ລາວ-ຫວຽດນາມເພີ່ມທະວີກະຕຸກຊຸກຍູ້ການລົງທຶນສອງຝ່າຍ

      ການພົບປະປຶກສາຫາລືລະຫວ່າງຄະນະຜູ້ແທນຂັ້ນສູງຂອງ ກະຊວງແຜນການ ແລະ ການລົງທຶນລາວ-ຫວຽດນາມ ໄດ້ມີ ຂຶ້ນໃນວັນທີ 14 ມີນານີ້ ຢູ່ນະຄອນ ຫລວງວຽງຈັນ ເພື່ອແນໃສ່ເພີ່ມ ທະວີກະຕຸກຊຸກຍູ້ການຮ່ວມມື ແລະ ການລົງທຶນ ລະຫວ່າງສອງຝ່າຍໃຫ້ຫລາຍຂຶ້ນ. ຝ່າຍລາວນຳໂດຍທ່ານ ສົມດີ ດວງດີ ລັດຖະ ມົນຕີວ່າການກະຊວງແຜນການ ແລະ ການລົງ ທຶນ ແລະ ຝ່າຍ ຫວຽດນາມນຳໂດຍ ທ່ານ ປຸຍ ກວາງວິງ ລັດຖະມົນຕີວ່າການກະຊວງດັ່ງກ່າວ. ໃນໂອກາດນຳຄະນະມາຢ້ຽມ ຢາມ ແລະ ເຮັດວຽກຢູ່ລວາລະ ຫວ່າງວັນທີ 13-15 ມີນານີ້.

       ໃນການພົວປະທີ່ດຳເນີນໄປ ດ້ວຍບັນຍາກາດອັນອົບອຸ່ນ ແລະ ສະຫນິດສະຫນົມນັ້ນ ທັງສອງຝ່າຍຕ່າງກໍໄດ້ແຈ້ງໃຫ້ ກັບຊາບສະພາບການພັດທະນາເສດຖະກິດ-ສັງຄົມຂອງແຕ່ລະປະເທດ ແລະ ສະແດງຄວາມເພິ່ງພໍໃຈກັບຫມາກຜົນການພົວ ພັນຮ່ວມມື ຂອງສອງກະຊວງໃນໄລຍະ ຜ່ານມາ ໂດຍສະເພາະແມ່ນການ ປະສານຮ່ວມມືຊ່ວຍເຫລືອຈາກ ສສ ຫວຽດນາມ

ໃຫ້ດຳເນີນໄປ ຢ່າງມີປະສິດທິຜົນ ແລະ ສຳເລັດ ຕາມລະດັບຄາດຫມາຍແຜນ ການວາງໄວ້ເປັນຢ່າງດີ ແລະ ພ້ອມນັ້ນສອງ ຝ່າຍໄດ້ເພີ່ມທະວີການຮ່ວມມື ແລະ ການລົງທຶນລະຫວ່າງສອງຝ່າຍນັບມື້ຂະຫຍາຍໂຕ. ມາຮອດປັດຈຸບັນລາວໄດ້ອະນຸຍາດ ໃຫ້ບັນດານັກທຸລະກິດຫວຽດນາມລົງທຶນຢູ່ລາວແລ້ວ 412 ໂຄງການໃນມູນຄ່າຫລາຍກວ່າ 5 ຕື້ໂດລາສະຫະລັດ ຫລື ປະ ມານ 40.000 ຕື້ກີບ ເປັນອັນດັບສອງຂອງບັນດາປະ ເທດ ແລະ ເຂດແຄວ້ນຕ່າງລົງ ທຶນຢູ່ລາວ.

      ໃນສົກປີ 2014-2015 ນີ້, ສອງຂະແຫນງການດ່ັງກ່າວຈະເພີ່ມທະວີການພົວພັນຮ່ວມມືໃນ ຂົງເຂດການຮ່ວມມື-ລົງ ທຶນໃຫ້ຫລາຍຂຶ້ນກວ່າເກົ່າ, ພ້ອມນັ້ນກໍຈະຕ້ອງໄດ້ເອົາໃຈໃສ່ປະສານສົມທົບແຫນ້ນເພື່ອເອົາໃຈໃສ່ແກ້ ໄຂຂອດທີ່ເປັນອຸປະ ສັກ ແລະ ບັນດາໂຄງການທີ່ຍັງຄ້າງຄາພາຍຫລັງໄດ້ຮັບອະນຸຍາດແລ້ວນັ້ນໃຫ້ໄດ້ຮັບການຈັດຕັ້ງປະຕິບັດໂດຍໄວ ແລະ ສຸມໃສ່ ສ້າງເງື່ອນໄຂໃຫ້ບັນດາວຽກງານທີ່ລັດຖະບານສອງຝ່າຍໄດ້ຕົກລົງນຳກັນ ແລ້ວນັ້ນໃຫ້ໄດ້ຈັດຕັ້ງປະຕິບັດ ໂດຍໄວຄື : ແຜນຍຸດ ທະສາດ ຮ່ວມມື 10 ປີຕໍ່ຫນ້າ ( 2011- 2020 ) ສັນຍາຮ່ວມມືໄລຍະ 5 ປີ ( 2011-2015 ) ແລະ ແຜນຍຸດທະສາດຮ່ວມ ມືລາວ-ຫວຽດນາມຢູ່ສອງແຂວງຫົວພັນ ແລະ ຊຽງຂວາງແຕ່ແຕ່ນີ້ຮອດປີ 2020 ໃຫ້ໄດ້ດຳເນີນໄປຢ່າງມີປະສິດທິ ຜົນ.