ສານປະຊາຊົນແຂວງຫົວພັນຕັດສີນຈຳຄຸກຜູ້ລັກຊັບພົນລະເມືອງ

    ທ້າວ ແພງ ອາຍຸ 29 ປີ ແລະ ທ້າວ ສອນ ອາຍຸ 30 ປີ ທັງສອງ ຢູ່ບ້ານຫ້ວຍລາງ, ເມືອງຊຽງຄໍ້, ແຂວງຫົວພັນ, ຖືກສານ ປະຊາຊົນແຂວງຫົວພັນຕັດສີນລົງໂທດໃຫ້ຈຳຄຸກເປັນເວລາ 3 ປີ 6 ເດືອນພ້ອມປັບໃໝເງິນຜູ້ລະໜຶ່ງລ້ານກີບໃນຂໍ້ຫາລັກ ຊັບ, ໂດຍ ທັງສອງຖືກເຈົ້າໜ້າທີ່ກັກຕົວໄດ້ເມື່ອທ້າຍປີ 2012 ຍ້ອນເຄື່ອນໄຫວລັກງົວຂອງປະຊາຊົນໃນເຂດເມືອງຊຽງຄໍ້ມາ ແລ້ວສິບກວ່າໂຕ ແລະ ແບ້ ຈຳນວນໜຶ່ງ ເພື່ອສົ່ງຂາຍໃຫ້ພໍ່ຄ້າສັດຊາວຕ່າງປະເທດ.

     ຂ່າວໃຫ້ຮູ້ຕື່ມວ່າ:ໃນວັນທີ 30 ກໍລະກົດ 2014, ສານປະຊາຊົນແຂວງຫົວພັນກໍໄດ້ຕັດສີນລົງໂທດ ນາງ ຍົວລີ ອາຍຸ 44 ປີ ຢູ່ ບ້ານພູໂລນ, ເມືອງວຽງໄຊ, ແຂວງຫົວພັນ ຈຳຄຸກເປັນເວລາ 3 ປີ ພ້ອມປັບໃໝເງິນໜຶ່ງລ້ານ ກີບ ໃນຂໍ້ຫາລັກຊັບພົນລະ ເມືອງ ໂດຍຜູ້ກ່ຽວໄດ້ເຄື່ອນໄຫວລັກງົວ, ໝູ, ໝາ, ເປັດ, ໄກ່ ແລະ ເຄື່ອງນຸ່ງຂອງປະຊາຊົນຢູ່ບ້ານພູໂລນ ແລະ ບ້ານໃກ້ຄຽງ ມາເປັນເວລາດົນນານສົມຄວນຈຶ່ງຖືກເຈົ້າໜ້າທີ່ຈັບຕົວມາດຳເນີນຄະດີຕາມລະບຽບກົດໝາຍ.