ນັກຕົວະຕົ້ມອັນຕະລາຍຖືກເຈົ້າໜ້າທີ່ຈັບຕົວມາດຳເນີນຄະດີ

    ພາຍຫລັງເຈົ້າໜ້າທີ່ ປກສ ເມືອງຈັນທະບູລີ ນະຄອນຫຼວງວຽງຈັນ, ໄດ້ຮັບແຈ້ງຈາກຜູ້ ເສຍຫາຍຫລາຍລາຍວ່າຖືກ ທ້າວ ສຸລະໄຊ (ຕຸ້ຍ) ອາຍຸ 36 ປີ ຢູ່ບ້ານສາຍລົມ ເມືອງຈັນທະບູລີ ນະຄອນຫລວງວຽງຈັນ ເຊິ່ງ ເຄີຍເປັນພະນັກງານບໍລິສັດທ່ອງ ທ່ຽວແຫ່ງໜຶ່ງ ໄດ້ໃຊ້ເລ່ຫລ່ຽມ ມາຕົວະຕົ້ມເອົາລົດໄປຈຳນວນຫລາຍຄື ລົດກະບະວີໂກ້ແຊ໊ມ, ລົດຕູ້ໂຕໂຍຕ້າ, ລົດເກັງ 3 ຄັນ ແລະ ລົດຕູ້ສະຕາແລ໋ກອີກ 5 ຄັນ, ຫລັງຈາກນັ້ນເຈົ້າໜ້າທີ່ກໍໄດ້ຈັດວາງກຳລັງອອກຕິດຕາມ ແລະ ສາມາດຈັບຕົວຜູ້ກ່ຽວ ມາດຳ ເນີນຄະດີຕາມລະບຽບກົດໝາຍໄດ້ເມື່ອທ້າຍເດືອນກັນຍາ 2014 ໃນຂະນະລີ້ຢູ່ນະຄອນຫລວງວຽງຈັນ ແລະ ຜ່ານ ການສືບສວນ-ສອບສວນຂອງເຈົ້າໜ້າທີ່ຜູ້ກ່ຽວຮັບສາລະພາບວ່າ: ນັບ ແຕ່ເດືອນສິງຫາ 2014 ເປັນຕົ້ນມາ, ຕົນເອງໄດ້ຕິດ ການພະນັນ ຢູ່ຄາຊິໂນຈຶ່ງຕ້ອງການເງິນໄປ ຫລິ້ນການພະນັນ, ໂດຍໄດ້ໃຊ້ອຸບາຍໄປເຊົ່າລົດນຳບັນດາບໍລິສັດທີ່ຕົນເອງຮູ້ຈັກ ແລະ ຄຸ້ນເຄີຍ ໂດຍອ້າງວ່າຈະເອົາໄປຮັບແຂກນັກທ່ອງທ່ຽວ ແລະ ຈາກນັ້ນກໍ ເອົາລົດທີ່ເຊົ່າມາໄປຈຳນຳເອົາ ເງິນໄດ້ 3 ລ້ານ ກວ່າບາດ (ສະກຸນເງິນໄທ) ຫລື ປະມານ 750 ລ້ານກີບໄປຫລິ້ນການພະນັນຢູ່ ຄາຊິໂນໃນນະຄອນຫລວງວຽງຈັນ ແລະ ຕ່າງແຂວງຈົນໝົດກ້ຽງ, ປັດຈຸບັນເຈົ້າໜ້າທີ່ສາ ມາດນຳເກັບກູ້ເອົາລົດທີ່ຜູ້ກ່ຽວ ເອົາໄປຈຳມາໝົດແລ້ວ ແລະ ເຈົ້າຂອງເດີມກໍ ໄດ້ນຳເອກະ ສານທີ່ຖືກຕ້ອງຄົບຖ້ວນມາພົວ ພັນເອົາແລ້ວ, ສ່ວນເງິນທີ່ຜູ້ກ່ຽວໄດ້ເອົາຈາກຜູ້ຈຳນຳນັ້ນ ແມ່ນໃຫ້ຜູ້ຮັບຈຳ ນຳປະກອບ ເອກກະສານຮ້ອງຟ້ອງຕາມຂະ ບວນການຍຸຕິທຳ ແລະ ລະບຽບກົດໝາຍຕໍ່ໄປ.