ລະວັງໂຈນງັດຕູ້ເຊບອາລະວາດໜັກ

          ເຈົ້າໜ້າທີ່ ປກສ ນະຄອນຫຼວງວຽງຈັນໃຫ້ຮູ້ວ່າ: ປັດຈຸບັນໄດ້ມີສະພາບ ຄົນຮ້າຍງັດຕູ້ເຊບ ເກີດຂຶ້ນຢ່າງຕໍ່ເນື່ອງຊຶ່ງພາຍໃນອາທິດຜ່ານມານີ້ໄດ້ເກີດຂຶ້ນແລ້ວ ກວ່າ 5 ຄັ້ງ ແລະ ມີຜົນເສຍຫາຍຫຼາຍສິບລ້ານກີບ, ຫຼ່າສຸດແມ່ນໃນວັນທີ 1 ເມສາ ນີ້, ເຫດການດັ່ງກ່າວເກີດຂຶ້ນຢູ່ໂຮງງານຕັດຫຍິບແຫ່ງໜຶ່ງຢູ່ບ້ານຊຳເກດ ເມືອສີໂຄດ ຕະບອງ ນະຄອນຫຼວງວຽງຈັນ ຊຶ່ງກ້ອງວົງຈອນປິດສາມາດບັນທຶກພາບຄົນຮ້າຍ ໄວ້ໄດ້ ແລະ ເຈົ້າໜ້າທີ່ກຳລັງເລັ່ງຕິດຕາມຕົວມາດຳເນີນຄະດີ.

        ເຈົ້າໜ້າທີ່ ກ່າວວ່າ: ປັດຈຸບັນສະພາບລັກຊັບໄດ້ເກີດຂຶ້ນຫຼາຍຈາກ ກຸ່ມ ແກ້ງມົ້ວສຸມຢາເສບຕິດ ແລະ ບໍ່ມີວຽກເຮັດງານ ທຳໂດຍສະເພາະແມ່ນປາກົດການລັກງັດຕູ້ເຊັບທີ່ກຳລັງເກີດຂຶ້ນຢ່າງຕໍ່ເນື່ອງ ຊື່ງພຽງ 3 ເດືອນຜ່ານມາເຫດການນີ້ເກີດຂຶ້ນກວ່າ 10 ເລື່ອງ, ສ່ວນໃຫຍ່ແມ່ນຢູ່ບໍລິສັດ ແລະ ບັນດາຮ້ານຕ່າງໆເມື່ອບໍ່ເຫັນ ມີຄົນຍາມກໍເຂົ້າໄປລັກ, ຊຶ່ງທາງເຈົ້າໜ້າທີ່ພວມ ເລັ່ງຕິດຕາມແກ້ໄຂສະພາບດັ່ງກ່າວໃຫ້ສະຫງົບລົງໂດຍໄວ.