ຄະນະ​ກຳມະການ​ຄຸ້ມ​ຄອງ​ຫລັກ​ຊັບພິຈາລະນາ​ບັນຫາ​ສຳຄັນ​ຫລາຍ​ດ້ານ

     ກອງ​ປະຊຸມ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ (ຄຄຊ) ຄັ້ງທີ III ປະຈຳ​ປີ 2014 ​ໄດ້​ແຈ້ງ​ແຜນ​ຍຸດ​ທະ​ສາດ​ການ​ພັດທະນາ​ຕະຫລາດ​ທຶນ ​ແຕ່​ປີ 2016-2025 ​ເຊິ່ງຖືກ​ຮັບຮອງ​ເອົາ​ໃນ​ກອງ​ປະຊຸມ​ລັດຖະບານ​ປະຈຳ​​ເດືອນ​ຕຸລາ​ຜ່ານ​ມາ ນັບ​ວ່າ​ເປັນ​ອີກ​ບາດກ້າວ​ໜຶ່ງ​ທີ່​ມີ​ຄວາມ​ສຳຄັນ​ຍິ່ງ​ໃນ​ການ​ສືບຕໍ່​ພັດທະນາ​ຕະຫລາດ​ທຶນ​ລາວ​ໃຫ້​ມີ​ປະສິດທິພາບ, ມີ​ຄວາມ​ໜ້າ​ເຊື່ອ​ຖື ​ແລະ ມີ​ມາດຕະຖານ​ສາກົນ. ພ້ອມ​ນັ້ນ ຍັງ​ໄດ້​ພິຈາລະນາ​ບັນຫາ​ສຳຄັນ​ຫລາຍ​ດ້ານ ​ໂດຍ​ສະ​ເພາະ​ຄວາມ​ຄືບ​ໜ້າ​ໃນ​ການ​ກະກຽມ​ເຂົ້າ​ເປັນ​ສະມາຊິກ​ຂອງ​ອົງການ​ຄຸ້ມ​ຄອງ​ຫລັກ​ຊັບ​ສາກົນ (IOSCO). ກອງ​ປະຊຸມ​ຄັ້ງນີ້​ໄດ້​ຈັດ​ຂຶ້ນ​ໃນ​ຕອນ​ເຊົ້າຂອງ​ວັນ​ທີ 24 ທັນວາ​ນີ້ ທີ່​ສຳນັກງານ​ທະນາຄານ​ແຫ່ງ ສປປ ລາວ ນະຄອນຫລວງ​ວຽງ​ຈັນ ພາຍ​ໃຕ້​ການ​ເປັນ​ປະທານ​ຂອງ​ທ່ານ ດຣ. ບຸນ​ປອນ ບຸດ​ຕະນະ​ວົງ ຮອງ​ນາຍົກລັດຖະມົນຕີ, ຜູ້​ຊີ້ນຳ​ວຽກ​ງານ​ເສດຖະກິດ​ມະຫາ​ພາກ ​ແລະ ການ​ບໍລິການ, ປະທານ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ ​ແລະ ພາກສ່ວນ​ທີ່​ກ່ຽວຂ້ອງ​ເຂົ້າຮ່ວມ.

     ກອງ​ປະຊຸມ​ຄັ້ງນີ້ ​ໄດ້​ຜ່ານ​ບົດ​ສະຫລຸບ​ການຈັດຕັ້ງປະຕິບັດ​ມະຕິ​ກອງ​ປະຊຸມ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ ຄັ້ງທີ II ປະຈຳ​ປີ 2014 ​ເຊິ່ງສະ​ເໜີ​ໂດຍ​ທ່ານ​ນາງ ວັດທະນາ ດາລາ​ລອຍ ຮອງ​ຜູ້​ວ່າການ​ທະນາຄານ​ແຫ່ງ ສປປ ລາວ. ຈາກ​ນັ້ນ ບັນດາ​ຄະນະ​ນຳ​ສຳນັກງານ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ ​ແລະ ຕະຫລາດ​ຫລັກ​ຊັບ​ລາວ ກໍ​ໄດ້​ສະຫລຸບ​ການ​ເຄື່ອນ​ໄຫວ​ວຽກ​ງານ ​ແລະ ລາຍ​ຮັບ-ລາຍ​ຈ່າຍ​ຂອງ​ສຳນັກງານ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ​ປະຈຳ​ປີ 2014 ​ແລະ ທິດ​ທາງ​ແຜນການ​ປີ 2015, ສະຫລຸບ​ການ​ເຄື່ອນ​ໄຫວ​ວຽກ​ງານ ​ແລະ ລາຍ​ຮັບ-ລາຍ​ຈ່າຍ​ຂອງ​ຕະຫລາດ​ຫລັກ​ຊັບ​ລາວ​ປະຈຳ​ປີ 2014 ​ແລະ ທິດ​ທາງ​ແຜນການ​ປີ 2015, ຜ່ານ​ຮ່າງ​ລະບຽບ​ຂອງ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ ​ແລະ ລາຍ​ງານ​ຄວາມ​ຄືບ​ໜ້າ​ໃນ​ການ​ກະກຽມ​ເຂົ້າ​ເປັນ​ສະມາຊິກ​ຂອງ​ອົງການ​ຄຸ້ມ​ຄອງ​ຫລັກ​ຊັບ​ສາກົນ (IOSCO). ຈາກ​ນັ້ນ ບັນດາ​ຜູ້​ແທນ​ຂອງ​ກອງ​ປະຊຸມ​ກໍ​ໄດ້​ປະກອບ​ຄຳ​ຄິດ​ເຫັນ​ໃນ​ຫລາຍ​ບັນຫາ​ທີ່​ປິ່ນ​ອ້ອມ​ວຽກ​ງານ​ຫລັກ​ຊັບ ​ແລະ ຕະຫລາດ​ຫລັກ​ຊັບ​ລາວ​ໃນ​ໄລຍະ​ຜ່ານ​ມາ ກໍ​ຄື​ບັນຫາ​ສຳຄັນ​ອື່ນໆ​ໃນ​ສະ​ເພາະ​ໜ້າ.

