ທ່ານ ຈອນ ວິນລຽມສ໌ ເອກອັກຄະລັດຖະທູດແຫ່ງປະເທດອົດສະຕຣາລີປະຈຳລາວ ກ່າວວ່າ: ພາຍໃຕ້ແຜນຍຸດທະສາດການຮ່ວມມື 5 ປີ ສະບັບໃໝ່
(2016-2020),ອົດສະຕຣາລີຈະສືບຕໍ່ໃຫ້ການສະໜັບສະໜູນລັດຖະບານລາວໃນຄວາມພະຍາຍາມບັນລຸເປົ້າໜາຍສະຫະສະວັດທີ
9 (MDG9). ການສະໜັບສະໜູນດັ່ງກ່າວແມ່ນປະກອບດ້ວຍການໃຫ້ທຶນເພີ່ມຕື່ມເຂົ້າໃນການແກ້ໄຂຄວາມສ່ຽງໄພອັນຕະລາຍຈາກລະເບີດບໍ່ທັນແຕກ ທີ່ອາດຈະມີຕໍ່ຊຸມຊົນຢູ່ເຂດໂຄງການພັດທະນາຊົນນະບົດ
ແລະ ການສຶກສາ ທີ່ລັດຖະບານອົດສະຕຣາລີ ກຳລັງຈັດຕັ້ງປະຕິບັດຢູ່.ນັບຕັ້ງແຕ່ປີ
1996
ມາຮອດປະຈຸບັນລັດຖະບານອົດສະຕຣາລີ ໄດ້ໃຫ້ທຶນຊ່ວຍເຫລືອເຂົ້າໃນວຽກງານເກັບກູ້ລະເບີດບໍ່ທັນແຕກ,ໂຄສະນາສຶກສາຄວາມສ່ຽງໄພ
ອັນຕະລາຍ
ແລະ ການຊ່ວຍເຫລືອຜູ້ເຄະຮ້າຍຫລາຍກວ່າ
30 ລ້ານໂດລະອົດສະຕຣາລີ.ນອກຈາກນັ້ນ ຍັງມີ ໂຄງການພັດທະນາຊົນນະບົດທີ່ມີມູນຄ່າ 43 ລ້ານໂດລາອົດສະຕຣາລີ
(2012-2016) ເຊິ່ງຈະສືບຕໍ່ການປະສານງານແບບໄດ້ຮັບໜາກຜົນກັບອົງການເກັບກູ້ລະເບີດບໍ່ທັນແຕກແຫ່ງຊາດ
(UXO Lao) ຢູ່ແຂວງສາລະວັນ,ສະຫວັນນະເຂດ
ແລະ ຈຳປາສັກ ເພື່ອເຮັດໃຫ້ເຂດທີ່ພວມຈັດຕັ້ງປະຕິບັດໂຄງການປັບປຸງຊີວິດການເປັນຢູ່ໃນທ້ອງຖິ່ນໃຫ້ປະສະຈາກລະເບີດທີ່ຕົກຄ້າງ;ໂຄງການການສຶກສາຂັ້ນພື້ນຖານຂອງອົດສະຕຣາລີທີ່ມີມູນຄ່າ 86 ລ້ານໂດລາອົດສະຕຣາລີ (2014-2018),ລວມມີການກໍ່ສ້າງໂຮງຮຽນ ແລະ ການຟື້ນຟູ,ຈັດຫານ້ຳສະອາດ ແລະ ສຸຂະອະນາໄມ ພວມປະຕິບັດຢູ່ໃນ 66 ຕົວເມືອງທຸກຍາກທີ່ສຸດທົ່ວປະເທດ,ຍັງມີງົບປະມານສຳລັບວຽກງານສຳຫລວດຄົ້ນຫາ ແລະ ເກັບກູ້ລະເບີດບໍ່ທັນແຕກ ແລະ ວຽກງານໂຄສະນາສຶກສາຄວາມສ່ຽງໄພອັນຕະລາຍ;ໂຄງການຮ່ວມມືລາວ-ອົງການທີ່ບໍ່ສັງກັດລັດຖະບານອົດສະຕຣາລີ
(LAN GOCA) ແຕ່ປີ 2007-2014 ທີ່ສຳເລັດແລ້ວມີມູນຄ່າ 13 ລ້ານໂດລາອົດສະຕຣາລີ ເຊິ່ງໄດ້ລະບຸໃຫ້ວຽກງານເກັບກູ້ລະເບີດບໍ່ທັນແຕກອອກຈາກພື້ນທີ່ກະສິກຳເປັນວຽກບຸລິມະສິດເພື່ອສະໜັບສະໜູນໂຄງການປັບປຸງຊີວິດການເປັນຢູ່ໃນຊຸມຊົນ-ຊົນນະບົດບ່ອນທີ່ບັນດາອົງການດັ່ງກ່າວຂອງອົດສະຕຣາລີ
ໄດ້ດຳເນີນໂຄງການຢູ່.
No comments:
Post a Comment