laophatthananewspaper: ຮອງນາຍົກລັດຖະມົນຕີ ທອງລຸນ ສີສຸລິດ ພົບປະກັບຄູ່ຮ່ວມຕຳແໜ່ງ ສປ ຈີນ, ຕີມໍເລດສະເຕ ແລະ ສ.ອາເມລິກາ

ເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມືແບບຍຸດທະສາດຮອບດ້ານລະຫວ່າງ ສປປ ລາວ ແລະ ສປ ຈີນ ໃຫ້ນັບມື້ແໜ້ນແຟ້ນ ແລະ ຂະ ຫຍາຍຕົວຍິ່ງໆຂຶ້ນ. ໃນຕອນແລງຂອງວັນທີ 8 ສິງຫາ 2014 ທີ່ເນປີດໍ ສາທາລະ ນະລັດສະຫະພາບມຽນມາ, ທ່ານ ທອງລຸນ ສີສຸລິດ ຮອງນາຍົກລັດຖະມົນຕີ, ລັດ ຖະມົນຕີວ່າການກະຊວງການຕ່າງປະເທດ ແຫ່ງ ສປປ ລາວ ໄດ້ພົບປະກັບທ່ານ ຫວັງ ອີ້ ລັດຖະມົນຕີວ່າການກະຊວງການຕ່າງປະເທດ ແຫ່ງ ສປ ຈີນ ໃນໂອກາດເຂົ້າ ຮ່ວມກອງປະຊຸມລັດຖະມົນຕີການຕ່າງປະເທດອາຊຽນ ຄັ້ງທີ 47 ແລະ ກອງປະຊຸມອື່ນໆທີ່ກ່ຽວຂ້ອງ.

ໃນການພົບປະກັນຄັ້ງນີ້, ທັງສອງຝ່າຍໄດ້ແລກປ່ຽນຄວາມຄິດເຫັນກ່ຽວກັບການຈັດຕັ້ງປະຕິບັດການພົວພັນ ແລະ ການຮ່ວມມືສອງຝ່າຍໃນໄລຍະຜ່ານມາ. ທ່ານ ຮອງນາຍົກ ທອງລຸນ ສີສຸລິດ ໄດ້ຕີລາຄາສູງ ແລະ ສະແດງຄວາມພາກພູມໃຈທີ່ເຫັນວ່າ: ການພົວພັນຮ່ວມມືລາວ- ຈີນ ໄດ້ຮັບການເສີມຂະຫຍາຍຢ່າງຕໍ່ເນື່ອງ ອັນໄດ້ນຳເອົາຜົນປະໂຫຍດຕົວຈິງມາສູ່ປະຊາ ຊົນສອງຊາດ ລາວ-ຈີນ, ສອງຝ່າຍໄດ້ຕີລາຄາສູງຕໍ່ການແລກປ່ຽນການຢ້ຽມຢາມເຊິ່ງກັນ ແລະ ກັນຂອງການນຳຂັ້ນສູງຂອງ

ພັກ ແລະ ລັດຢ່າງເປັນປົກກະຕິລວມ ທັງບັນດາຂະແໜງການສູນກາງ ແລະ ທ້ອງຖິ່ນ. ການຮ່ວມມືທາງດ້ານເສດຖະກິດ- ການຄ້າ ແລະ ການລົງທຶນລະຫວ່າງ 2 ປະເທດ ກໍໄດ້ມີການຂະຫຍາຍຕົວນັບມື້ນັບເພີ່ມຂຶ້ນ.

ນອກຈາກນີ້, ສອງຝ່າຍຍັງໄດ້ສະແດງຄວາມເພິ່ງພໍໃຈການຮ່ວມມື ແລະ ປະສານສົມທົບກັນໃນຂົງເຂດການຕ່າງປະເທດ, ວັດທະນະທຳ-ສັງຄົມ, ວິທະຍາ ສາດ-ເຕັກໂນໂລຊີ ແລະ ອື່ນໆ. ຝ່າຍ ສປ ຈີນ ຍິນດີທີ່ຈະໃຫ້ການສະໜັບສະໜູນ ສປປ ລາວ ໃນການເປັນເຈົ້າພາບ ແລະ ເປັນປະທານອາຊຽນ ໃນປີ 2016. ສຳລັບໂຄງການສ້າງທາງລົດໄຟດ່ວນນັ້ນ, ຝ່າຍ ສປ ຈີນ ໄດ້ຢືນຢັນເຈດຈຳນົງຂອງຕົນວ່າບໍ່ມີການປ່ຽນແປງໂດຍຈະໃຫ້ວິ ຊາການກ່ຽວຂ້ອງໄດ້ສຶກສາລະອຽດຮອບດ້ານເພື່ອໃຫ້ໄດ້ຈັດ ຕັ້ງປະຕິບັດໂດຍໄວ.

