laophatthananewspaper: ສຳມະນາວິທະຍາສາດນ້ຳ-ພະລັງງານ

ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຮ່ວມກັບກະຊວງພະລັງງານ-ບໍ່ແຮ່ຈັດບັ້ນການສຳມະນາວິທະ ຍາສາດ ພາຍໃຕ້ຫົວຂໍ໊ “ນ້ຳ ແລະ ພະລັງງານ” ທີ່ວິທະຍາເຂດຕາດທອງໃນວັນທີ 27 ມີນານີ້, ເພື່ອ ສະເຫລີມສະ ຫລອງວັນນ້ຳໂລກໃນປີນີ້. ໂດຍມີການສະເໜີຍຸດທະສາດ ແລະ ແຜນດຳເນີນງານການຄຸ້ມຄອງຊັບພະຍາກອນນ້ຳ ນັບທັງຍຸດທະສາດ ແລະ ແຜນດຳເນີນງານການພັດທະນາພະ ລັງງານ. ພ້ອມນີ້ໄດ້ຈັດກິດຈະ ກຳຫລາຍຢ່າງຂອງນັກຮຽນ-ເຍົາວະຊົນເຊັ່ນ: ການສະແດງລະ ຄອນ, ຮ້ອງເພງປະກອບຟ້ອນ, ການຖາມ-ຕອບ ແລະ ອື່ນໆທີ່ກ່ຽວຂ້ອງກັບນ້ຳ ແລະ ພະລັງງານ.

ທ່ານ ອ້ວນມາ ທຸມມະວົງ ຫົວໜ້າພາກວິຊາວິສາວະກຳ ຊັບພະຍາກອນນ້ຳ ຄະນະວິສາ ວະກຳສາດ ມະຫາວິທະຍາໄລແຫ່ງຊາດກ່າວວ່າ: ນ້ຳເປັນອົງປະກອບພື້ນຖານທີ່ຂາດບໍ່ໄດ້ ຂອງສິ່ງທີ່ມີຊີວິດໃນໂລກ, ນ້ຳຍັງເປັນໜຶ່ງຂອງຊັບພະຍາກອນທຳ

ມະຊາດທີ່ປະກອບສ່ວນສຳ ຄັນເຂົ້າໃນການພັດທະນາເສດ ຖະກິດ- ສັງຄົມ, ທັງຫລໍ່ລ້ຽງສິ່ງແວດລ້ອມ ແລະ ຮັບໃຊ້ການດຳ ລົງຊີວິດຂອງປະຊາຊົນ. ສປປ ລາວ ເປັນປະເທດທີ່ອຸດົມສົມບູນໄປດ້ວຍຊັບພະຍາກອນນ້ຳ ຊຶ່ງເປັນທ່າແຮງສຳຄັນຕໍ່ການພັດ ທະນາເສດຖະກິດ-ສັງຄົມແຫ່ງຊາດເປັນຕົ້ນ: ການພັດທະນາພະ ລັງງານໄຟຟ້ານ້ຳຕົກ, ການສະ ໜອງນ້ຳໃນຕົວເມືອງ ແລະ ຊົນ ນະບົດ, ການທ່ອງທ່ຽວ, ການຂົນສົ່ງ, ກະສິກຳ, ອຸດສາຫະກຳ ແລະ ການຜະລິດສະບຽງອາ ຫານ.

ປັດຈຸບັນການນຳໃຊ້ຊັບ ພະຍາກອນນ້ຳແມ່ນມີທ່າອ່ຽງເພີ່ມຂຶ້ນຕາມຈັງຫວະການເພີ່ມຂຶ້ນຂອງປະຊາກອນ ແລະ ການຂະຫຍາຍຕົວທາງເສດຖະກິດ, ດ້ວຍສະພາບດັ່ງກ່າວຄາດວ່າບັນຫາການຂາດເຂີນນ້ຳ ແລະ ບັນຫາຂ້ໍຂັດແຍ່ງຕ່າງໆໃນການນຳໃຊ້ນ້ຳອາດຈະເພີ່ມຂຶ້ນໃນອະນາຄົດອັນໃກ້. ຖ້າຫາກວ່າບໍ່ມີມາດຕະການ ແລະ ວິທີການຄຸ້ມຄອງການນຳໃຊ້ນ້ຳທີ່ເໝາະສົມ ອາດສົ່ງຜົນກະທົບທາງລົບຕໍ່ ປະລິມານ, ຄຸນນະພາບນ້ຳ, ຕະ ຫລອດເຖິງສຸຂະພາບຂອງຄົນ ແລະ ສິ່ງແວດລ້ອມ. ພ້ອມດຽວ ກັນສະພາບການປ່ຽນແປງຂອງດິນຟ້າອາກາດໃນປະຈຸບັນ ເຮັດໃຫ້ເກີດມີໄພພິບັດທາງທຳມະຊາດເຊັ່ນ: ໄພນ້ຳຖ້ວມ ແລະ ໄພແຫ້ງແລ້ງເພີ່ມຄວາມຮຸນແຮງ ຫລາຍຂຶ້ນ.

ໃນໄລຍະຜ່ານມາລັດຖະ ບານກໍໄດ້ໃຫ້ຄວາມສຳຄັນສູງ ຕໍ່ວຽກງານຄຸ້ມຄອງຊັບພະຍາ ກອນນ້ຳແບບຍືນຍົງໂດຍມີການບັງຄັບໃຊ້ບັນດາກົດໝາຍ ແລະ ລະບຽບການຕ່າງໆທີ່ມີຢູ່, ແຕ່ກໍຍັງມີຂໍ້ຄົງຄ້າງ ແລະ ຊ່ອງວ່າງໃນການປະຕິບັດຕົວຈິງ ຊຶ່ງມີຄວາມຈຳເປັນທີ່ຈະຕ້ອງໄດຮັບການປັບປຸງແກ້ໄຂບັນຫາການຄຸ້ມຄອງຊັບພະຍາກອນນ້ຳໃຫ້ສອດຄ່ອງກັບສະພາບຕົວຈິງ ໂດຍສະເພາະການພັດທະນາພາ ລະບົດບາດ ແລະ ຍົກສູງຄວາມຮັບຜິດຊອບຂອງອົງການຈັດ ຕັ້ງຕ່າງໆ ແລະ ການນຳເອົາຫລັກ ສູດກ່ຽວກັບການຄຸ້ມຄອງຊັບພະຍາກອນນ້ຳເຂົ້າໃນການຮຽນ-ການສອນ.

ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ຊຶ່ງມີບົດບາດໃນການຄຸ້ມຄອງຊັບພະຍາກອນແຫລ່ງນ້ຳແບບປະສົມປະສານໃນທົ່ວປະເທດ ຕ້ອງເປັນເຈົ້າການປູູກຈິດສຳນຶກສ້າງຄວາມເຂົ້າໃຈໃຫ້ພາກສ່ວນຕ່າງໆໃຫ້ມີສ່ວນຮ່ວມໃນການປົກປັກຮັກສາຊັບພະຍາກອນນ້ຳໃຫ້ຍືນຍົງ.