ປະທານປະເທດແນະນຳເມືອງທຸລະຄົມສ້າງຕົນເອງເປັນຕົວແບບການຜະລິດກະສິກຳ

        ວັນທີ 31 ມີນາຜ່ານມາ, ທ່ານ ຈູມມາລີ ໄຊຍະສອນ ເລຂາທິການໃຫຍ່ຄະ ນະບໍລິຫານງານສູນກາງພັກ ປປ ລາວ, ປະ ທານ ປະເທດແຫ່ງ ສປປ ລາວ, ພ້ອມ ພັນລະຍາ ແລະ ຄະນະໄດ້ເຄື່ອນ ໄຫວຢ້ຽມຢາມ ແລະ ພົບປະໂອ້ ລົມຄະນະພັກ, ອຳ ນາດການປົກຄອງເມືອງທຸລະຄົມ, ແຂວງວຽງຈັນ ໂດຍມີທ່ານ ຄຳເມິງ ພົງທະດີ ກຳມະການສູນກາງ ພັກ, ເລຂາພັກແຂວງ, ເຈົ້າ ແຂວງໆວຽງຈັນ, ບັນດາທ່ານ ຮອງ ເຈົ້າແຂວງ, ເຈົ້າເມືອງ ແລະ ພະນັກງານລັດຖະກອນ ພາຍໃນເມືອງດັ່ງກ່າວໃຫ້ການ ຕ້ອນຮັບຢ່າງອົບອຸ່ນ. 

          ທ່ານ ຄຳທູນ ທອນເທບສຸພົນ ເຈົ້າເມືອງໆທຸລະຄົມ ໄດ້ລາຍງານວ່າ: ເມືອງທຸລະຄົມມີເນື້ອທີ່ທັງໝົດ 82.300 ເຮັກຕາ, ມີ 42 ບ້ານ, ມີພົນລະເມືອງທັງ ໝົດ 57.178 ຄົນ, ຍິງ 28.707 ຄົນ, ມີເນື້ຶ້ອທີ່ນາ 9.150 ເຮັກຕາ, ນາແຊງ 6.000 ເຮັກຕາ, ສະມັດຕະພາບໂດຍສະເລ່ຍ 5 ໂຕນກວ່າ ຕໍ່ເຮັກຕາ, ສະເລ່ຍເຂົ້າເປືອກຕໍ່ ຫົວຄົນໄດ້ 1.139 ກິໂລ ຕໍ່ຄົນຕໍ່ປີ, ຈັງຫວະການຂະຫຍາຍຕົວຂອງເສດຖະກິດບັນລຸ 9,5%, ປະຊາຊົນໄດ້ໃຊ້ໄຟຟ້າ 100%, ທຸກໆບ້ານມີເສັ້ນ ທາງທຽວໄດ້ຕະຫລອດປີ ແລະ ຍັງມີຄອບຄົວທຸກຍາກພຽງ 28 ຄອບຄົວ.

