laophatthananewspaper: ນັກສຶກສາລາວ 4 ຄົນ ໄດ້ທຶນໄປສຶກສາຕໍ່ຢູ່ສະຫະລັດອາເມລິກາ

11 June 2014

ນັກສຶກສາລາວ 4 ຄົນ ໄດ້ທຶນໄປສຶກສາຕໍ່ຢູ່ສະຫະລັດອາເມລິກາ

ນັກສຶກສາລາວ 4 ຄົນ ໄດ້ຮັບທຶນໄປສຶກສາຮຽນຕໍ່ຂັ້ນປະລິນ ຍາໂທຢູ່ສະຫະ ລັດອາເມລິກາໃນປີນີ້ ພາຍໃຕ້ທຶນການສຶກສາ Fulbright Scholarship Pro gram ຂອງກະຊວງການຕ່າງປະເທດ ສະຫະລັດອາເມລິກາ ແລະ ໃນລະຫວ່າງການເຂົ້າພົບກັບທ່ານ ແດນນຽວ ເອ ຄຣູນ ເອກອັກຄະລັດຖະທູດສະຫະລັດອາເມລິກາປະຈຳລາວ ຂອງນັກສຶກສາ. ທ່ານທູດ ໄດ້ກ່າວສະແດງຄວາມຍິນດີຊົມເຊີຍຕໍ່ນັກສຶກສາ ແລະ ຊຸກຍູ້ໃຫ້ນັກສຶກສາເຫລົ່ານັ້ນ ຈົ່ງນຳໃຊ້ໂອກາດສຳຄັນຄັ້ງນີ້ຕັ້ງໃຈຮ່ຳ ຮຽນເອົາຄວາມຮູ້ ເພື່ອມາພັດທະນາຕົນເອງ ແລະ ປະເທດຊາດໃຫ້ມີຄວາມຈະເລີນ.

ສຳລັບນັກສຶກສາທີ່ຈະເດີນທາງໄປສຶກສາຕໍ່ນີ້ ປະກອບມີທ້າວ ຄູນຄຳ ສີບຸນເຮືອງ ໄປຮຽນຕໍ່ຂະແໜງບັນຊາການເງິນ ຢູ່ມະຫາວິທະຍາໄລອາກຮອນ ໃນລັດໂອໄຮໂອ, ທ້າວ ກາວີ ຫອມສົມບັດ ໄປຮຽນຕໍ່ຂະແໜງວິສາຫະກິດ ຢູ່ມະຫາວິທະຍາໄລອາເມລິກາ ຢູ່ນະຄອນຫລວງວໍຊິງຕັນ ດີຊີ, ທ້າວ ມັດຕິພົບ ດວງມີໄຊ ຈະໄປຮຽນຕໍ່ຂະແໜງການສ້າງຟີມຮູບເງົາຢູ່່ມະຫາ

ວິທະຍາໄລຊີຮາຄິວ ລັດນິວຢອກ ແລະ ນາງ ວະນິດາ ກວ້າງວິຈິດ ຈະໄປຮຽນຕໍ່ຂະແໜງມະນຸດວິ ທະຍາ ຢູ່ມະຫາວິທະຍາໄລນອຟທ໌ ເຄໂຮລາຍນາ ສະເຕດ. ທຶນການສຶກສາດັ່ງກ່າວກວມລວມເອົາຄ່າທຳນຽມການສິດ ສອນທຸກຢ່າງ, ປີ້ຍົນໄປກັບ ແລະ ເບ້ຍລ້ຽງຕະຫລອດໄລຍະເວລາດຳລົງຊີວິດຢູ່ສອງປີ.

ທຶນການສຶກສາ Fulbright ເປັນທຶນການສຶກສາທີ່ໃຫຍ່ ແລະ ເປັນໂຄງການແລກປ່ຽນການສຶກສາລະຫວ່າງປະເທດທີ່ສຳ ຄັນຢູ່ໃນໂລກ ແລະ ທຶນການສຶກ ສາດັ່ງກ່າວຈັດຂຶ້ນເພື່ອສ້າງຄວາມເຂົ້າໃຈຮ່ວມກັນລະຫວ່າງປະຊາຊົນຊາວສະຫະລັດອາເມລິກາ ແລະ ປະຊາຊົນຢູ່ປະເທດອື່ນໆໃນໂລກ. ຜ່ານມາມີເຈົ້າໜ້າທີ່ລາວຫລາຍກວ່າ 80 ທ່ານ ເຄີຍໄປສຶກສາຮຽນຕໍ່ຊັ້ນປະ ລິນຍາໂທຈາກມະຫາວິທະຍາໄລແຫ່ງຕ່າງໆຂອງສະຫະລັດອາເມລິກາຜ່ານທຶນການສຶກສາດັ່ງກ່າວ. ປັດຈຸບັນ ໄດ້ເຮັດວຽກໃນຕຳແໜ່ງສຳຄັນຫລາຍຕຳແໜ່ງ ນັບທັງໃນອົງການຈັດຕັ້ງຂອງລັດຖະ ບານ, ພາກເອກະຊົນ ແລະ ອົງ ການຈັດຕັ້ງທີ່ບໍ່ຂຶ້ນກັບລັດຖະ ບານ ແລະ ສະຖານທູດສະຫະ ລັດອາເມລິກາຢູ່ນະຄອນຫລວງວຽງຈັນ ເປີດຮັບເອົາຟອມສະ ໝັກເສັງເອົາທຶນການສຶກສາ Fulbright Program ແຕ່ເດືອນມີນາຫາພຶດສະພາຂອງທຸກໆປີ. ນັກສຶກສາທີ່ສົນໃຈສາມາດສົ່ງ ອີເມວມາໄດ້ທີ່ VientianePublic Diplomacy@state.gov ເພື່ອສອບຖາມຂໍ້ມູນເພີ່ມຕື່ມ.