ທ່ານ ຮອງນາຍົກ ທອງລຸນ ສີສຸລິດ ໄດ້ຕາງໜ້າໃຫ້ພັກ, ລັດ ແລະ ປະຊາຊົນ ສະແດງຄວາມຂອບໃຈ ແລະ ຮູ້ບຸນຄຸນຕໍ່ພັກ-ລັດ ແລະ ປະຊາຊົນຈີນ ທີ່ໄດ້ໃຫ້ການສະໜັບສະໜູນ, ຊ່ວຍເຫລືອຢ່າງໃຫຍ່ຫລວງ, ມີຜົນສັກສິດ ແລະ ທັນການໃນພາລະກິດປົກປັກຮັກ ສາ ແລະ ສ້າງສາປະເທດຊາດລາວໃນປັດຈຸບັນ.

ໃນການພົບປະຄັ້ງນີ້ ສອງຝ່າຍຍັງໄດ້ແລກປ່ຽນຄວາມຄິດເຫັນກ່ຽວກັບການຮ່ວມມືອາຊຽນ-ຈີນ ເຊິ່ງເຫັນວ່າໄດ້ຮັບການເສີມຂະຫຍາຍເປັນກ້າວໆມາ. ຈີນ ເປັນຄູ່ຄ້າໃຫຍ່ອັນດັບໜຶ່ງຂອງອາຊຽນ ແລະ ອາຊຽນ ກໍເປັນຄູ່ຄ້າໃຫຍ່ອັນດັບສາມຂອງຈີນ.

ສປ ຈີນ ໄດ້ຢືນຢັນທີ່ຈະຮ່ວມມືກັບອາຊຽນ ໂດຍຖືເອົາອາຊຽນເປັນບູລິມະສິດຫລັກ ສປ ຈີນ ກໍຈະເຮັດວຽກຮ່ວມກັບອາຊຽນຢາາງໃກ້ຊິດ ເພື່ອຜັນຂະ ຫຍາຍຄຳຕົກລົງຂອງຜູ້ນຳອາຊຽນ-ຈີນ ລວມທັງຂໍ້ລິເລີ່ມໃໝ່ທີ່ສະເໜີໂດຍ ສປ ຈີນ ໂດຍສະເພາະຂອບການຮ່ວມມື 2+7 ເປັນຕົ້ນການສ້າງຕັ້ງທະນາຄານການລົງທຶນດ້ານພື້ນຖານໂຄງລ່າງອາຊີ (AIIB).

ທ່ານ ຮອງນາຍົກ ທອງລຸນ ສີສຸລິດ ໄດ້ສະແດງຄວາມຂອບໃຈຕໍ່ ສປ ຈີນ ທີ່ຖືອາຊຽນເປັນສຳ ຄັນໃນການພົວພັນ ແລະ ສະແດງຄວາມຍິນດີຕໍ່ບັນດາຂໍ້ລິເລີ່ມໃໝ່ຂອງ ສປ ຈີນ ເປັນຕົ້ນການຮ່ວມມືແມ່ນ້ຳຂອງ-ແມ່ນ້ຳລ້ານຊ້າງ; ການສ້າງຕັ້ງທະນາ ຄານການລົງທຶນດ້ານພື້ນຖານໂຄງລ່າງອາຊີ (AIIB) ແລະ ສປປ ລາວ ເຊື່ອໝັ້ນວ່າທະນາຄານດັ່ງ ກ່າວຈະປະກອບສ່ວນສະ ໜັບສະໜູນໃຫ້ແກ່ການເຊື່ອມຈອດອາຊຽນ ກໍຄືອາຊຽນກັບ ສປ ຈີນ ໂດຍສະເພາະດ້ານການຄ້າ, ການລົງທຶນ ແລະ ການ ທ່ອງທ່ຽວ.

