໃນແຕ່ລະຄັ້ງ. ແຕ່ພວກ ເຮົາສາມາດປ້ອງກັນໄດ້ດ້ວຍວິທີການຕ່າງໆ ແຕ່ດີສຸດກໍແມ່ນການມີສະຕິໃນການໃຊ້ຟືນໄຟ ແລະ ມີອຸປະກອນມອດໄຟ (ບັ້ງມອດ ໄຟ) ປະຈຳເຮືອນ, ແຕ່ຜ່ານມາສັງເກດເຫັນວ່າ: ຫລາຍຄອບຄົວຍັງຖືເບົາຕໍ່ການມີສະຕິ ໃນການປ້ອງ ກັນລະມັດລະວັງໃນການໃຊ້ຟືນໄຟ, ບໍ່ມັກກວດກາສະພາບສາຍໄຟ ແລະ ອຸປະກອນໄຟຟ້າຕ່າງໆພາຍໃນເຮືອນ ແລະ ພ້ອມນັ້ນ ຫລາຍເຮືອນບໍ່ມີບັ້ງມອດໄຟ. ດັ່ງນັ້ນເມື່ອເກີດກໍລະນີໄຟໄໝ້ຈຶ່ງໄດ້ແຕ່ລໍຖ້າໃຫ້ລົດມອດໄຟມາ, ສຸດທ້າຍໄຟກໍລຸກ ລາມໄປຫລາຍແລ້ວ ແລະ ໃນທີ່ສຸດກໍເຫລືອແຕ່ເທົ່າຖ່ານ.

     ເຈົ້າຂອງຮ້ານຂາຍອຸປະກອນດັບເພີງແຫ່ງໜຶ່ງໃນນະຄອນຫລວງວຽງຈັນໃຫ້ສຳພາດກັບນັກຂ່າວວ່າ: ບັ້ງມອດໄຟ ແມ່ນມີ ຄວາມສຳຄັນຫລາຍໃນການປ້ອງກັນອັກຄີໄພ, ມັນແມ່ນອຸປະກອນພື້ນຖານໃນການສະກັດກັ້ນບໍ່ໃຫ້ກະແສໄຟລຸກລາມຈາກ

ໜ້ອຍໄປຫາຫລາຍ, ແຕ່ຜ່ານມາຫລາຍຄອບຄົວກໍບໍ່ໄດ້ໃສ່ໃຈໃນດ້ານນີ້ເພາະຄິດວ່າລາຄາແພງເລີຍບໍ່ຢາກຊື້ ແລະ ຜູ້ທີ່ມາຊື້ ສ່ວນຫລາຍແມ່ນເຈົ້າໜ້າທີ່ກ່ຽວຂ້ອງລົງແນະນຳ, ຜູ້ທີ່ເຄີຍເຫັນເຮືອນໃກ້ຄຽງຖືກໄຟໄໝ້ແລ້ວເລີຍຄິດຢ້ານຈຶ່ງມາຊື້ ໂດຍສະ ເລ່ຍເດືອນໜຶ່ງຈະມີລູກຄ້າມາຊື້ບັ້ງມອດໄຟ 2-3 ບັ້ງ    ເທົ່ານັ້ນເຊິ່ງຖືວ່າເປັນໂຕເລກທີ່ຕ່ຳຫລາຍ.

     ເຈົ້າໜ້າທີ່ມອດໄຟ ໃຫ້ຮູ້ວ່າ: ໃນປີຜ່ານມາ, ມີອັກຄີໄພເກີດຂຶ້ນ 66 ຄັ້ງ ແລະ ໃນປີນີ້ ກໍເກີດຂຶ້ນ ແລ້ວ 10 ກວ່າຄັ້ງ ເຊິ່ງຖ້າພວກເຮົາຍັງຖືເບົາຕໍ່ການມີສະຕິໃນການໃຊ້ຟືນໄຟ ແລ້ວເຫດການທີ່ບໍ່ເພິ່ງປາດຖະໜາດັ່ງກ່າວອາດເກີດຂຶ້ນໄດ້ທຸກ ເວລາ.