ຖືວຽກງານລ້ຽງສັດ, ການປະມົງຕິດພັນກັບການພັດທະນາຈຸດສຸມ ແລະ ວຽກງານສາມສ້າງ

     ໃນສົກປີ 2013-2014 ຜ່ານມາ, ກົມລ້ຽງສັດ ແລະ ການປະມົງກະຊວງກະສິກຳ ແລະ ປ່າໄມ້, ໄດ້ຈັດສົ່ງພະນັກງານວິຊາ ການຂອງຕົນລົງເຄື່ອນໄຫວວຽກງານຢູ່ຂັ້ນຮາກຖານຕິດພັນກັບການພັດທະນາເຂດຈຸດສຸມ ແລະ ວຽກງານທົດລອງສາມສ້າງ ເພື່ອຊຸກຍູ້ການລ້ຽງສັດ ແລະ ລ້ຽງປາ ເຮັດໃຫ້ວຽກງານ ດັ່ງກ່າວມີບາດກ້າວຂະຫຍາຍຕົວ ແລະ ບັນລຸຕາມແຜນທີ່ກຳນົດໄວ້ ເປັນຢ່າງດີ.

     ຜ່ານຈາກການຈັດຕັ້ງປະຕິບັດວຽກງານຂອງຂະແໜງດັ່ງກ່າວນັບວ່າໄດ້ຮັບໝາກຜົນ ແລະ ກາຍເປັນຮູບປະທຳຕົວຈິງເປັນ ຕົ້ນແມ່ນໄດ້ເຂົ້າຮ່ວມພັດທະນາບັນດາຈຸດສຸມຂອງລັດຖະບານ, ໂດຍສະເພາະແຂວງໄຊສົມບູນ ແລະ ແຂວງຊຽງຂວາງເພື່ອ ຊ່ວຍຂຽນແຜນພັດທະນາໂຄງການລ້ຽງສັດ ແລະ ປາ ຢູ່ເຂດຈຸດສຸມເມືອງອ່າວ ແລະ ເມືອງອອມ; ກຳນົດແຜນພັດທະນາ ຂັ້ນ ບ້ານໄດ້ 19 ບ້ານ; ສະໜອງແນວພັນສັດ (ງົວ, ໝູ, ສັດປີກ), ປັດຈຸບັນມີກອງທຶນລ້ຽງງົວໃນ 12 ບ້ານຈຸດສຸມຜາລະແວກ ມີງົວ ພັນປັບປຸງທັງໝົດ 650 ໂຕ ໃນ 145 ຄອບຄົວ; ໄດ້ລົງຊຸກຍູ້ການ ສ້າງ ແລະ ປັບປຸງສະຖານີລ້ຽງປານ້ຳປະຈາດ ເມືອງ

ລ້ອງຊານ, ໂດຍເນັ້ນໃສ່ການຜະລິດປາປາກ, ເຊິ່ງເປັນປາພື້ນເມືອງໃຫຍ່ໄວສາມາດສະໜອງ ແລະ ແຈກຢາຍລູກປາໃຫ້ປະ ຊາຊົນເຂດດັ່ງກ່າວພ້ອມດຽວກັນນັ້ນໄດ້ຈັດເຝິກອົບຮົມແລະຖອດຖອນບົດຮຽນການລ້ຽງ, ການປ້ອງກັນພະຍາດສັດໃຫ້ປະ ຊາຊົນ ແລະ ສ້າງໄດ້ຄອບຄົວຕົວແບບການຜະລິດ, ພັດທະນາຊີວິດການເປັນຢູ່ດີ ແລະ ມີລາຍຮັບເພີ່ມຂຶ້ນ.

