ຮ້ອນນີ້ອາດມີທ່າອ່ຽງຂາດນ້ຳໃຊ້ສູງ ສຳລັບຢູ່ນະຄອນຫລວງວຽງຈັນ

    ລັດວິສາຫະກິດນ້ຳປະປານະຄອນຫລວງວຽງຈັນ ໃຫ້ຮູ້ວ່າ: ກໍດັ່ງແຕ່ລະປີ, ພໍກ້າວສູ່ລະດູຮ້ອນຄວາມຕ້ອງການນ້ຳກິນ, ນ້ຳໃຊ້ຂອງປະຊາຊົນ ແລະ ສຳນັ ກງານອົງການຕ່າງໆໃນແຕ່ລະມື້ຈະທະວີສູງຂຶ້ນປະມານ 320 ພັນກວ່າແມັດກ້ອນ, ໃນຂະນະ ທີ່ກຳລັງການຜະລິດຂອງໂຮງງານ 4 ໄດ້ພຽງ 180 ພັນແມັດກ້ອນຕໍ່ມື້ ຄືໂຮງງານຈີ່ນາຍໂມ້ຜະລິດໄດ້ຫລາຍກວ່າຫມູ່ມີເຖິງ 80 ພັນແມັດກ້ອນຕໍ່ມື້, ຖັດລົງມາແມ່ນເກົ້າລ້ຽວຜະລິດໄດ້ 60 ພັນແມັດກ້ອນຕໍ່ມື້, ສ່ວນໂຮງງານນ້ຳປະປາດົງຫມາກຄາຍ ແລະ ດົງບັງ ແຕ່ລະແຫ່ງ ຜະລິດໄດ້ພຽງ 20 ພັນແມັດກ້ອນຕໍ່ມື້, ຫມາຍວ່າຍັງເກືອບ 50% ຈຶ່ງຈະສາມາດຕອບ ສະຫນອງ ຄວາມຕ້ອງການຂອງ ສັງຄົມໄດ້ ແລະ ອາດມີທ່າອ່ຽງ ສູງທີ່ຈະຂາດນ້ຳໃຊ້ຢູ່ນະຄອນຫລວງວຽງຈັນໃນລະດູແລ້ງນີ້, ຖ້າເຮົາບໍ່ມີການປະຢັດໃນ
ການນຳໃຊ້ນ້ຳນັບທັງຜູ້ຜະລິດກໍຕ້ອງໄດ້ເອົາໃຈໃສ່ໃນການກວດກາ ປົວແປງລະບົບທໍ່ລຳລຽງນ້ຳໃຫ້ຮັບປະກັນ
ດີຂຶ້ນເພື່ອຫລຸດຜ່ອນການຕົກເຮ່ຍເສຍຫາຍຂອງນ້ຳ ແລະ ຜູ້ນຳໃຊ້ກໍຕ້ອງມີການປະຢັດເຊັ່ນກັນເຊິ່ງບໍ່ຄວນເອົານ້ຳປະປາ ໄປລ້າງລົດ ຫລື ຫົດຜັກ ແລະ ອື່ນໆ, ທຸກຄົນຕ້ອງຮູ້ປະຢັດ ນ້ຳເພື່ອສັງຄົມດ້ວຍກັນ. ບໍ່ດັ່ງ ນັ້ນກໍຈະຕົກຢູ່ໃນສະພາບບາງ ເຂດເນີນສູງ ແລະ ເຂດຊານ ເມືອງບ່ອນຫ່າງໄກຈາກຈຸດສະ ຫນອງນ້ຳອາດມີສະພາບນ້ຳປະປາຈະບໍ່ມາເປັນປົກກະຕິ. ດັ່ງນັ້ນ ຜູ້ຜະລິດນ້ຳປະປາຈຶ່ງຂໍຮຽກຮ້ອງມາຍັງປະຊາຊົນ ແລະ ຜູ້ຊົມໃຊ້ນ້ຳທົ່ວສັງຄົມຈົ່ງມີນ້ຳໃຈປະຢັດນ້ຳຊ່ວຍກັນເພື່ອທຸກຄົນໄດ້ ຊົມໃຊ້, ສ່ວນລັດວິສາຫະກິດຜະລິດນ້ຳປະປາກໍພວມສຸມໃສ່ຂະ ຫຍາຍການຜະລິດຂອງໂຮງງານນ້ຳປະປາດົງຫມາກຄາຍຂຶ້ນ ໃຫ້ໄດ້ 1 ແສນແມັດກ້ອນຕໍ່ມື້ຮອດປີ 2015 ທີ່ຈະມາເຖິງ.