laophatthananewspaper: ສື່ມວນຊົນລາວໄດ້ຮັບການຍົກລະດັບຂື້ນເທື່ອລະກ້າວ

ເນື່ອງໃນໂອກາດລະນຶກວັນສື່ມວນຊົນ ຄົບຮອບ 64 ປີ ວັນທີ 13 ສິງຫາທີ່ຈະມາເຖິງ, ທ່ານວິໄລທອງ ສີຊານົນ ຫົວໜ້າສະຖາບັນສື່ມວນຊົນ ແລະ ວັດທະນະທຳ ກະຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ ໄດ້ໃຫ້ສຳພາດຜ່ານໜັງ ສືພິມລາວພັດທະນາຂອງພວກເຮົາກ່ຽວກັບການປະຕິບັດພາລະບົດບາດຂອງຂະແໜງການຕົນໃນໄລຍະທີ່ຜ່ານມາ ເຊິ່ງນັບວ່າເປັນຂະແໜງການໜຶ່ງທີ່ໄດ້ປະກອບ ສ່ວນສຳຄັນເຂົ້າໃນການສ້າງບຸກຄະລາກອນໃຫ້ແກ່ສື່ມວນຊົນລາວເຮົາ ໄດ້ນັບມື້ເຕີບໃຫຍ່ເຂັ້ມແຂງນັບທັງດ້ານປະລິມານ ແລະ ຄຸນນະພາບ.

ທ່ານຫົວໜ້າສະຖາບັນກ່າວວ່າ: ສະຖາບັນສື່ມວນຊົນເປັນຂະແໜງການໜຶ່ງທີ່ຂຶ້ນກັບກະ ຊວງຖະແຫລງຂ່າວ, ວັດ ທະນະທຳ ແລະ ທ່ອງທ່ຽວ ມີພາລະບົດບາດໃນການສ້າງບຸກຄະລາກອນໃນຂົງເຂດວຽກງານສື່ມວນຊົນ, ຂະແໜງການວັດ ທະນະທຳ ແລະ ທ່ອງທ່ຽວ ດ້ວຍການເຝິກອົບຮົມ ນັບທັງໄລຍະສັ້ນ ແລະ ໄລຍະຍາວ, ທັງຢູ່ຂັ້ນສູນກາງ ແລະ ທ້ອງຖິ່ນໃນທົ່ວປະເທດ, ເພື່ອແນໃສ່ຕອບສະ ໜອງບຸກຄະລາກອນຜູ້ມີຄວາມຮູ້, ຄວາມສາມາດໃຫ້ແກ່ສື່ຕ່າງໆໄດ້ພຽງພໍ ແລະ ສາມາດຕອບສະໜອງຄວາມຮຽກຮ້ອງຕ້ອງການໃນການ

