ສປ ຈີນ ຊ່ວຍເຫລືອສ້ອມແປງຫໍວັດທະນະທຳແຫ່ງຊາດ

    ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ ແລະ ທ່ານ ກວນ ຮົວ ປິງ ເອກອັກຄະລັດຖະທູດ ສປ ຈີນ ປະຈຳລາວ, ພ້ອມດ້ວຍແຂກຖືກເຊີນໄດ້ຮ່ວມຕັດແຖບຜ້າເປີດໂຄງການປັບ ປຸງສ້ອມແປງໃຫຍ່ຫໍວັດທະນະທຳ ແຫ່ງຊາດ ໃນວັນທີ 14 ມີນານີ້, ເຊິ່ງເປັນການ ຊ່ວຍເຫລືອລ້າຈາກລັດຖະບານຈີນເພື່ອປະ ກອບໄຟແສງ, ສີ, ສຽງ ແລະ ເຕັກນິກ ໃຫ້ທັນສະໄໝທັງພາຍໃນ ແລະ ນອກອາຄານພ້ອມກັບປ່ຽນຖ່າຍສິ່ງເປ່ເພຊຳລຸດໃຫ້ມີ ຮູບຊົງສວຍງາມຂຶ້ນ, ໂດຍກຸ່ມບໍລິສັດ 5 ເໝືອງ 23 ໂລຫະທາດ ສປ ຈີນ ເປັນຜູ້ຈັດຕັ້ງປະຕິບັດ.

    ທ່ານບຸນຈັນ ພັນທະວົງສີ ຜູ້ອຳນວຍການຫໍວັດທະນະທຳ ແຫ່ງຊາດກ່າວວ່າ: ຫໍວັດທະນະທຳແຫ່ງຊາດເປັນໂຄງການຊ່ວຍ ເຫລືອຈາກລັດຖະບານ ສປ ຈີນ ມອບເປັນຂອງຂວັນໃຫ້ແກ່ລັດຖະບານລາວຕາມສັນຍາຮ່ວມມືດ້ານເສດຖະກິດເຕັກນິກມີ ມູນຄ່າ 64 ລ້ານກ່ວາຢວນ ແລະ ມີທຶນສົມທົບຂອງລັດຖະບານລາວ 300 ກວ່າລ້ານກີບ. ເລີ່ມລົງມືກໍ່ສ້າງແຕ່ຕົ້ນປີ 1998

ສຳເລັດໃນ ທ້າຍປີ 1999 ພາຍຫລັງກໍ່ສ້າງສຳ ເລັດໄດ້ເປີດໃຫ້ບໍລິການແຕ່ປີ 2000. ຕະຫລອດໄລຍະ 13 ປີ ຜ່ານມາຫໍວັດ ທະນະທຳແຫ່ງຊາດໄດ້ຮັບໃຊ້ບໍລິການດ້ານສະ ຖານທີ່ຕໍ່ອົງການຈັດຕັ້ງຂອງພັກ- ລັດ, ອົງການຈັດຕັ້ງສາກົນ, ບໍລິສັດຫ້າງ ຮ້ານ, ວິທະຍາໄລ, ໂຮງຮຽນ ແລະ ສັງຄົມທົ່ວໄປຈົນ ເປັນທີ່ຍອມຮັບຂອງສັງຄົມ ແລະ ຮັບໃຊ້ງານໂຮມຊຸມນຸມຂັ້ນສູງ ສຸດຂອງ ພັກ-ລັດ, ນັບທັງກອງ ປະຊຸມທີ່ສຳຄັນຂອງພັກ-ລັດ, ອົງການຈັດຕັ້ງສາກົນ, ທັງພາຍໃນ ແລະ ຕ່າງປະເທດ. ນັບແຕ່ປີ 2000 ເຖິງ 2013 ລັດຖະບານຈີນ ໄດ້ຕິດຕາມການເຄື່ອນໄຫວ ແລະ ໃຫ້ການຊ່ວຍເຫລືອສ້ອມແປງປ່ຽນ ຖ່າຍອຸປະກອນຕ່າງໆພາຍໃນຫໍວັດທະນະທຳແຫ່ງຊາດຕະຫລອດມາກໍຄືລວມທັງການຊ່ວຍເຫລືອສ້ອມແປງໃນຄັ້ງນີ້ ຊຶ່ງມີມູນຄ່າຫລາຍສົມ ຄວນ.

         ທ່ານ ເຊຍຊີ (Xie Xi) ຫົວໜ້າກຸ່ມບໍລິສັດ 5 ເໝືອງ 23 ໂລ ຫະທາດ ສປ ຈີນ ກ່າວວ່າ: ຫໍວັດທະນະທຳໄດ້ສ້າງ ມາເປັນເວລາ 13 ປີແລ້ວ ເຊິ່ງເປັນສູນລວມປະກອບສ່ວນໃນການຂະຫຍາຍ ແລະ ພັດທະນາທາງດ້ານວັດທະນາທຳ, ເສດຖະ ກິດ ແລະ ສັງຄົມ, ເຖິງເວລາແລ້ວທີ່ຈະໄດ້ຮັບການປັບປຸງສ້ອມແປງໃຫ້ນຳໃຊ້ໄດ້ຍາວນານ. ຫໍວັດທະນະທຳແຫ່ງຊາດກໍປຽບ ດັ່ງການເບິ່ງແຍງມິດຕະພາບຂອງສອງປະ ເທດລາວ-ຈີນໃຫ້ໝັ້ນຄົງ. ກຸ່ມບໍລິສັດ 5 ເໝືອງ 23 ໂລຫະທາດເປັນບໍລິສັດຂະ ໜາດໃຫຍ່ມີປະສົບການຍາວນານຢືນຢັນຈະຮັກສາຄຸນນະພາບ ແລະ ຄວາມປອດໄພ, ສ້າງຜົນງານໃຫ້ລັດຖະບານ ແລະ ປະ ຊາຊົນລາວເພິ່ງພໍໃຈ.