ວັນທີ 10 ມີນານີ້, ຢູ່ບ້ານພັກທູດ (ຫຼັກ3),
ບ້ານວັດນາກ, ນະຄອນຫຼວງວຽງຈັນ ໄດ້ຈັດງານລ້ຽງສົ່ງນັກສຶກສາທີ່ໄດ້ຮັບທຶນການສຶກສາຂອງລັດຖະບານຍີ່ປຸ່ນ.
ໂດຍການເຂົ້າຮ່ວມຂອງທ່ານ ບົວລານ ສິລິປັນຍາ ລັດຖະ ມົນຕີຊ່ວຍວ່າການກະຊວງສຶກ
ສາທິການ ແລະ ກິລາ, ພະນະທ່ານ ຮິໂຣະຢູກິ ຄິຊິໂນະ ເອກອັກຄະຣາຊະທູດຍີ່ປຸ່ນປະຈຳລາວ,
ພ້ອມນັກສຶກສາລາວຈຳນວນ 20 ຄົນທີ່ໄດ້ຮັບທຶນດັ່ງກ່າວ.
ໃນໄລຍະ 20ປີຜ່ານມາ, ລັດຖະບານຍີ່ປຸ່ນໄດ້ສົ່ງນັກສຶກສາລາວໄປສຶກສາຕໍ່ທີ່ປະເທດຍີ່
ປຸ່ນຫຼາຍກວ່າ 900 ຄົນ, ດ້ວຍທຶນ ການສຶກສາຂອງກະຊວງສຶກສາຍີ່ປຸ່ນ MEXT ( Ministry
of Education of Japan). ສຳລັບປີນີ້, ລັດຖະບານຍີ່ປຸ່ນໄດ້ໃຫ້ທຶນແກ່ນັກສຶກສາລາວຈຳນວນ
20 ທຶນ. ໃນນີ້, ທຶນປະລິນຍາເອກ 1 ທຶນ, ປະລິນຍາໂທ 6 ທຶນ, ວິຊາ ຊີບຊັ້ນສູງທາງດ້ານເຕັກໂນໂລຢີ
8 ທຶນ ແລະ ວິຊາຊີບຊັ້ນສູງທົ່ວໄປ 5 ທຶນ. ໃນການເປີດ
ສະໝັກສອບເສັງທຶນການສຶກສາພາຍໃນປະເທດລາວປີນີ້ແມ່ນມີນັກສຶກສາມາລົງທະບຽນສະໝັກເພີ່ມຂື້ນເຖິງ
399 ຄົນ ທຽບກັບປີທີ່ຜ່ານມາ, ສຳລັບການສອບເສັງທຶນລັດຖະບານຍີ່ປຸ່ນນີ້ ບໍ່ພຽງແຕ່ແມ່ນການແຂ່ງຂັນພາຍໃນປະເທດລາວເທົ່ານັ້ນ,
ແຕ່ເປັນການແຂ່ງຂັນໃນທົ່ວໂລກ. ນັກສຶກສາທີ່ຈະໄປຮຽນຕໍ່ຍີ່ປຸ່ນແມ່ນຜ່ານການສອບເສັງຄັດເລືອກທີ່ເຂັ້ມງວດ
ແລະ ສາມາດຍອມຮັບໃນລະດັບໂລກ.
ພະນະທ່ານ ເອກອັກຄະ ຣາຊະທູດຍີ່ປຸ່ນປະຈຳລາວໄດ້ເນັ້ນເຖິງຄວາມສຳຄັນໃນການໄດ້ເຫັນຕົວຈິງຂອງປະເທດຍີ່ປຸ່ນ
ແລະ ພົບປະໂອ້ລົມກັບຄົນຍີ່ປຸ່ນໂດຍກົງ ກໍຄືການໄດ້ໄປສຶກສາຮ່ຳຮຽນໃນຂະແໜງການສະເພາະຂອງໂຕເອງ.
ພະນະທ່ານທູດຍັງໄດ້ກ່າວໃຫ້ກຳລັງໃຈແກ່ບັນດານັກສຶກສາ ແລະ ສະແດງຄວາມເຊື່ອໝັ້ນຕໍ່ນັກສຶກສາເຫຼົ່ານີ້
ຈະເຮັດໜ້າທີ່ເປັນດັ່ງຂົວຕໍ່ລະ ຫວ່າງລາວ-ຍີ່ປຸ່ນ ແລະ ຍັງໄດ້ແນະນຳໃຫ້ກັບນັກສຶກສາທີ່ຈະອອກເດີນທາງໄປຮຽນຕໍ່ທີ່ປະເທດຍີ່ປຸ່ນ.
ຈຸດທີໜຶ່ງຢາກໃຫ້ນັກສຶກສາທຸກຄົນເບິ່ງ ປະເທດຍີ່ປຸ່ນຕົວຈິງດ້ວຍຕາຂອງຕົນເອງ
ບໍ່ວ່າຈະເປັນຈຸດດີ ຫຼື ຈຸດບໍ່ດີ. ຫຼັງຈາກນັ້ນ, ຖ້າຄິດວ່າເປັນປະໂຫຍດສຳລັບໂຕເອງກໍຂໍໃຫ້ເອົາມານຳໃຊ້ເຂົ້າໃນການດຳລົງຊີວິດ
ແລະ ວຽກງານຕ່າງ. ຈຸດທີສອງ ໃນການໄປສຶກສາຢູ່ປະເທດຍີ່ປຸ່ນ ທຸກຄົນອາດຈະພົບກັບອຸປະສັກຕ່າງໆຂໍໃຫ້ຢ່າທໍ້ຖອຍ,
ຂໍໃຫ້ທຸກຄົນພະຍາຍາມຜ່ານຜ່າອຸປະສັກໃຫ້ໄດ້. ໂດຍສະເພາະການສຶກສາຮ່ຳຮຽນທ່າມກາງສະພາບອາກາດ
ແລະ ວັດທະນາທຳທີ່ແຕກຕ່າງຈາກປະເທດລາວນັ້ນ ບໍ່ແມ່ນສິ່ງທີ່ງ່າຍເລີຍ,
ແລະ ເຊື່ອໝັ້ນວ່າຄວາມທ້າທາຍທັງໝົດ ນັ້ນທຸກຄົນຈະສາມາດຜ່ານຜ່າມັນໄປໄດ້.
ໃນນາມຕາງໜ້າໃຫ້ນັກສຶກສາລາວທີ່ຈະເດີນທາງໄປສຶກສາຕໍ່ຢູ່ປະເທດຍີ່ປຸ່ນ,
ນາງ ວຽງມະນີ ບຸນຄ້ຳ ເຊິ່ງຈະໄປຮຽນໃນລະດັບປະລິນຍາເອກວິຊາການສຶກສາກ່ຽວກັບການຄຸ້ມຄອງສາທາລະນະສຸກ
ທີ່ມະຫາວິທະຍາໄລໂຕກຽວໄດ້ປະຕິຍານຕົນວ່າ:ຈະຕັ້ງໃຈ, ສຸມທຸກເຫື່ອແຮງສະຕິປັນຍາຂອງຕົນເຂົ້າໃສ່ການສຶກສາຮ່ຳຮຽນ
ແລະ ຈະນຳເອົາຄວາມຮູ້ທີ່ຮຽນມາປະກອບສ່ວນ ເຂົ້າໃນການສ້າງສາພັດທະນາປະເທດຊາດບ້ານເມືອງໃຫ້ຈະເລີນກ້າວໜ້າ.
No comments:
Post a Comment