ແພດໂຮງໝໍແມ່ ແລະ ເດັກສາມາດບົ່ງມະຕິ ແລະ ຜ່າຕັດລູກຝາແຝດທ້ອງຕິດກັນມີຫົວໃຈດຽວຊ່ວຍແມ່ປອດໄພໄດ້

         ນາງ ທອງ (ນາມສົມມຸດ) ປະຊາຊົນອາຢູ່ເມືອງໜຶ່ງຂອງນະຄອນຫຼວງວຽງ ຈັນ ຖືພາລູກແຝດໄດ້ 25 ອາທິດ, ຕ້ອງຕັດສິນໃຈຜ່າຕັດເອົາລູກອອກ, ຫຼັງເຂົ້າ ກວດດ້ວຍຄື້ນສຽງ 4 ມິຕິຢູ່ໂຮງໝໍແມ່ ແລະ ເດັກ ເຫັນວ່າຜູ້ກ່ຽວຖືພາລູກແຝດ ເພດຍິງ, ທັງສອງຜົ້ງທ້ອງຕິດກັນ ແລະ ມີຫົວໃຈດຽວກັນ, ນີ້ແມ່ນກໍລະນີທຳອິດ ທີ່ພົບເຫັນຢູ່ໂຮງໝໍແມ່ ແລະ ເດັກຂອງລາວ ເຮົາ, ຕາມຫຼັກວິທະຍາແພດແລ້ວ ເດັກຈະມີຊີວິດແມ່ນເປັນໄປໄດ້ຍາກ ແລະ ຖ້າປ່ອຍໃຫ້ຖືພາຮອດເດືອນຄອງຈະ ເຮັດໃຫ້ການຄອດມີຄວາມສ່ຽງສູງ ແລະ ຈະມີຜົນກະທົບຫຼາຍຢ່າງຕາມມາເນື່ອງຈາກການທີ່ມີຫົວໃຈດວງດຽວຮ່ວມກັນ ຂອງເດັກ, ດັ່ງນັ້ນ ທີມແພດຂອງໂຮງໝໍແມ່ ແລະ ເດັກ ກໍໄດ້ອະທິບາຍໃຫ້ພໍ່ແມ່ຂອງເດັກ ແລະ ສະ ເໜີໃຫ້ໄປກວດ ເພີ່ມຕື່ມຢູ່ຕ່າງປະເທດທີ່ມີເງື່ອນໄຂກວ່າບ້ານເຮົາ, ແຕ່ເນື່ອງຈາກຄອບຄົວບໍ່ມີເງື່ອນໄຂ ຈິ່ງຕັດສິນໃຈຜ່າຕັດ

ເອົາເດັກອອກເພື່ອຄວາມປອດໄພຂອງຜູ້ເປັນແມ່, ມາຮອດວັນທີ 30 ກໍລະກົດຜ່ານມ ທາງທີມງານຜ່າຕັດຂອງໂຮງໝໍແມ ແລະ ເດັກ ໄດ້ປຶກສາຫາລືກັນຢ່າງຮອບຄອບ ແລະ ລົງມືຜ່າຕັດເອົາເດັກອອກໄດ້ສຳເລັດຜ່ານການກວດຂອງຜູ້ຊ່ຽວຊານ ເຫັນວ່າເດັກທັງ ສອງຖືກກັບການບົ່ງມະຕິຂອງຄື້ນສຽງ 4 ມີຕິ ແລະ ຜູ້ເປັນແມ່ແມ່ນປອດໄພດີ.

        ທ່ານ ຮສ ດຣ ບົວວັນ ແສນສະຖິດ, ອຳນວຍການໂຮງໝໍດັ່ງກ່າວ, ທັງເປັນຫົວໜ້າທີມງານຜ່າຕັດຄັ້ງນີ້ ກ່າວວ່າ: ການ ຜ່າຕັດເອົາເດັກແຝດຕິດກັນອອກມີທັງຜົນດີ ແລະ ຜົນເສຍ, ຜົນດີແມ່ນເຄື່ອງມືທີ່ທັນສະໄໝທາງການແພດສາມາດກວດ ແລະ ບົ່ງມະຕິພະຍາດໄດ້ຖືກຕ້ອງ ເຮັດໃຫ້ສາມາດຮູ້ກ່ອນ ແລະ ສາມາດຊ່ວຍຄົນເຈັບເພື່ອບໍ່ໃຫ້ເກີດຄວາມສ່ຽງຕ່າງໆຕາມ ມາ ແລະ ຜົນເສຍແມ່ນມີຜົນກະທົບຕໍ່ຈິດໃຈຂອງຜູ້ເປັນພໍ່ແມ່ ເພາະເດັກໄດ້ເສຍຊີວິດຫຼັງຜ່າຕັດອອກມາປະມານ 20 ນາທີເທົ່າ ນັ້ນ, ສ່ວນຜູ້ເປັນແມ່ນຂອງເດັກໄດ້ກ່າວຕໍ່ນັກຂ່າວພວກເຮົາຫຼັງຜ່າຕັດວ່າ: ຫຼັງຈາກກວດພົບວ່າມີລູກແຝດຕິດກັນ ແລະ ຮ່ວມ ຫົວໃຈດຽວກັນ ບໍ່ສາມາດລ້ຽງໄດ້ ເຖິງຄອບຄົວຜົວເມຍຈະມີຄວາມເສຍໃຈແຕ່ກໍຕ້ອງຕັດສິນໃຈເຮັດຕາມ ຫຼັກວິທະຍາສາດ ການແພດເພື່ອຄວາມປອດໄພຂອງແມ່ໄວ້ດີກວ່າ.