ຢາກໃຫ້ເຂັ້ມງວດຄວບຄຸມລາຄາອາຫານໃນງານບຸນ

ພາບປະກອບ

    ໃນງານບຸນນະມັດສະການພະທາດຫລວງເມື່ອມໍ່ໆນີ້, ໄດ້ມີປະຊາຊົນຈຳນວນ ບໍ່ໜ້ອຍສ່ອງແສງມາວ່າໃຫ້ພາກສ່ວນກ່ຽວຂ້ອງຊ່ວຍລົງກວດກາລາຄາອາຫານ ທີ່ຂາຍໃນງານບຸນດັ່ງກ່າວແດ່, ຫລັງຈາກເຫັນວ່າອາຫານບາງປະເພດມີລາແພງ ເກີນຂອບ ເຂດ.

     ປະຊາຊົນທ່ານໜຶ່ງຢູ່ບ້ານໜອງປີງ ເມືອງສີໂຄດຕະບອງ ບອກກັບນັກຂ່າວ ວ່າ: ຕົນໄດ້ພາ ພີ່ນ້ອງທີ່ມາຈາກຕ່າງແຂວງຫລາຍຄົນໄປທ່ຽວງານບຸນທາດຫລວງ ແລ້ວໄດ້ພາກັນເຂົ້າໄປກິນເຟີຢູ່ຮ້ານແຫ່ງໜຶ່ງ ແລະ ກໍ ຍ້ອນເພີໂຕບໍ່ໄດ້ຖາມລາຄາ ກ່ອນ, ພາຍຫລັງກິນແລ້ວຈຶ່ງຮູ້ວ່າລາຄາເຝີຖ້ວຍໜຶ່ງຕົກເປັນ ເງິນ 50 ພັນກີບ. ຈຶ່ງໄດ້ຖາມເຈົ້າ ຂອງຮ້ານວ່າຄືຂາຍແພງແທ້ ? ເຈົ້າຂອງຮ້ານຕອບວ່າ: ເຊົ່າສະ ຖານທີ່ແພງຈຶ່ງຕ້ອງຂາຍແພງ, ຂະນະທີ່ ປະຊາຊົນອີກທ່ານໜຶ່ງຢູ່ບ້ານທ່າງ່ອນ, ເມືອງໄຊທານີ ບອກວ່າ: ລາວສັ່ງຕົ້ມໄກ່ໂຕໜຶ່ງ, ເຂົ້າໜຽວສອງແອບ, ຕຳໝາກຮຸ່ງ ແລະ ຈືນລູກຊີ້ນຈານໜຶ່ງ ຕົກຢູ່ປະມານ 240.000 ກີບ, ໃນ ນັ້ນຕົ້ມໄກ່ລາຄາ 180.000 ກີບ.

     ຕໍ່ບັນຫາດັ່ງກ່າວນັກຂ່າວ ພວກເຮົາໄດ້ລົງໄປເບິ່ງຮ້ານອາຫານຫລາຍຮ້ານໃນງານບຸນ ແລະ ສັງເກດເຫັນວ່າລາຄາ ຂ້ອນຂ້າງ ແພງ ເຊັ່ນ: ເຝີ 25 - 30 ພັນ, ເຂົ້າປຽກ 20 - 25 ແລະ ປະ ເພດເຄື່ອງດື່ມກໍມີລາຄາເພີ່ມຂຶ້ນປະມານ 30 - 40% ຂອງ ລາຄາປົກກະຕິ. ນອກຈາກນີ້, ບາງ ຮ້ານບໍ່ຕິດປ້າຍລາຄາ ແລະ ບາງ ຮ້ານມີປ້າຍບອກແຕ່ບໍ່ເກັບຕາມລາຄາທີ່ກຳນົດໄວ້ກໍມີ, ໂດຍອ້າງວ່າເປັນປ້າຍລາຄາເກົ່າ. ກໍ ລະນີເຊັ່ນນີ້, ຖືວ່າເປັນການສວຍ ໂອກາດເອົາປຽບຜູ້ບໍລິໂພກຢ່າງຮ້າຍແຮງ. ສະນັ້ນ ຈຶ່ງຂໍໃຫ້ເຈົ້າໜ້າທີ່ກ່ຽວຂ້ອງເຂົ້າມາຄວບຄຸມ ແລະ ກຳນົດລາຄາໃຫ້ມີຄວາມ ເປັນເອກກະພາບເພື່ອສະກັດກັ້ນບໍ່ໃຫ້ ຊາວ ຄ້າຂາຍສວຍໂອກາດ ເອີ້ນເອົາເງິນຕາມໃຈ ແລະ ຮັບ ປະກັນໃຫ້ຜູ້ໃຊ້ບໍລິການບໍ່ຖືກເອົາປຽບຄືດັ່ງກ່າວ.      

    ມີປະຊາຊົນຫລາຍຄົນໃຫ້ ທັດສະນະວ່າ: ປັດຈຸບັນ, ບຸນປະ ເພນີປະຈຳຊາດລາວເຮົາໂດຍ ສະເພາະປາງບຸນໃຫຍ່ຄື: ບຸນ ຊ່ວງເຮືອ ແລະ ບຸນພະທາດ ຫລວງເຫັນວ່າມີລັກສະນະໜັກ ໄປທາງດ້ານທຸລະກິດຫາລາຍ ໄດ້ຂອງກຸ່ມຄົນ ຫລື ບຸກຄົນ ຫລາຍກວ່າເນັ້ນໄປທາງດ້ານຮີດຄອງປະເພນີວັດທະນາທຳ, ນັບ ແຕ່ການຈັບຈອງພື້ນທີ່ຂາຍສີນ ຄ້າກໍມີການແກ້ງແຍ້ງຍາດຊິງ ຜິດຖຽງກັນຢ່າງໜ້າອັບອາຍຄື ດັ່ງທີ່ພວກເຮົາເຫັນໃນສື່ອອນ ລາຍທີ່ສັງຄົມໄດ້ເຜີຍແຜ່ກ່ອນ ໜ້ານີ້, ຄ່າສະຖານທີ່ກໍມີລາຄາ ສູງ. ນອກຈາກນີ້, ສຽງໂຄສະ ນາສີນຄ້າຂອງບັນດາບໍລິສັດ ຂາຍລົດ, ຮ້ານຂາຍເຄື່ອງອຸປະ ໂພກ-ບໍລິໂພກ, ແມ່ຄ້າຂາຍເສື້ອ ຜ້າ-ເຄື່ອງນຸ່ງຫົ່ມ ແລະ ສີນຄ້າ ອື່ນໆດັງວົນແຊວໄປທົ່ວບໍລິເວນແລ້ວແຕ່ຜູ້ມີແຮງຢ່າງບໍ່ມີລະ ບຽບຫລັກການ. ສິ່ງທີ່ໜ້າເປັນ ຫວ່ງຫລາຍກໍແມ່ນແມ່ຄ້າຊາວ ຂາຍຕ່າງປະເທດໄດ້ເຂົ້າມາມີ ບົດບາດແບບຜູກຂາດໃນງານ ບຸນຄືດັ່ງທີ່ເຫັນໃນຮູບແບບໃຜ ເກັ່ງຜູ້ນັ້ນໄດ້ປຽບ.