ທ່ານນາງ
ວິໄລຄຳ ໂພສາລາດ ລັດຖະມົນຕີຊ່ວຍວ່າການກະ ຊວງໂຍທາທິການ ແລະ ຂົນສົ່ງ(ຍທຂ)
ໄດ້ໃຫ້ຮູ້ວ່າ: ລັດຖະ ບານພວມມີແຜນກໍ່ສ້າງ ແລະ ຍົກລະ ດັບເສັ້ນທາງລຽບແຄມຂອງແຕ່ເມືອງຫາດຊາຍຟອງ
ຫາເມືອງປາກງື່ມ ເພື່ອສ້າງເປັນຄັນຄູປ້ອງກັນນ້ຳຖ້ວມນະຄອນ ຫລວງວຽງຈັນ ເຊິ່ງເປັນໂຄງ
ການຫລຸດຜ່ອນຄວາມສ່ຽງໄພແຫ້ງແລ້ງ ແລະ ນ້ຳຖ້ວມ ສຳລັບບັນ ດາປະເທດໃນຂົງເຂດອະນຸພາກພື້ນແມ່ນ້ຳຂອງ
ເຊິ່ງມີມູນຄ່າທັງໝົດ 37,09 ລ້ານໂດລາສະ ຫະລັດ ຫລື ປະມານ 296 ຕື້ກວ່າກີບ. ມາຮອດປັດຈຸບັນແມ່ນສຳເລັດການທົບທວນ
ແລະ ປັບປຸງຄືນແຜນຈັດຕັ້ງປະຕິບັດໂຄງ ການຄາດວ່າຈະເລີ່ມລົງມືກໍ່ສ້າງໃນເດືອນກຸມພາ
ປີ 2015 ແລະ ຈະໃຫ້ສຳເລັດໃນຕົ້ນປີ 2018. ໃນໄລຍະກໍ່ສ້າງນີ້, ກະຊວງໂຍ ທາທິການ
ແລະ ຂົນ ສົ່ງຈະສົມທົບກັບພະແນກໂຍທາທິການ ແລະ ຂົນສົ່ງນະຄອນຫລວງວຽງຈັນເພື່ອກວດກາສະພາບເສັ້ນທາງ
ແລະ ແກ້ໄຂສ້ອມແປງເສັ້ນທາງຊົ່ວຄາວໃນບ່ອນທີ່ຈຳເປັນເພື່ອຮັບປະກັນການສັນຈອນໃຫ້ມີຄວາມສະດວກ.
ສ່ວນໄລຍະການກໍ່ສ້າງກະ ຊວງດັ່ງກ່າວຈະໄດ້ຊີ້ນຳໃຫ້ບໍລິສັດຮັບເໝົາກໍ່ສ້າງເອົາໃຈໃສ່ຮັບປະກັນການໄປມາ.
ສຳລັບໂຄງການກໍ່ສ້າງເສັ້ນທາງບາງຈຸດທີ່ເຮັດໃຫ້ການໄປມາພົບຄວາມຫຍຸ້ງຍາກ,
ຍ້ອນການສ້ອມແປງບໍ່ແລ້ວຈັກ ເທື່ອ ໂດຍສະເພາະເສັ້ນທາງແຕ່ ບ້ານຊຳເຄ້ ຫາ ບ້ານໂຊກນ້ອຍ,
ເສັ້ນທາງວັງຊາຍ ຫາ ຫົວຂົວ ນັ້ນກໍມີຫລາຍສາເຫດເປັນຕົ້ນແມ່ນບໍລິສັດຮັບເໝົາກໍ່ສ້າງບໍ່ສາ
ມາດປະຕິບັດໂຄງການໄດ້ເນື່ອງຈາກຂາດເຂີນທຶນໝູນວຽນບໍ່ຄ່ອງຕົວ, ພາຫະນະກົນຈັກ,
ບຸກ ຄະລາກອນບໍ່ພຽງພໍຈຶ່ງເປັນສາເຫດເຮັດໃຫ້ໂຄງການຊັກຊ້າ ແລະ ແກ່ຍາວມາດົນ
ເຮັດໃຫ້ມີຫາງສຽງຈາກສັງຄົມໃນທາງລົບ. ເພື່ອແກ້ໄຂບັນຫາ, ກະຊວງ ຍທຂ ໄດ້ຊີ້ນຳໃຫ້ພະແນກໂຍທາທິການ
ແລະ ຂົນສົ່ງນະຄອນຫລວງວຽງຈັນຊຸກຍູ້ໃຫ້ບໍລິສັດຮັບເໝົາເລັ່ງລົງມືກໍ່ສ້າງ, ພ້ອມທັງສ້ອມແປງເສັ້ນທາງໃຫ້ຮັບປະກັນການສັນຈອນໄປມາສະດວກໃນໄລຍະລະດູຝົນ
ແລະ ກວດກາຄືນການປະຕິບັດສັນຍາຂອງບໍລິສັດຜູ້ລົງທຶນ, ຖ້າບໍລິສັດໃດບໍ່ສາມາດປະຕິບັດໄດ້ກໍໃຫ້ຄົ້ນຄວ້າຊອກເອົາບໍລິສັດທີ່ມີຄຸນສົມບັດ
ແລະ ຄວາມພ້ອມຫລາຍດ້ານເຂົ້າມາດຳເນີນການກໍ່ສ້າງແທນ.
No comments:
Post a Comment