ເຕືອນລະວັງໄພນ້ຳຖ້ວມ

     ອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ຮ່ອງຄວາມກົດດັນອາກາດຕ່ຳໄດ້ພັດຜ່ານເຂດພາກເໜືອ, ພາກກາງດ້ວຍກຳລັງ ປານກາງສົມທົບກັບກະແສລົມຕາເວັນຕົກສ່ຽງໃຕ້ພັດປົກຄຸມຢູ່ທົ່ວທຸກພາກ, ເຊິ່ງມີ​ລັກ​ສະ​ນະ​ເຊັ່ນ​ນີ້ ​ໄດ້ເຮັດໃຫ້ມີຝົນຕົກໃນ ລະດັບຄ່ອຍຫາປານກາງຕິດຕໍ່ກັບຫລາຍວັນ, ເຮັດໃຫ້ລະດັບນ້ຳຂອງ ຢູ່ແຂວງຈຳປາສັກ ເວລາ 7 ໂມງເຊົ້າ ວັນທີ 31 ກໍລະ ກົດຜ່ານມານີ້, ແທກໄດ້ 11,8 ຊັງຕີແມັດ, ເຊິ່ງກາຍເຂດລະວັງໄພແລ້ວ( ເຂດລະວັງໄພ 11 ແມັດ) ແລະ ແມ່ນ້ຳສາຂາ ຕ່າງໆ ກໍໄດ້ຂຶ້ນສູງກວ່າເຂດລະວັງໄພ ແລະ ໃກ້ກັບເຂດອັນຕະລາຍເຊັ່ນ: ນ້ຳ ເຊຈຳພອນ (ແກ້ງກອກ) ແທກ ໄດ້ 7,95 ຊັງຕີແມັດ (ເຂດລະວັງ ໄພແມ່ນ 7,50 ຊັງຕີແມັດ), ນ້ຳເຊບັ້ງໄຟ​ (ຂົວເຊ) ແທກໄດ້ 18,50 ຊັງຕີແມັດ, ຊຶ່ງເປັນລະດັບທີ່ອັນຕະລາຍ, ສະພາບຝົນຍັງຈະສືບ ຕໍ່ຕົກໃນລະດັບຄ່ອຍຫາປານກາງ ໃນໄລຍະ 1 ຫາ 2 ວັນຕໍ່ໜ້າ, ກໍອາດຈະເຮັດໃຫ້ລະດັບນ້ຳສູງຂຶ້ນ

ຕື່ມອີກ. ດັ່ງນັ້ນ, ຈຶ່ງຂໍແຈ້ງເຕືອນມາຍັງອຳນາດການປົກຄອງ, ພໍ່ແມ່ປະຊາຊົນທີ່ອາໄສຢູ່ເຂດແຂວງຈຳປາສັກ (ລຽບຕາມ ແຄມນ້ຳຂອງ) ຈົ່ງມີສະຕິລະວັງຕົວສູງຕໍ່ສະພາບນ້ຳຖ້ວມ ແລະ ຂໍໃຫ້ຍົກຍ້າຍວັດຖຸສິ່ງຂອງໄປໄວ້ທີ່ສູງ, ພ້ອມທັງເຄື່ອນຍ້າຍ ສັດລ້ຽງໄປໄວ້ບ່ອນທີ່ປອດໄພ ແລະ ຂໍໃຫ້ຕິດຕາມການລາຍງານຂ່າວພະຍາກອນອາກາດ ແລະ ລະດັບນ້ຳຈາກກົມອຸຕຸນິຍົມ ແລະ ອຸທົກກະສາດເປັນປະຈຳ.