ລາວ-ສ.ເກົາຫຼີຮ່ວມມືດ້ານປະກັນໄພເງິນຝາກ.

   ຄະນະຜູ້ບໍລິຫານລະດັບສູງ ປະກັນໄພເງິນຝາກແຫ່ງສາທາລະນະລັດ ເກົາຫຼີ (ສ.ເກົາຫຼີ) ເຊິ່ງນຳ ໂດຍທ່ານ seung wou shin ຜູ້ອຳນວຍ ການຝ່າຍບໍລິ ຫານປະກັນໄພເງິນຝາກ ສ.ເກົາ ຫຼີ ໄດ້ມາເຄື່ອນໄຫວເຮັດ ວຽກຢູ່ ສປປ ລາວ ເມື່ອມໍ່ໆມານີ້ໂດຍໄດ້ຮັບການຕ້ອນຮັບຢ່າງອົບອຸ່ນ ຈາກທ່ານນາງ ແສງດາວວີ ວົງຄຳຊາວ ຮອງຜູ້ອຳນວຍການກອງທຶນປົກ ຄອງຜູ້ຝາກເງິນທະນາຄານແຫ່ງ ສປປ ລາວ ແລະໃນວັນທີ 28 ກຸມພາ ຜ່ານມາສອງຝ່າຍໄດ້ມີການປຶກສາຫາລືກ່ຽວກັບຄວາມເປັນໄປໄດ້ໃນການເຊັນບົດບັນທຶກຄວາມເຂົ້າໃຈ (MOU) ຮ່ວມມືລະຫວ່າງກອງທຶນປົກປ້ອງຜູ້ຝາກເງິນ ແລະ ປະກັນໄພເງິນຝາກເກົາຫຼີທັງນີ້ເພື່ອເປັນການພັດທະນາ
ຄວາມຮູ້ທາງດ້ານເຕັກນິກວິຊາການ, ຈາກນັ້ນຜູ້ບໍລິຫານລະດັບສູງປະກັນໄພເງິນຝາກ ສ.ເກົາຫຼີ ກໍໄດ້ເຂົ້າຢ້ຽມ

ຂ່ຳນັບທ່ານ ສອນໄຊ ຮອງຜູ້ວ່າການທະນາຄານ ແຫ່ງ ສປປ ລາວ ແລະ ໃນໂອ ກາດນີ້ຮອງຜູ້ ວ່າການ ທະນາຄານແຫ່ງ ສປປ ລາວ ໄດ້ສະແດງຄວາມຂອບໃຈ ແລະ ຕີລາຄາສູງຕໍ່ການພົບປະປຶກສາ ຫາລືເຖິງ ຄວາມມຸ້ງຫວັງທີ່ສອງຝ່າຍຈະມີການຮ່ວມມືຊ່ວຍເຫຼືອເຊິ່ງກັນ ແລະ ກັນ.

       ໃນໂອກາດເຄື່ອນໄຫວຢ້ຽມຢາມລາວສອງຝ່າຍໄດ້ຮ່ວມກັນຈັດຕັ້ງການສຳມະນາວຽກງານປະກັນໄພ ເງິນຝາກຂຶ້ນທີ່ໂຮງແຮມວຽງຈັນພລາຊາ. ໂດຍການເຂົ້າຮ່ວມຂອງຜູ້ຕາງໜ້າບັດດາກົມຂອງທະນາຄານແຫ່ງ ສປປ ລາວ, ຫ້ອງການລັດຖະບານ, ບັນດາທະນາຄານທຸລະກິດທີ່ເປັນສະມາຊິກ, ສະຖາບັນການເງິນຈຸລະພາກ ທີ່ຮັບເງິນຝາກ ແລະ ພະນັກງານກອງທຶນເຂົ້ຮ່ວມ 80 ກວ່າຄົນ. ການສຳມະນາໄດ້ດຳເນີນໄປພາຍໃຕ້ຫົວຂໍ້: ພາບລວມຂອງການປະກັນໄພເງິນຝາກເກົາຫຼີ ແລະ ຜົນປະໂຫຍດໃນການເຂົ້າເປັນສະມາຊິກສະມາຄົມ ປະກັນໄພເງິນ ຝາກສາກົນ,ກົດໝາຍວ່າດ້ວຍ ການປົກປ້ອງຜູ້ຝາກເງິນ (ວຽກ ງານນິຕິກຳຂອງປະກັນໄພເງິນ ຝາກເກົາຫຼີ), ວິທີການແກ້ໄຂສະຖາບັນການເງິນທີ່ລົ້ມລະລາຍ, ການດຳເນີນງານຂອງລະບົບຂໍ້ມູນຂ່າວສານ ແລະ ເຕັກໂນໂລຊີ (IT) ຂອງປະກັນໄພເງິນຝາກ ເກົາຫຼີ.

       ໃນກອງປະຊຸມຍັງໃຫ້ຮູ້ວ່າ: ປະກັນໄພເງິນຝາກ ສ.ເກົາຫຼີ ໄດ້ສ້າງຂຶ້ນໃນປີ 1996, ປັດຈຸບັນມີ ສະມາຊິກ ຜູ້ບໍລິຫານ 7 ຄົນ, ມີພະນັກງານ ທັງໝົດ 635 ຄົນ, ປະກອບມີ 13 ພະແນກ, 5 ສຳນັກງານ ແລະ ມີ 1 ຂະແໜງການ, ສະຖາບັນການເງິນທີ່ຮັບການປົກປ້ອງມີ 318 ແຫ່ງ, ໃນນີ້ມີທະນາຄານ 56 ແຫ່ງ, ເງິນຝາກທີ່ໄດ້ຮັບການປົກປ້ອງທັງໝົດ 1.323 ຕື້ໂດລາ ໃນນີ້ເງິນຝາກທີ່ໄດ້ຮັບການປົກປ້ອງຂອງທະນາຄານ 832 ຕື້ໂດລາ ແລະ ອັດຕາເບ້ຍປະກັນ 0,08%.