ນອກນັ້ນ, ສອງຝ່າຍກໍໄດ້ປຶກສາຫາລື ແລະ ແລກປ່ຽນຄຳຄິດຄຳເຫັນນຳກັນຕໍ່ບັນຫາພາກ ພື້ນ ແລະ ສາກົນທີ່ມີຄວາມສົນໃຈຮ່ວມກັນ. ການພົບປະໂອ້ລົມໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ແລະ ຄວາມເຂົ້າອົກເຂົ້າໃຈເຊິ່ງກັນ ແລະ ກັນດີ.

ຕອນແລງຂອງວັນດຽວກັນ ກໍໄດ້ມີການພົບປະສອງຝ່າຍກັບທ່ານ ໂຈເຊ ລຸຍ ກຸດເຕີເຣສ ລັດ ຖະມົນຕີຕ່າງປະເທດ ແລະ ການຮ່ວມມືຂອງປະເທດຕີມໍເລດສະເຕເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຂອງສອງປະເທດໃຫ້ນັບມື້ຂະຫຍາຍຕົວຍິ່ງຂຶ້ນ. ສອງຝ່າຍເຫັນດີທີ່ຈະສືບຕໍ່ໃຫ້ການສະໜັບສະໜູນເຊິ່ງກັນ ແລະ ກັນໃນເວທີພາກພື້ນ ແລະ ສາກົນ.

ຂ່າວໄດ້ໃຫ້ຮູ້ຕື່ມວ່າ: ໂອ ກາດດັ່ງກ່າວ, ທ່ານ ຈອນເຄຣິ ລັດຖະມົນກະຊວງການຕ່າງປະ ເທດຂອງສະຫະລັດອາເມລິກາ, ໄດ້ພົບປະໂອ້ລົມກັບທ່ານ ທອງ ລຸນ ສີສຸລິດ ຮອງນາຍົກລັ ຖະ ມົນຕີລັດຖະມົນຕີກະຊວງການ ຕ່າງປະເທດຂອງ ສປປ ລາວ ຢູ່ນະຄອນຫຼວງນາປິດໍຂອງພະ ມ້າ ກ່ອນທັງສອງທ່ານຈະເຂົ້າ ຮ່ວມກອງປະຊຸມສຸດຍອດຂອງ ບັນດາປະເທດເຂດລຸ່ມແມ່ນ້ຳ ຂອງ ເຊິ່ງໄດ້ຈັດຂຶ້ນໃນວັນທີ 9 ສິງຫານີ້. ລະຫວ່າງການພົບປະ ກັນນັ້ນ, ທັງສອງຝ່າຍໄດ້ສະ ແດງຄວາມຊົມເຊີຍຕໍ່ການເຕີບ ໃຫຍ່ຂະຫຍາຍຕົວຢ່າງຕໍ່ເນື່ອງ ຂອງສາຍພົວພັນມິດຕະພາບລະຫວ່າງສະຫະລັດອາເມລິກາ- ລາວ ແລະ ທັງສອງຝ່າຍຍັງປຶກ ສາໂອ້ລົມກັນເຖີງວີທີທາງໃນການຮັດແໜ້ນເສີມຂະຫຍາຍ ການຮ່ວມມືໃຫ້ແໜ້ນແຟ້ນເລິກເຊິ່ງກວ່າເກົ່າໃນສາຍພົວພັນ ມິດ ຕະພາບສອງຝ່າຍໃນຕໍ່ໜ້າ. ທ່ານ ຈອນເເຄຣິ ໄດ້ສະແດງ ຄວາມຂອບໃຈ ທ່ານ ທອງລຸນ ສຳລັບຄວາມພະຍາຍາມຂອງ ປະ ເທດລາວໃນການຈັດກອງປະຊຸມໃຫຍ່ວິສາມັນສຳລັບລັດຖະ ມົນຕີຕ່າງປະເທດຂອງບັນດາປະເທດເຂດລຸ່ມແມ່ນໍ້າຂອງທີ່ໄດ້ ພ້ອມກັນຊອກຫາແນວທາງແກ້ໄຂບັນຫາສີ່ງແວດລ້ອມ ແລະ ປະເດັ່ນຕ່າງໆທາງດ້ານສັງຄົມ ໃນການພັດທະນາແມ່ນ້ຳຂອງ ຮ່ວມກັນເຊັ່ນ: ການພັດທະນາພື້ນຖານໂຄງລ່າງ, ການກໍ່ສ້າງ ເຂື່ອນໄຟຟ້ານ້ຳຕົກ ແລະ ການ ພັດທະນາພະລັງງານທົດແທນ.