ເປີດຊຸດອົບຮົມນັກຂ່າວ 8 ແຂວງພາກເຫນືອ

        ຊຸດອົບຮົມນັກຂ່າວສຳລັບ 8 ແຂວງພາກເຫນືອ, ພາຍໃຕ້ ຫົວຂໍ້: ການ ປະຕິບັດເປົ້າຫມາຍ ສະຫັດສະວັດດ້ານການ ພັດທະນາ ແລະ ລົບລ້າງຄວາມທຸກ ຍາກ, ໄດ້ຈັດຂຶ້ນໃນວັນທີ 14-19 ກໍລະກົດນີ້, ທີ່ເມືອງ ແລະ ແຂວງຫລວງພະ ບາງ, ໂດຍສະມາຄົມ ນັກຂ່າວແຫ່ງ ສປປ ລາວ, ທີ່ໄດ້ຮັບການສະຫນັບສະ ຫນູນ ຈາກອົງການສະຫະປະຊາຊາດເພື່ອການພັດທະ ນາປະຈຳລາວ, ຊຶ່ງ ມີທ່ານ ສະຫວັນຄອນ ຣາຊະມຸນຕຣີ ລັດຖະມົນຕີຊ່ວຍວ່າ ການກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ອ່ອນຈັນ ສຸວັນນະລິດ ຫົວຫນ້າພະແນກຖະແຫລງຂ່າວ, ວັດທະນະທຳ ແລະ ທ່ອງ ທ່ຽວ ແຂວງຫລວງພະບາງ, ພ້ອມດ້ວຍນັກສຳມະນາກອນທີ່ມາຈາກ 8 ແຂວງພາກເຫນືອເຂົ້າ ຮ່ວມຫລາຍກ່ວາ50 ຄົນ.

     ໃນບົດຄຳເຫັນກ່າວເປີດຊຸດອົບຮົມດັ່ງກ່າວຂອງທ່ານລັດຖະມົນຕີຊ່ວຍໄດ້ຊີ້ໃຫ້ເຫັນວ່າ:  ຊຸດອົບຮົມຄັ້ງນີ້ມັນມີຄວາມ

ຫມາຍສຳຄັນຍິ່ງເພື່ອແນໃສ່ຍົກລະດັບຄວາມຮູ້ຄວາມສາມາດເພີ່ມຕື່ມໃຫ້ນັກຂ່າວຢູ່ທ້ອງຖິ່ນຮູ້ຈັກວິທີການກະກຽມກ່ອນ ໄປເອົາຂ່າວ, ການສຳພາດຂ່າວ, ຂຽນຂ່າວ ແລະ ວິທີສົ່ງຂ່າວກ່ຽວກັບສະພາບການຈັດຕັ້ງປະຕິບັດເປົ້າຫມາຍສະຫັດສະວັດ ດ້ານການພັດທະນາຢູ່ລາວ, ທີ່ຕິດພັນກັບ ການລົບລ້າງຄວາມທຸກຍາກ ຂອງປະຊາຊົນຢູ່ທ້ອງຖິ່ນ.   

       ທ່ານລັດຖະມົນຕີຊ່ວຍ ກ່າວວ່າ: ປັດຈຸບັນບໍ່ວ່າຢູ່ສູນ ກາງກໍຄືທ້ອງຖິ່ນຕ່າງໆນັ້ນການເຂົ້າເຖິງຂໍ້ມູນຂ່າວສານແມ່ນໄວ ແລະ ສະດວກກ່ວາຜ່ານມາ ເນື່ອງຈາກມີອີນເຕີແນັດ, ສັງ ຄົມອອນລາຍ, ໂດຍສະເພາະໂທ ລະສັບມືຖືເປັນພາຫະນະ, ນອກ ນັ້ນຍັງມີໂທລະພາບ, ວິທະຍຸກະຈາຍແສງ ແລະ ສື່ສິ່ງພິມຕ່າງໆ ທີ່ມີທັງພາສາລາວ ແລະ ຕ່າງ ປະເທດ. ດັ່ງນັ່ນມັນຮຽກຮ້ອງ ໃຫ້ຜູ້ບໍລິໂພກສື່ເຫລົ່ານັ້ນຕ້ອງໄດ້ມີການຮິ່ນຕອງ ແລະ ມີວິຈະລະ ຍານວ່າອັນໃດຖືກ, ອັນໃດຜິດ, ອັນໃດມີຈິງ ແລະ ບໍ່ມີຈິງ, ເມື່ອ ເປັນແນວນັ້ນນັກຂ່າວພວກເຮົາ ຍິ່ງມີຄວາມສຳຄັນຫລາຍໃນ ການບໍລິໂພກສື່ ແລະ ນຳເອົາຂໍ້ມູນຂ່າວສານຕ່າງໆຜ່ານສື່ ຂອງຕົນ, ດັ່ງນັ້ນນັກຂ່າວຕ້ອງມີຄວາມສະດຸ້ງໄວ, ຮູ້ ແລະ ເຂົ້າໃຈບັນຫາຢ່າງຖືກຕ້ອງກວ່າຄົນອື່ນເພື່ອນຳມາເຜີຍແຜ່ ໃຫ້ໄວ ທັນກັບສະພາບການ, ມີເນື້ອໃນຮອບຄອບ, ຄົບຖ້ວນ, ຊັດເຈນ ແລະ ມີຄວາມຮັບຜິດຊອບພ້ອມ ນັ້ນຕ້ອງມີເນື້ອໃນເລິກ ເຊິ່ງ, ແຫລມຄົມ, ການຕຳນິຕິຊົມຕ້ອງຢູ່ໃນຫລັກການ, ນິ້ມນວນຄ່ອງແຄ້ວ ແລະ ສ້າງສັນ.