ຄະນະປະຈຳສະພາແຫ່ງຊາດຄົ້ນຄ້ວາບັນຫາສຳຄັນຂອງຊາດປະຈຳເດືອນມີນາ2014

      ກອງປະຊຸມຄະນະປະຈຳສະພາແຫ່ງຊາດ ປະຈຳເດືອນມີນາ 2014 ໄດ້ຈັດຂຶ້ນໃນວັນທີ 24 ມີນານີ້ຢູ່່ຫ້ອງວ່າການສະພາ ແຫ່ງຊາດເພື່ອຄົ້ນຄວ້າ ແລະ ພິຈາລະນາບັນຫາສຳຄັນຂອງຊາດພາຍໃຕ້ການເປັນປະທານ ຂອງ ທ່ານນາງ ປານີ ຢ່າທໍ່ຕູ້ ປະທານສະພາແຫ່ງຊາດ, ມີບັນດາຄະນະປະຈຳສະພາແຫ່ງຊາດ ແລະ ຫົວໜ້າກຳມະທິການຕ່າງໆເຂົ້າຮ່ວມ.

     ກອງປະຊຸມໄດ້ຄົ້ນຄ້ວາ ແລະ ພິຈາລະນາບັນຫາສຳຄັນຕ່າງໆ ເຊັ່ນ: ຄົ້ນຄ້ວາອະນຸມັດ ແລະ ແຕ່ງຕັ້ງປະທານ, ຮອງປະ ທານ ແລະ ສັບປ່ຽນບ່ອນປະຈຳການຜູ້ພິພາກສາສານປະຊາຊົນທ້ອງຖິ່ນ, ຄົ້ນຄວ້າຂໍອະນຸມັດແຕ່ງຕັ້ງ ປະທານຮອງປະທານ ສານປະຊາຊົນແຂວງໄຊສົມບູນ, ລາຍງານການຄົ້ນຄວ້າສະເໜີສ້າງຕັ້ງອົງການໄອຍະການປະຊາຊົນເຂດ 4 ນະຄອນຫລວງ, ລາຍງານຄືນກ່ຽວກັບການຮຽບຮຽງກົດໝາຍ, ລາຍງານຄືນຄວາມຄຶບໜ້າໃນການກະກຽມໃຫ້ແກ່ກອງ ປະຊຸມເນື້ອໃນຂອງ ກອງປະຊຸມໄອໂຟຄອມຄັ້ງທີ 11 ຫລື ກອງປະຊຸມຄະນະກຳມະການການຄົ້ນຄ້ວາຊອກຫາຄວາມຈິງກ່ຽວກັບການຄວບ

ຄຸມຄວາມຄຸກຄາມຂອງຢາເສບຕິດ, ລາຍງານຄືນການພິຈາລະນາໂຄງປະກອບການຈັດຕັ້ງຂັ້ນກົມ ແລະ ພະແນກກຳມະທິ ການປກຊ-ປກສ, ລາຍງານການຕິດຕາມກວດກາຜົນກະທົບຕໍ່ປະຊາຊົນຈາກໂຄງການກໍ່ສ້າງສະໜາມບິນຢູ່ເຂດ ເສດຖະກິດ ສະເພາະເມືອງຕົ້ນເຜິ້ງ ແຂວງບ່ໍ່ແກ້ວ,  ລາຍງານການຕິດຕາມກວດກາຜົນກະທົບຕໍ່ປະຊາຊົນຈາກການໃຫ້ສຳປະທານທີ່ດິນ ເພື່ອປູກຕົ້ນຢາງພາລາຢູ່ເມືອງທ່າແຕງແຂວງເຊກອງ, ລາຍງານກ່ຽວກັບພັນທະບັດຕິດພັນກັບການຊຳລະໜີ້ສິນ, ລາຍງານຜົນ ກະທົບຂອງການຕິດຕາມກວດກາຊຸກຍູ້ການເກັບລາຍຮັບງົບປະມານໂຄງການລົງທຶນ ແລະ ການລົງທຶນຂອງລັດ, ລາຍງານ ການກະກຽມບົດລາຍ ງານການສ້າງຕັ້ງສະພາທ້ອງ ຖິ່ນ.