ປກສ ເມືອງໄຊພູທອງ ຈັບຜູ້ຄ້າຂາຍຢາເສບຕິດຕົວອັນຕະລາຍ

            ເຈົ້າໜ້າທີ່ ປກສ ເມືອງ ໄຊພູທອງ ແຂວງສະຫວັນນະເຂດ ໃຫ້ຮູ້ວ່າ: ໃນວັນທີ 2 ຕຸລາ ຜ່ານມານີ້, ສາມາດຈັບຜູ້ຄ້າ ຂາຍຢາເສບຕິດຕົວອັນຕະລາຍ ໄດ້ຊື່ ທ້າວ ຫົງ ພົມດາລາ ອາຍຸ 45 ປີຢູ່ບ້ານຄັນທະຈານ ເມືອງ ໄຊພູທອງ ພ້ອມຂອງ ກາງຢາບ້າ 648 ເມັດ ທີ່ຊຸກເຊື່ອງໄວ້ຢູ່ກ້ອງ ເບາະລົດຈັກຂອງຜູ້ກ່ຽວໝາຍ ເລກ ທະບຽນ ຈກ 0024 ສະຫວັນນະເຂດ ແລະ ໂທລະ ສັບ 2 ໜ່ວຍ, ຈຶ່ງໄດ້ຢຶດໄວ້ ເປັນຫລັກຖານເພື່ອດຳເນີນຄະດີຕາມລະບຽບກົດໝາຍ, ໂດຍທ້າວ ຫົງ ຮັບສາລະ ພາບຕໍ່ເຈົ້າໜ້າ ທີ່ວ່າໄດ້ເຄື່ອນໄຫວຄ້າຂາຍຢາເສບຕິດໃຫ້ຊາວໜຸ່ມໃນເຂດເມືອງໄຊພູທອງ ແລະ ເມືອງໃກ້ຄຽງມາດົນ, ກ່ອນ ຈະຖືກເຈົ້າໜ້າທີ່ ຈັບຕົວໄດ້ໃນຄັ້ງນີ້.

     ເຈົ້າໜ້າທີ່ເມືອງດັ່ງກ່າວໃຫ້ຮູ້ຕື່ມວ່າ: ເມື່ອທ້າຍເດືອນກັນຍາຜ່ານມານີ້, ກໍສາມາດຈັບມືກາວລັກຊັບພົນລະເມືອງຄື ທ້າວ ດົມ ອາຍຸ 25 ປີຢູ່ບ້ານເວີນຄູນ ແລະ ທ້າວ ໂນ ອາຍຸ 29 ປີ ຢູ່ບ້ານຄັນທະຈານ ເມືອງໄຊພູ ທອງມາດຳເນີນຄະດີ, ພາຍຫລັງ ທັງສອງໄດ້ຮ່ວມກັນລັກຈັກເຮືອຫາງຍາວຂອງປະຊາຊົນພາຍໃນເມືອງຈຳນວນ 1 ເຄື່ອງ.