     ຈາກ​ນັ້ນ, ຮອງ​ນາຍົກລັດຖະມົນຕີ, ປະທານ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ ກໍ​ໄດ້​ຕີລາຄາ​ສູງ​ຕໍ່​ການ​ເຄື່ອນ​ໄຫວ​ຂອງ​ຄະນະ​ກຳມະການ​ຄຸ້ມຄອງ​ຫລັກ​ຊັບ ​ໂດຍ​ສະ​ເພາະ​ຕໍ່​ພະນັກງານ​ຂັ້ນນຳ-ຂັ້ນວິຊາ​ການ​ຂອງ​ສຳນັກງານ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ ​ແລະ ຕະຫລາດ​ຫລັກ​ຊັບ​ທີ່​ໄດ້​ສຸມ​ສະຕິ​ປັນຍາ, ກຳລັງ​ແຮງ​ໃນ​ໄລຍະ​ຜ່ານ​ມາ ສາມາດ​ເຮັດ​ສຳ​ເລັດ​ໜ້າ​ທີ່​ໄດ້​ເປັນ​ຢ່າງ​ດີ ​ແລະ ສະ​ເໜີ​ບັນດາ​ທ່ານ​ຜູ້​ແທນ​ຈົ່ງ​ໄດ້​ເອົາ​ໃຈ​ໃສ່​ຈັດຕັ້ງປະຕິບັດ​ມະຕິ​ກອງ​ປະຊຸມ​ຄັ້ງນີ້ດ້ວຍ​ຄວາມ​ຮັບຜິດຊອບ​ສູງ ​ແລະ ມີ​ລະບອບ​ແບບ​​ແຜນ ວິທີ​ການ​ເຮັດ​ວຽກ​ຢ່າງ​ຮັດກຸມ, ພ້ອມ​ທັງ​ນຳ​ຄວາມ​ຄືບ​ໜ້າ​ມາສະ​ເໜີ​ຕໍ່​ກອງ​ປະຊຸມ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ​ຄັ້ງຕໍ່​ໄປ, ມອບ​ໃຫ້​ສຳນັກງານ​ຄະນະ​ກຳມະການ​ຄຸ້ມ​ຄອງ​ຫລັກ​ຊັບ ຈັດຕັ້ງປະຕິບັດ​ແຜນການ​ເຄື່ອນ​ໄຫວ​ປະຈຳ​ປີ 2015 ​ໃຫ້​ມີ​ປະສິດທິ​ຜົນ ​ແລະ ສຳ​ເລັດ​ຕາມ​ລະດັບ​ຄາດໝາຍ​ທີ່​ໄດ້​ວາງ​ໄວ້. ພ້ອມ​ດຽວ​ກັນນັ້ນ ກໍ​ຮຽກຮ້ອງ​ມາ​ຍັງ​ກະຊວງ​ການ​ເງິນ ຈົ່ງ​ເປັນ​ເຈົ້າການ​ນຳພາ​ຄົ້ນຄວ້າ​ແຜນ​ພັດທະນາ​ຕະຫລາດ​ພັນທະບັດ​ໃຫ້​ເປັນ​ຮູບ​ປະ​ທຳ ​ເພື່ອ​ຊ່ວຍ​ລັດຖະບານ​ໃນ​ການ​ລະດົມ​ທຶນ, ພ້ອມ​ທັງ​ຮຽກຮ້ອງ​ມາ​ຍັງ​ຄະນະ​ປັບປຸງ​ທຸລະ​ກິດ​ແຫ່ງ​ຊາດ ​ເອົາ​ໃຈ​ໃສ່​ເກັບ​ກຳ​ຂໍ້​ມູນ​ບໍລິສັດ​ເປົ້າໝາຍ​ຈົດ​ທະບຽນ​ໃນ​ຕະຫລາດ​ຫລັກ​ຊັບ​ລາວ.