ບຸນຊ່ວງເຮືອປີນີ້ຄວນຖອດຖອນບົດຮຽນຈາກປີຜ່ານມາ

    ບຸນອອກພັນສາປະວໍລະນາ ແລະ ຊ່ວງເຮືອປະຈຳປີ 2014 ໄດ້ໜູນວຽນມາບັນຈົບຄົບຮອບອີກວາລະໜຶ່ງ, ປັດຈຸບັນກໍມີ ການຄົບງັນ, ວາງສະແດງ-ຂ້າຍສິນຄ້າຫຼາກຫຼາຍນັບທັງສິນຄ້າພາຍໃນ ແລະ ຈາກປະເທດເພື່ອນບ້ານຄືດັ່ງທຸກປີຜ່ານມາ, ນອກ ນີ້ໄດ້ມີການຂາຍເຂົ້າຫຼາມ, ປິ້ງໄກ່ ແລະ ອາຫານພື້ນບ້ານຂອງລາວອັນສະແດງໃຫ້ເຫັນເຖິງວັດທະນະທຳອາຫານການກິນຂອງ ລາວເຮົາ, ຂະນະທີ່ຄະນະກຳມະການຈັດງານບຸນໄດ້ຈັດສັນສະຖານທີ່ໃຫ້ບັນດາບໍລິສັດຫ້າງຮ້ານຕ່າງໆທີ່ເຂົ້າຮ່ວມໃນງານບຸນ ໃຫ້ມີວາມເປັນລະບຽບຮຽບຮ້ອຍດີ.

     ເຖິງຢ່າງໃດກໍດີງານບຸນປີນີ້ ທາງດ້ານລະບຽບຫຼັກການຂອງການຫຼິ້ນບຸນກໍ່ບໍ່ຕ່າງຫຍັງຫຼາຍຈາກຊຸມປີຜ່ານມາເນື່ອງຈາກ ບຸນອອກພັນສາ ແລະ ຊ່ວງເຮືອປະຈຳປີແມ່ນບຸນປາງໃຫຍ່ສຳຄັນຂອງປະຊາຊົນລາວເຮົາທີ່ໄດ້ພ້ອມພາກັນຈັດຕັ້ງ ແລະ ປົກ ປັກຮັກສາຄວາມເປັນລະບຽບຮຽບຮ້ອຍ, ແຕ່ສັງຄົມສ່ວນໃຫຍ່ຍັງມີຄວາມເປັນຫ່ວງ ແລະ ຢ້ານວ່າເສັ້ນທາງແຄມຂອງນັບ ແຕ່ສາມແຍກປາກປ່າສັກຫາໂຮງໝໍມະໂຫສົດໂດຍລັດຖະບານໄດ້ໃຊ້ງົບປະມານເປັນຈຳນວນຫຼາຍບູລະນະກໍ່ສ້າງໃຫ້ ກາຍ ເປັນເຂດສີຂຽວທີ່ມີຄວາມສວຍສົດງົດງາມ ແລະ ມີນັກທ່ອງທ່ຽວເຂົ້າມາທ່ຽວຜ່ານໄປມາຫຼາຍນັ້ນຈະຖືກທຳລາຍ ແລະ

ເປືະເປື້ອນດັ່ງປີຜ່ານມາກໍເຄີຍເກີດບັນຫາກ່ຽວກັບເສດຂີ້ເຫຍື້ອມາແລ້ວ ແລະ ການຄົບງັນ ແຕ່ລະຄືນຊຶ່ງຫຼາຍປີກ່ອນນະ ຄອນຫຼວງວຽງຈັນໄດ້ປະກາດໃຫ້ຮັກສາຮີດຄອງປະເພນີອັນດີງາມຂອງຊາດໄວ້ແຕ່ບັນຫາການນຸ່ງຖືຂອງຊາວໜຸ່ມໄວໜຸ່ມຈຳ ນວນໜຶ່ງຍັງເຫັນວ່າມີການນຸ່ງຖືທີ່ມີລະສະນະສັ້ນເຂີນ, ໂປ້ເປືອຍ ແລະ ອື່ນໆ, ດັ່ງນັ້ນໃນງານບຸນຊ່ວງເຮືອປີນີ້ທາງພາກສ່ວນ ກ່ຽວຂ້ອງກໍຄືຄະນະກຳມະການຈັດງານບຸນຄວນມີການກວດກາຢ່າງເຂັ້ມງວດເພື່ອກຳຈັດບັນຫາທີ່ບໍ່ຈົບງາມດັ່ງກ່າວບໍ່ໃຫ້ເກີດ ຂຶ້ນໃນງານບຸນປີນີ້, ພ້ອມ ນັ້ນທຸກຄົນກໍຕ້ອງເປັນເຈົ້າການປະຕິບັດຕາມລະບຽບຫຼັກການຕ່າງໆເພື່ອພ້ອມກັນປົກປັກຮັກສາ ມູນເຊື້ອວັດທະນະທຳ ແລະ ຮີດຄອງປະເພນີອັນດີງາມຂອງຊາດໃຫ້ຄົງຢູ່ຕະຫຼອດໄປ.