ພັດທະນາໃຫ້ສື່ພວກເຮົາ ຂະຫຍາຍຕົວດ້ວຍບາດກ້າວອັນໜັກແໜ້ນ, ປະ ກອບສ່ວນສຳຄັນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມເຂັ້ມແຂງ. ທ່ານຫົວໜ້າສະຖາບັນໃຫ້ທັດສະນະວ່າ: ໃນຜ່ານມາການສ້າງຊັບພະຍາກອນນັກຂ່າວຍັງເຮັດແບບກະແຈກກະຈາຍ ແລະ ຍັງຂາດປະສິດທິຜົນ ເຮັດໃຫ້ລະດັບຄວາມຮູ້ຄວາມສາມາດ, ການຂີດຂຽນຂອງນັກຂ່າວເພື່ອຮັບໃຊສັງຄົມບໍ່ທັນເຂົ້າເຖີງເນື້ອໃນຈິດໃຈ, ບາງບົດຂີດຂຽນກໍຍັງບໍ່ສາມາດສ່ອງແສງພຶດຕິກຳຕົວຈິງ ແລະ ນັກຂຽນຍັງບໍ່ສາມາດກ້າຄິດກ້າສະແດງອອກໃນການສ່ອງແສງບັນ ຫາຕ່າງໆ ແລະ ຍັງບໍ່ທັນນຳຫາງສຽງສັງຄົມແຕ່ແນວໃດກໍດີເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ ແລະ ແນວທາງນະໂຍບາຍຂອງພັກ-ລັດ ໃນການໃຫ້ສິດເສລີພາບຕໍ່ສື່ມວນຊົນ ເພື່ອຕຳນິວິຈານສົ່ງຂ່າວຢ່າງມີສີສັນ ແລະ ເພື່ອຄຸນນະພາບຂອງນັກຂ່າວໃຫ້ດີຂຶ້ນ ສະຖາບັນສື່ມວນ ຊົນ ໄດ້ເນັ້ນການຝຶກອົບຮົມທັງໄລຍະສັ້ນ ແລະ ໄລຍະຍາວ ຄື: ໃນຕົ້ນປີນີ້ ສະຖາບັນສື່ມວນຊົນ ສາມາດຈັດຊຸດ ເຝິກອົບຮົມໃຫ້ນັກຂ່າວຫຼາຍກ່ວາ 5 ຊຸດ ຊຶ່ງແຕ່ລະຊຸດມີນັກຝຶກອົບຮົມມາຈາກທ້ອງຖິ່ນ ແລະ ຂະແໜງການຕ່າງໆເຂົ້າຮ່ວມຫຼາຍກວ່າ 40 ຄົນ, ພ້ອມດຽວກັນ ຍັງໄດ້ຊຸກຍູ້ແລກປ່ຽນບົດຮຽນຮ່ວມມືກັບຫຼາຍ ສະຖາບັນທັງພາຍໃນ ແລະ ຕ່າງປະເທດ ເປັນຕົ້ນແມ່ນສະຖາບັນຕ່າງໆ ສສ ຫວຽດນາມ ໄດ້ ປະກອບສ່ວນເຂົ້າໃນການບຳລຸງກໍ່ສ້າງ ແລະ ພັດທະນາບຸກຄະລາກອນໃນຂະແໜງສື່ມວນຊົນຫຼາຍສຸດໃນແຕ່ລະປີດ້ວຍຫຼາຍຮູບແບບ, ເຊິ່ງການເຝິກອົບ ຮົມດັ່ງກ່າວໄດ້ຊ່ວຍຍົກລະດັບຄວາມຮູ້ຄວາມສາມາດປະສົບການ ແລະ ສ້າງຄວາມຊຳນິຊຳນານໃຫ້ກັບພະນັກງານທີ່ປະຕິບັດ ໜ້າທີ່ວຽກງານສື່ມວນຊົນໄດ້ດີຂຶ້ນ.

ທ່ານຫົວໜ້າສະຖາບັນໃຫ້ທັດສະນະຕຶ່ມວ່າ: ໃນຜ່ານມາທາງສະຖາບັນສື່ມວນຊົນໄດ້ປະກອບສ່ວນຢ່າງຕັ້ງໜ້າເຂົ້າໃນການເຝິກອົບຮົມໃຫ້ກັບພະນັກງານສື່ມວນຊົນມາແລ້ວຫຼາຍຊຸດ, ແຕ່ກໍຍັງມີຂໍ້ຫຍຸ້ງຍາກຫຼາຍປະການທີ່ທາງສະຖາບັນ ຕ້ອງໄດ້ຜ່ານຜ່າແກ້ໄຂເປັນຕົ້ນແມ່ນບັນຫາດ້ານງົບປະມານ ແລະ ບຸກຄະລາກອນທີ່ຮັບໃຊ້ເຂົ້າໃນການຝຶກອົບຮົມຍັງມີຈຳກັດ, ຊຶ່ງເປັນຈະທີ່ສະຖາບັນສື່ມວນຊົນຈະຕ້ອງໄດ້ເອົາໃຈໃສ່ແກ້ໄຂໃຫ້ດີຂຶ້ນກວ່າເກົ່າ.