     ທ່ານ ດຣ. ບຸນຂວາງ ຄຳບຸນ ເຮືອງຫົວໜ້າກົມລ້ຽງສັດ ແລະ ການປະມົງໄດ້ກ່າວໃນໂອກາດ ກອງປະຊຸມສະຫລຸບວຽກ ງານການລ້ຽງສັດ ແລະ ການປະມົງ ທົ່ວປະເທດເມື່ອອາທິດທີ່ຜ່ານມາວ່າ: ນອກຈາກໄດ້ເອົາໃຈໃສ່ ເຄື່ອນໄຫວຕິດພັນກັບ ການພັດ ທະນາຈຸດສຸມແລ້ວຂະແໜງການຂອງຕົນຍັງຖືສຳຄັນຕໍ່ວຽກງານທົດລອງສາມສ້າງຮ່ວມກັບ ແຂວງ, ເມືອງ ແລະ ບ້ານສາມ ສ້າງເປັນຕົ້ນໄດ້ເຂົ້າຮ່ວມໃນ 4 ແຂວງ (ຫົວພັນ, ອຸດົມໄຊ, ວຽງ ຈັນ, ອັດຕະປື) ແລະ ແຂວງ ອື່ນໆທີ່ຕິດພັນກັບ ໂຄງການພາຍໃຕ້ຄວາມຮັບຜິດຊອບຂອງກົມກໍໄດ້ມີການສັງລວມເກັບກຳຂໍ້ມູນ ແລະ ໄດ້ລົງຊ່ວຍໃນການ ຂຽນຮ່າງຍຸດທະສາດພັດທະນາກະສິກຳ ແລະ ປ່າໄມ້ຂອງແຂວງ, ແຜນພັດທະນາຂອງເມືອງ ແລະ ໂຄງການຈຸດສຸມບ້ານ, ຊຶ່ງວຽກ ງານດັ່ງກ່າວຈະສືບຕໍ່ສູ້ຊົນໃຫ້ ສຳເລັດໃນປີ 2015. ພ້ອມນັ້ນຍັງໄດ້ຈັດຝຶກອົບຮົມສ້າງຄວາມ ເຂັ້ມແຂງໃຫ້ພະນັກ ງານຂັ້ນແຂວງ, ເມືອງ ແລະ ບ້ານຕາມ ລຳດັບເພື່ອໃຫ້ສາມາດນຳພາການລ້ຽງສັດ, ການລ້ຽງປາຕົວຈິງຢູ່ບ້ານເຮັດທົດລອງ 3 ສ້າງ ດັ່ງກ່າວ;ປະສານສົມທົບກັບພາກສ່ວນກ່ຽວຂ້ອງເຊັ່ນ: ທະນາຄານນະໂຍບາຍ, ໂຄງການຊ່ວຍເຫລືອລ້າ ແລະ ກູ້ຢືມ ທີ່ປະຕິບັດ ກິດຈະກຳຢູ່ໃນບ້ານ 3 ສ້າງຂຽນໂຄງການພັດທະນາບ້ານ, ສ້າງວິຊາການດ້ານການລ້ຽງສັດ ແລະ ປາ ແລະ ສ້າງ ຄອບຄົວຕົວແບບ 30 ກວ່າຄອບ ຄົວໃນ 12 ບ້ານຂອງ 4 ແຂວງ, ສ້າງຈຸດ ເຕົ້າໂຮມສັດຕິດພັນກັບສ້າງສວນຫຍ້າໄດ້ 2 ເຮັກຕາໃນ 2 ບ້ານຂອງເມືອງແບງແຂວງອຸດົມໄຊ, ສ້າງອ່າງປະສົມພັນປາໃຫ້ກຸ່ມບ້ານທວດ, ເມືອງຈຳພອນ ແຂວງສະຫວັນ ນະເຂດ, ຈັດຫາປຶ້ມຄູ່ມື ແລະ ແບບຟອມການຕິດຕາມສຳຫລວດດ້ານການລ້ຽງສັດ ແລະ ປະມົງໄດ້ຫລາຍກວ່າ 12 ລາຍ ການ, ເຊິ່ງໄດ້ແຈກຢາຍໃຫ້ບັນດາພະນັກງານເມືອງ ແລະ ວິຊາການປະຈຳບ້ານ 3 ສ້າງ ເພື່ອເປັນເຄື່ອງມືໃນການເຮັດວຽກບໍລິ ການຂອງພະນັກງານດັ່ງກ່າວໃຫ້ມີປະສິດທິຜົນສູງ, ໄດ້ຈັດພິມຄູ່ມືການລ້ຽງສັດ ແລະ ປາ ເປັນຮູບເຫລັ້ມສົມບູນໂດຍມີ 5 ພາກ 191 ໜ້າ ແລະ ໄດ້ແຈກຢາຍໃຫ້ພາກສ່ວນກ່ຽວຂ້ອງນຳໄປໃຊ້ແລ້ວ.