ເລີ່ມສູ່ລະດູໜາວໃຫ້ລະວັງການລະບາດຂອງພະຍາດຕ່າງໆ

     ເລີ່ມເຂົ້າສູ່ໜ້າໜາວແລ້ວໃຫ້ລະວັງພະຍາດຕ່າງໆຕາມລະດູການທີ່ອາດຈະເກີດມີການລະບາດຕໍ່ສຸຂະພາບຂອງປະຊາຊົນ ຢູ່ຕາມຄຸ້ມບ້ານເມືອງຕ່າງໆ, ໂດຍສະເພາະຢູ່ນະຄອນຫລວງ ວຽງຈັນກໍເກີດມີພະຍາດຕາ ແດງ, ໄຂ້ຫວັດ, ອອກຕຸ່ມໝາກ ສຸກໝາກໃສ ແລະ ອື່ນໆລະບາດ ຂຶ້ນແລ້ວດັ່ງນັ້ນຕ້ອງມີຄວາມລະມັດລະວັງ ແລະ ຮູ້ຮັກສາສຸຂະ ພາບຂອງຕົນເອງ ແລະ ລູກຫຼານ ໃຫ້ດີ.

       ການລະບາດຂອງພະຍາດດັ່ງກ່າວໄດ້ເກີດຂຶ້ນໃນເວລາມີການປ່ຽນຖ່າຍຂອງສະພາບດິນຟ້າອາກາດຄືຈາກລະດູຝົນເຂົ້າ ສູ່ລະດູໜາວ ແລະ ຈາກລະດູໜາວກ້າວເຂົ້າສູ່ລະດູຮ້ອນ ອາດເຮັດໃຫ້ຄົນເຮົາໂດຍສະເພາະຜູ້ມີພູມຕ້ານທານຕ່ຳຈະຕິດພະ ຍາດໄດ້ໄວ. ດັ່ງນັ້ນ, ທຸກຄົນບໍ່ຄວນຖືເບົາໃນການຮັກສາສຸຂະພາບພ້ອມທັງເອົາໃຈໃສ່ປະຕິບັດຫລັກການອານະໄມ 3 ສະອາດ ຄື ກິນສະອາດ, ຢູ່ສະອາດ ແລະ ນຸ່ງຫົ່ມສະອາດ. ສະເພາະໄຂ້ອອກຕຸ່ມໝາກສຸກໝາກໃສທີ່ເກີດຂຶ້ນສ່ວນໃຫຍ່ແມ່ນເດັກ ນ້ອຍ, ໂດຍແພດໝໍຫລາຍຄົນໄດ້ໃຫ້ຂໍ້ຄິດເຫັນວ່າການລະບາດຂອງພະຍາດນີ້ແມ່ນຍ້ອນພໍ່ແມ່ຜູ້ປົກຄອງຖືເບົາຕໍ່ການສັກວັກ ຊິນ, ເຊິ່ງແຕ່ລະປີເມື່ອຮອດກຳນົດພໍ່ແມ່ຜູ້ປົກຄອງຕ້ອງໄດ້ເອົາລູກຫລານຂອງຕົນເຂົ້າສັກຢາວັກຊິນໃຫ້ຄົບຕາມຈຳນວນ. ດັ່ງນັ້ນ, ຈຶ່ງຂໍໃຫ້ປະຊາຊົນຊັ້ນຄົນຕ່າງໆພ້ອມກັນເອົາໃຈໃສ່ຕໍ່ການປ້ອງກັນຕໍ່ພະຍາດດັ່ງກ່າວ, ຕາມຄຳແນະນຳຂອງແພດໝໍ ເພື່ອສະກັດກັ້ນການແຜ່ລະບາດຂອງພະຍາດໃຫ້ຫລຸດໜ້ອຍຖອຍລົງ.