laophatthananewspaper: ເຈົ້າຂອງສະຖານີຂົນສົ່ງສາຍເໜືອຊີ້ແຈງການບໍລິການຢູ່ສະຖານີຕົນ

ພາຍຫລັງໜັງສືພິມ ລາວພັດທະນາ ໄດ້ລົງພິມຂ່າວໃນວັນທີ 4 ກຸມພາ 2013 ໃນຫົວຂໍ້ “ຄວນເບິ່ງຄືນການເກັບເງິນເຂົ້າສະຖານີຂົນສົ່ງໂດຍສານສາຍເໜືອ-ໃຕ້”. ສະ ນັ້ນ ໃນວັນທີ 6 ກຸມພານີ້, ທ່ານນາງ ຈິດປະສົງ ຫລວງເດດມີໄຊ ອຳນວຍການສະຖານີຂົນສົ່ງໂດຍ ສານສາຍເໜືອ ໄດ້ອອກມາໃຫ້ ການຊີ້ແຈງເຖິງກໍລະນີດັ່ງກ່າວຕໍ່ນັກຂ່າວໜັງສືພິມລາວພັດທະນາ ກ່ຽວກັບການເກັບເງິນນຳລົດທີ່ຜ່ານເຂົ້າໄປທາງດ້ານຫລັງຂອງສະຖານີ ເຊິ່ງຜູ້ໃຊ້ບໍລິການຫລາຍຄົນເຫັນວ່າບໍ່ສົມຄວນທີ່ຈະຕ້ອງມີການເກັບເງິນໃນລັກສະນະດັ່ງກ່າວ.

ຕໍ່ບັນຫາດັ່ງກ່າວ,ເຈົ້າຂອງສະຖານີຂົນສົ່ງໂດຍສານສາຍເໜືອ ອະທິບາຍວ່າ: ສະຖານີຂົນສົ່ງໂດຍສານສາຍເໜືອແມ່ນສະຖານທີ່ໃຫ້ບໍລິການຂົນສົ່ງໂດຍສານຄົນ,ຂົນສົ່ງສິນຄ້າທີ່ໃຫຍ່ແຫ່ງໜຶ່ງໃນປະເທດ. ສະນັ້ນ ທຸກການບໍລິການຢູ່ສະຖານີແຫ່ງນີ້ລ້ວນແຕ່ໄດ້ມີການອອກແບບມາ ເພື່ອອຳນວຍຄວາມສະດວກສະບາຍຕໍ່ຜູ້ທີ່ມາໃຊ້ບໍລິການເປັນຢ່າງດີນັບແຕ່ການຈັດສັນສະ ຖານທີ່ຈອດລົດ, ອຸປະກອນລໍ້ຍູ້ ເພື່ອຂົນສິນຄ້າຈາກໜ້າສະຖານີເຂົ້າໄປໃນອາຄານສະຖານີ ແລະ ອື່ນໆໂດຍບໍ່ໄດ້ມີການເກັບຄ່າບໍລິການແຕ່ຢ່າງໃດ.

ສຳລັບການເກັບເງິນລົດໃຫຍ່ລາຄາ 5.000 ກີບ ທີ່ຜ່ານເຂົ້າໄປທາງດ້ານຫລັງສະຖານີ ເຊິ່ງຜູ້ໃຊ້ບໍລິການຫລາຍຄົນສົນໃຈນັ້ນ ຄວາມຈິງແລ້ວ,ລະບຽບຂອງສະຖານີແມ່ນບໍ່ອະນຸຍາດຜູ້ທີ່ມາສົ່ງຍາດພີ່ນ້ອງ ຫລື ສິນຄ້າ ເພື່ອຝາກໄປນຳລົດໂດຍສານຕ້ອງຂີ່ເຂົ້າໄປດ້ານໃນຂອງສະຖານີ ເພາະວ່າບັນຫາອັນທີໜຶ່ງແມ່ນເພື່ອຄວາມເປັນລະບຽບ, ຄວາມສະດວກ ແລະ ຄວາມປອດໄພ ເນື່ອງຈາກວ່າໃນໄລຍະຜ່ານມາ ອີງໃສ່ບົດຮຽນຈາກການປະປ່ອຍໃຫ້ລົດເຂົ້າແບບຊະຊາຍ ເຫັນວ່າເກີດສະພາບສັບສົນຂອງຜູ້ໂດຍ ສານ, ລົດທີ່ມາສົ່ງສິນຄ້າກໍຈອດຊະຊາຍກີດຂວາງການເຂົ້າ-ອອກຂອງລົດໂດຍສານ ບາງເທື່ອເກີດມີການຕຳ ຫລື ລົດດາດກັນຈົນເຖິງຂັ້ນເອົາເຈົ້າໜ້າທີ່ມາໄກ່ເກັ່ຍ. ນອກຈາກນີ້ ຍັງເກີດບັນຫາກຸ່ມຄົນບໍ່ດີສວຍໂອກາດລັກເຄື່ອງຂອງຜູ້ໂດຍສານກໍມີຫລາຍກໍລະ ນີ ແລະ ຄວາມປອດໄພອື່ນໆ. ດັ່ງ ນັ້ນ ສະຖານີຈຶ່ງບໍ່ອະນຸຍາດໃຫ້ລົດສ່ວນຕົວຂອງຜູ້ມາໃຊ້ບໍລິ ການຕ້ອງແລ່ນເຂົ້າໄປຮອດດ້ານຫລັງສະຖານີ ເພາະວ່າຢາກໃຫ້ຈອດຢູ່ດ້ານໜ້າສະຖານີທີ່ໄດ້ຈັດສັນໃຫ້ ສາມາດຮອງຮັບລົດເຂົ້າ ຈອດໄດ້ 150-200 ຄັນ ແລະ ບໍ່ໄດ້ເສຍຄ່າ. ສ່ວນເຄື່ອງຂອງຕ່າງໆ ຖ້າຫລາຍກໍມີລໍ້ຍູ້ພ້ອມໃຫ້ບໍລິການຕະຫລອດວັນ ໂດຍບໍ່ໄດ້ເສຍຄ່າບໍລິການເຊັ່ນດຽວກັນ. ຈາກບັນຫາດັ່ງກ່າວນັ້ນ ຈຶ່ງມີການວາງລະບຽບອອກມາ ຄືຖ້າຜູ້ໃຊ້ບໍລິການທ່ານໃດທີ່ຕ້ອງການຢາກເອົາລົດຜ່ານໄປດ້ານຫລັງແມ່ນເສຍຄ່າຜ່ານ 5.000 ກີບ ເຊິ່ງເງິນທີ່ເກັບໄດ້ຈາກລະບຽບດັ່ງ ກ່າວນັ້ນ ກໍແມ່ນເອົາໄປນຳໃຊ້ຈ່າຍໃຫ້ພາກສ່ວນອະນາໄມ, ປ້ອງກັນເວນຍາມ ແລະ ອື່ນໆ ເພື່ອຮັບປະກັນໃຫ້ສະຖານີມີຄວາມເປັນລະບຽບຈົບງາມ, ສະດວກສະບາຍ ແລະ ມີຄວາມປອດໄພຂອງຜູ້ໂດຍສານ ແລະ ສິນຄ້າຕ່າງໆ.