       ໃນໂອກາດນີ້, ທ່ານປະ ທານປະເທດໄດ້ເນັ້ນໜັກໃຫ້ຄະ ນະພັກ,ອຳນາດການປົກຄອງ ເມືອງທຸລະຄົມເລັ່ງສ້າງຄວາມ ເຂັ້ມແຂງດ້ານເສດຖະກິດໂດຍຖື ເອົາວຽກງານປູກຝັງ ແລະ ລ້ຽງ ສັດເປັນທ່າແຮງ, ມີການນຳໃຊ້ເຕັກນິກ, ວິທະຍາສາດ ອັນໃໝ່ເຂົ້າໃນການຜະລິດເປັນຕົ້ນແມ່ນການປູກເຂົ້າ, ປູກສາລີຫວານ, ການລ້ຽງສັດໃຫຍ່ດ້ວຍການປູກຫຍ້າແນໃສ່ສ້າງໃຫ້ ໄດ້ຕົວແບບດ້ານກະສິກຳ ແລະ ກາຍເປັນເມືອງເຂັ້ມແຂງຮອບດ້ານໃນຕໍ່ໜ້າເພື່ອຫລຸດຜ່ອນການແບກຫາບຂອງລັດຖະບານ ເປັນຕົ້ນໃຫ້ກຸ້ມຕົນເອງດ້ານເງິນເດືອນຂອງພະນັກງານ-ລັດຖະກອນ, ກ້າວໄປສູ່ການກຸ້ມຕົນເອງດ້ານການລົງທຶນຢູ່ພາຍໃນ ເມືອງຂອງຕົນດ້ວຍການນຳໃຊ້ທ່າແຮງທີ່ມີໃຫ້ເກີດຜົນປະໂຫຍກສູງສຸດເຊັ່ນ: ເປັນຕົ້ນແມ່ນທ່າແຮງທາງດ້ານກະສິກຳ, ການ ປູກເຂົ້າ ແລະ ການປູກຫຍ້າເພື່ອລ້ຽງສັດໃຫຍ່ເນື່ອງຈາກເມືອງທຸລະຄົມມີທົ່ງນາອັນກວ້າງຂວາງມີລະບົບຊົນລະປະທານແບບ ນ້ຳໄຫລເອງເຊິ່ງເປັນປັດໄຈຕົ້ນຕໍເຂົ້າໃນການຜະລິດກະສິກຳ, ຄຽງຄູ່ກັນນີ້ກໍຕ້ອງນຳໃຊ້ເຕັກນິກວິທະຍາສາດອັນໃໝ່ເຂົ້າໃນ ການຜະລິດເພື່ອຍົກສະມັດຕະພາບເຂົ້າໃຫ້ໄດ້ 6 ໂຕນຕໍເຮັກຕາເຊັ່ນ ການເຮັດນາໄຮ່ໃຫຍ່ຫວ່ານເມັດເຂົ້າດ້ວຍເຄື່ອງຈັກເຊິ່ງ ເປັນການຫລຸດຜ່ອນຂັ້ນຕອນການເຮັດນາ ແລະ ປະຢັດຕົ້ນທຶນອີກດ້ວຍ, ທັງນີ້ກໍເພື່ອສ້າງໃຫ້ເມືອງທຸລະຄົມກາຍເປັນເມືອງ ຜະລິດເຂົ້າເປັນສິນຄ້າ ແລະ ກາຍເປັນຕົວແບບດ້ານການປູກເຂົ້າໄດ້ຜົນຜະລິດ 6 ໂຕນຕໍ່ເຮັກຕາ, ເປັນຕົວແບບດ້ານການເຮັດ ນາໄຮ່ໃຫຍ່ ແລະ ຕົວແບບດ້ານການປູກຫຍ້າລ້ຽງສັດໃຫຍ່ສ້າງໃຫ້ເມືອງທຸລະຄົມກາຍເປັນເມືອງເຂັ້ມແຂງຮອບດ້ານຕາມທິດ ສາມສ້າງທັງເປັນເມືອງທີ່ມີເງື່ອນໄຂສະດວກທາງດ້ານພື້ນຖານໂຄງລ່າງຄົມມະນາຄົມ.

         ທ່ານ ປະທານປະເທດ ຍັງແນະນຳຕື່ມວ່າ: “ພ້ອມກັນນີ້, ກໍຕ້ອງສ້າງໃຫ້ຄະນະນຳຂອງເມືອງມີຄວາມເຂັ້ມແຂງດ້ານ ການບໍລິຫານລັດເພື່ອໃຫ້ເມືອງເປັນອົງການທີ່ມີຄວາມສາມາດໃນການນຳພາຂັ້ນບ້ານໄດ້ຢ່າງມີປະສິດທິຜົນ, ເອົາໃຈໃສ່ສ້າງ ບ້ານພັດທະນາ, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໂດຍສຸມໃສ່ແກ້ໄຂບັນຫາເສັ້ນທາງໃຫ້ມີຄວາມສະດວກເພື່ອຍູ້ ແຮງຂະບວນການຜະລິດເປັນສິນຄ້າ, ແກ້ໄຂຄວາມທຸກຍາກໂດຍມີພັກນຳພາ, ສ້າງໂຄງການພັດທະນາຢູ່ຂັ້ນບ້ານ, ກວດກາບັນ ດາຄອບຄົວທີ່ຍັງທຸກຍາກ ແລະ ດຶງເຂົ້າໄປຮ່ວມຢູ່ໃນແຕ່ລະໂຄງການເພື່ອໃຫ້ຫລຸດພົ້ນອອກຈາກຄວາມທຸກຍາກເທື່ອລະ ກ້າວ”.

         ໃນວັນດຽວກັນ, ທ່ານປະທານປະເທດຍັງໄດ້ໄປຢ້ຽມຢາມໂຄງການກໍ່ສ້າງຂົວຂ້າມນ້ຳງື່ມເມືອງເກົ່າ-ປາກກະຍຸງ, ສູນຜະລິດເມັດພັນບ້ານແຈ້ງ, ຟາມໝູແສງເດືອນ ແລະ ບ້ານຫາດໄຊນຳອີກ.