ຫາລືກ່ຽວກັບການພັດທະນາກະສິກຳອິນຊີ

     ​ໃນວັນທີ 14 ກໍລະກົດນີ້, ກົມປູກຝັງ, ກະຊວງ​ກະສິກຳ-ປ່າ​ໄມ້, ໄດ້ຈັດກອງປະ ຊຸມປຶກສາ ຫາລືກ່ຽວກັບການພັດ ທະນາກະສິກຳອິນຊີລາວຄັ້ງທີ 3 ຂຶ້ນ​ໂດຍການ ເປັນປະທານຂອງທ່ານ ວິ ໄລວັນ ພົມເຂ ລັດຖະມົນຕີວ່າການກະຊວງກະສິກຳ ແລະ ປ່າ ໄມ້.

      ກອງປະຊຸມ, ໄດ້ຮັບຟັງລາຍງານກ່ຽວກັບສະພາບການຜະລິດກະສິກຳອິນຊີໃນ ໄລຍະຜ່ານມາ ແລະ ສະພາບການພັດທະ ນາກະສິກຳອິນຊີຢູ່ລາວໃນປັດຈຸບັນ ແລະ ທິດທາງການພັດທະນາໃນອະນາຄົດ, ແລກປ່ຽນຄວາມ ຮູ້ ແລະ ປະສົບການກ່ຽວ ກັບການພັດທະນາກະສິກຳອິນຊີ ຂອງບັນດາປະເທດອື່ນໆ, ເພື່ອອຳນວຍຄວາມສະ ດວກໃນການແລກປ່ຽນຂໍ້ມູນຄວາມຮູ້ໃຫ້ ແກ່ພາກສ່ວນຕ່າງໆທັງພາກລັດ ແລະ ເອກະຊົນຢູ່ລາວກ່ຽວກັບມາດຕະຖານ, ລະບົບການກວດກາ ແລະ ການເຊື່ອມໂຍງກັບພາກອຸດສາຫະກຳທ່ອງທ່ຽວຢູ່ພາຍ ໃນປະເທດ, ປຶກສາຫາລື ຊອກຫາວິທີທາງ ແລະ ກິດຈະກຳຂອງແຕ່ລະພາກສ່ວນຈະສາມາດເຮັດຮ່ວມກັນໃນການສົ່ງເສີມ ການພັດທະນາກະສິກຳອິນຊີໃນອະນາຄົດ, ແນໃສ່ເຮັດໃຫ້ມີການລວມຕົວກັນຂອງຜູ້ຜະລິດ ແລະ ຜູ້ປະກອບການຕ່າງໆເພື່ອ ເຮັດໜ້າທີ່ໃນການຊຸກຍູ້ ແລະ ສະໜັບສະໜູນການຜະລິດກະສິກຳອິນຊີໃຫ້ມີຄວາມເຂັ້ມແຂງ.

     ​ໂອກາດ​ດັ່ງກ່າວ, ທ່ານ ລັດຖະມົນຕີວ່າການກະຊວງກະສິກຳ ແລະ ປ່າໄມ້ ໄດ້ກ່າວວ່າ: ການຜະລິດກະສິກຳອິນຊີແມ່ນ ໜຶ່ງໃນເປົ້າໝາຍຂອງກະສິກຳ ສະອາດ, ສປປ ລາວ ຖືວ່າມີຂໍ້ ໄດ້ປຽບຫລາຍດ້ານໃນການຜະລິດກະສິກຳສະອາດໂດຍສະ ເພາະມີທ່າແຮງທາງດ້ານທຳມະຊາດເຊິ່ງໄລຍະຜ່ານມາກະຊວງ ກະສິກຳ ແລະ ປ່າໄມ້ ໄດ້ຜັນຂະ ຫຍາຍນະໂຍບາຍກະສິກຳສະ ອາດລົງສູ່ພາກປະຕິບັດຕົວຈິງ ໂດຍການຍາດແຍ່ງການສະໜັບສະໜູນທັງພາຍໃນ ແລະ ຕ່າງ ປະເທດເຮັດໃຫ້ມີການຈັດຕັ້ງ ກະສິກຳສະອາດໂດຍສະເພາະການ ຜະລິດກະສິກຳອິນຊີທີ່​ໄດ້ຈັດຕັ້ງປະຕິບັດຢູ່ບັນດາເມືອງ ແລະ ແຂວງຕ່າງໆໃນທົ່ວປະ ເທດ, ພ້ອມນັ້ນກະຊວງກະສິກຳ ແລະ ປ່າໄມ້ຍັງໄດ້ພັດທະນານິຕິກຳຈຳນວນໜຶ່ງຂຶ້ນມາຮອງຮັບເປັນຕົ້ນມາດຕະຖານ ກະສິກຳ ອິນຊີ ແລະ ມາດຕະຖານກະສິກຳທີ່ດີ.