ດາວເຮືອງຮ່ວມທຸລະກິດກັບບລູສະຕາຈຳໜ່າຍກາເຟດາວຢູ່ຫວຽດນາມ

       ກຸ່ມບໍລິສັດ ດາວເຮືອງ ຫວັງສ້າງເຄື່ອງໝາຍການຄ້າກາເຟດາວໃຫ້ໃຫຍ່ໂຕ ແລະ ມີຊື່ສຽງກວ່າເກົ່າດ້ວຍການຮ່ວມທຸລະ ກິດກັບ ບໍລິສັດ ຮຸ້ນສ່ວນຈຳໜ່າຍ ບລູສະຕາ (Blue Star) ຂອງ ສສ ຫວຽດນາມ ເພື່ອພັດທະນາ ແລະ ຈຳໜ່າຍ ຜະລິດ ຕະພັນກາເຟດາວຢູ່ຕະຫລາດຫວຽດນາມ, ເຊິ່ງພິທີເຊັນສັນຍາຮ່ວມທຸລະ ກິດດັ່ງກ່າວໄດ້ຈັດຂຶ້ນໃນຕອນແລງວັນທີ 22 ມີນາ 2014 ທີ່ນະຄອນໂຮ່ ຈິມິງ ສສ ຫວຽດນາມ ລະຫວ່າງ ທ່ານນາງ ບຸນເຮືອງ ລິດດັງ ຮອງປະທານ ກຸ່ມບໍລິສັດ ດາວ ເຮືອງ ແລະ ທ່ານ ເຈິ່ນຊວນດິ້ງ ຜູ້ອຳນວຍການໃຫຍ່ບໍລິສັດຮຸ້ນສ່ວນຈຳໜ່າຍ ບລູສະຕາ, ໂດຍມີ ທ່ານ ນາງ ເຂັມມະນີ ພົນເສນາ ລັດຖະມົນຕີຊ່ວຍວ່າການກະຊວງອຸດສາຫະກຳ ແລະ ການຄ້າ ສປປ ລາວ, ທ່ານ ບົວສອນ ວົງ ສອງຄອນ ຮອງ ເຈົ້າແຂວງໆ ຈຳປາສັກ, ທ່ານ ເລ ຮ່ວາງ ກວັນ ປະທານຄະນະກຳມະການສະພາປະຊາຊົນນະຄອນໂຮ່ຈິມິງ, ມີປະທານກຸ່ມ ບໍລິສັດ ດາວເຮືອງ, ພ້ອມດ້ວຍພະນັກງານທີ່ກ່ຽວຂ້ອງສອງຝ່າຍເຂົ້າຮ່ວມເປັນສັກຂີພິຍານ.

     ທ່ານນາງ ເຂັມມະນີ ພົນເສນາ ກ່າວໃນພິທີວ່າ: ການເຊັນສັນຍາໃນຄັ້ງນີ້ເປັນນິມິດໝາຍອັນສຳຄັນໃນການຂະຫຍາຍ ເຄືອ ຂ່າຍທາງດ້ານການຄ້າອອກສູ່ປະເທດເພື່ອນບ້ານ ກໍຄືສາກົນຂອງຜະລິດຕະພັນທີ່ມີຄຸນນະພາບ ແລະ ມາດຕະຖານຂອງ ສປປ ລາວ. ພ້ອມນີ້ ຍັງເປັນການເສີມສ້າງການຮ່ວມມດ້ານທຸລະກິດຂອງສອງປະເທດໃຫ້ນັບມື້ນັບຂະຫຍາຍຕົວອັນຈະ ເປັນພື້ນ ຖານທີ່ດີໃຫ້ການກະກຽມພ້ອມເຂົ້າສູ່ປະຊາຄົມເສດຖະກິດອາຊຽນ ໃນປີ 2015 ນີ້. ພ້ອມດຽວກັນກໍຈະເຮັດໃຫ້ ຄາດໝາຍຂ ອງລັດຖະບານທັງສອງປະເທດວ່າດ້ວຍການຮ່ວມມືທາງດ້ານການຄ້າສາມາດຈັດຕັ້ງປະຕິບັດໃຫ້ປະກົດຜົນເປັນຈິງ.

    ກຸ່ມບໍລິສັດ ດາວເຮືອງ ສ້າງຕັ້ງຂຶ້ນໃນປີ 1991 ທີ່ເມືອງປາກເຊ ແຂວງຈຳປາສັກ, ປັດຈຸບັນ ກາເຟດາວໄດ້ຍົກສູງຄຸນນະ ພາບຂອງຜະລິດຕະພັນ, ເນັ້ນຄວາມຫລາກຫລາຍຂອງຊະນິດພັນ ແລະ ການຫຸ້ມຫໍ່, ພ້ອມທັງສົ່ງ ອອກຈຳໜ່າຍຢູ່ຫລາຍໆ ປະເທດ ເປັນຕົ້ນ: ຍີ່ປຸ່ນ, ສະວິດເຊີແລນ, ອີຕາລີ, ໄທ, ຈີນ, ສິງກະໂປ, ກຳປູເຈຍ  ແລະ ສສ ຫວຽດນາມ.

     ຢ່າງໃດກໍດີ, ບໍລິສັດ ຮຸ້ນສ່ວນ ບລູສະຕາ ໄດ້ຈຳໜ່າຍກາເຟດາວ ໃນ ສສ ຫວຽດນາມ ແຕ່ກາງເດືອນມີນາ, ໂດຍວາງເປົ້າ ໝາຍຈຳໜ່າຍຢູ່ຕະຫລາດຫວຽດນາມໃຫ້ໄດ້ 6 ລ້ານໂດລາສະຫະລັດ ໃນປີ 2014. ພ້ອມນີ້, ບລູສະຕາ ຍັງກຽມຈຳໜ່າຍ ຜະລິດຕະພັນດັ່ງກ່າວຢູ່ສະຫະລັດອາເມລິກາ ແລະ ຍີ່ປຸ່ນ.