ສານນະຄອນຫຼວງວຽງຈັນຕັດສິນລົງໂທດຜູ້ຄ້າຢາເສບຕິດ ແລະ ແກ້ງສໍ້ໂກງຊັບຂອງພົນລະເມືອງ

        ໃນວັນທີ 25 ມີນານີ້ ສານປະຊາຊົນນະຄອນຫຼວງວຽງ ຈັນ ໄດ້ປະຊຸມສານເພື່ອຕັດ ສິນລົງໂທດຜູ້ຕ້ອງຫາຄ້າຢາເສບ ຕິດ ແລະ ກຸ່ມແກ້ງສໍ້ໂກງຊັບຂອງພົນລະເມືອງຄື: ທ້າວ ມັງກອນ ພິມມະສອນ ອາຍຸ 29 ປີ ອາຊີບກຳມະກອນ ຢູ່ບ້ານ ແສງ ສະຫວ່າງ ເມືອງໄຊເສດຖາ ນະ ຄອນຫຼວງວຽງຈັນຖືກກັກຕົວໃນ ວັນທີ 8 ສິງຫາ 2013 ຜ່ານມາ ໃນຂໍ້ຫາຄ້າຂາຍຢາເສບ ຕິດ ແລະ ນາງ ມຸກຄະລິນ ລາດຊະວົງ ບົວ ສອນ ອາຍຸ 53 ປີ ອາຊີບຄ້າຂາຍ ຢູ່ບ້ານນ້ຳຍອນ ເມືອງ ແລະ ແຂວງໄຊສົມບູນ, ທ້າວ ອ່ອນສີ ອາຍຸ 50 ປີ ອາຊີບ ກຳມະກອນ ຢູ່ບ້ານປາກຊັນ ແຂວງບໍລິຄຳ ໄຊ, ທ້າວ ເພັງ ອາຍຸ 55 ປີ ອາຊີບ ກຳມະກອນ ຢູ່ ບ້ານພູດິນແດງ ເມືອງວັງວຽງ ແຂວງວຽງຈັນ, ທ້າວ ກິ ປັນຍາ ອາຍຸ 46 ປີ ຢູ່ ບ້ານໜອງແວງ ເມືອງປາກຊັນ ແຂວງ ບໍລິຄຳ ໄຊ, ທ້າວ ສົມ ພອນ ອາຍຸ 51 ປີ ອາຊີບ ກຳມະ ກອນ ຢູ່ບ້ານ ທົ່ງເມືອງນ້ອຍ, ເມືອງປາກຊັນ ແຂວງບໍລິຄຳໄຊ ແລະ ທ້າວ ກິ່ງເພັດ ພະວົງສາ ອາຍຸ 38 ປີ ອາຊີບກຳມະກອນ ຢູ່ບ້ານໂນນຂີ້ເຫຼັກ ເມືອງ ສີໂຄດຕະບອງ ນະຄອນຫຼວງວຽງຈັນ ທັງໝົດ ຖືກກັກຕົວໃນລະຫວ່າງ ທ້າຍເດືອນເມສາ  2013 ຜ່ານມາ ໃນຂໍ້ຫາສໍ້ໂກງຊັບພົນລະເມືອງ.

         ຕາມການໃຫ້ການຕໍ່ທີ່ປະ ຊຸມສານ ທ້າວ ມັງກອນຮັບສາ ລະພາບວ່າ: ໄດ້ເຄື່ອນໄຫວຄ້າ ຂາຍຢາເສບຕິດມາແຕ່ປີ 2000 ໂດຍໄດ້ຮັບຊື້ຢາຈາກປະຊາຊົນ ເຂດບ້ານແສງສະຫວ່າງ ເມືອງ ໄຊເສດຖາ ນະຄອນຫຼວງວຽງຈັນກ່ອນຈະນຳໄປຂາຍ ໃຫ້ກັບຊາວໜຸ່ມພ້ອມທັງເສບຊຶ່ງສ່ວນໃຫຍ່ຢາທີ່ຮັບມາແມ່ນຢາບ້າ ແລະ ຢາໄອ ກ່ອນຈະຖືກເຈົ້າໜ້າທີ່ກັກຕົວມາດຳເນີນ ຄະດີ, ສ່ວນທ້າວອ່ອນສີຜູ້ຕ້ອງຫາຄະດີສໍ້ໂກງຊັບພົນລະເມືອງໃຫ້ຮູ້ວ່າ: ໃນ ໄລຍະທ້າຍປີ 2012 ຜ່ານມາຕົນ ເອງໄດ້ສົມຮູ້ ຮ່ວມຄິດກັບໝູ່ເພື່ອສໍ້ໂກງຊັບສິນພົນລະເມືອງແທ້ ແລະ ມີຜູ້ຫຼົງເຊື່ອ ແລະ ເສຍຊັບ ສິນເປັນຈຳນວນຫຼາຍກ່ອນຈະຖືກເຈົ້າ ໜ້າທີ່ຈັບຕົວມາດຳເນີນ ຄະດີ.

        ຜ່ານການຄົ້ນຄວ້າຫຼັກຖານ ແລະ ການຍອມຮັບສາລະພາບ ຂອງຜູ້ຕ້ອງຫາສານປະຊາຊົນນະຄອນຫຼວງວຽງຈັນຈຶ່ງໄດ້ ຕັດສິນລົງໂທດຕັດອິດສະຫຼະພາບ ທ້າວມັງກອນ ຈຳຄຸກ 5ປີ ພ້ອມ ປັບໃໝ 10 ລ້ານກີບ ໃນຂໍ້ຫາຄ້າຂາຍຢາເສບຕິດ ແລະ ລົງ ໂທດຕັດອິດສະຫຼະພາບ ນາງ ມຸກຄະລິນ ລາດຊະວົງບົວສອນ, ທ້າວ ອ່ອນສີ, ທ້າວ ເພັງ, ທ້າວ ກິ ປັນຍາ, ທ້າວ ສົມ ພອນ ແລະ ທ້າວ ກິ່ງເພັດ ພະວົງສາ ຈຳຄຸກຜູ້ລະ 2 ປີ 5 ເດືອນ ໃນຂໍ້ຫາສໍ້ໂກງຊັບພົນລະເມືອງ.