ພິທີໄຂງານວາງສະແດງຜະລິດຕະພັນໄມ້ລາວຄັ້ງທຳອິດໄດ້ມີຂຶ້ນໃນ
ວັນທີ 5 ມັງກອນນີ້, ທີ່ສູນການຄ້າລາວ-ໄອເຕັກ, ນະຄອນຫຼວງວຽງຈັນ ໂດຍການເຂົ້າຮ່ວມ
ແລະ ຕັດແຖບຜ້າ ເປີດງານຂອງທ່ານ ສົມສະຫວາດ
ເລັ່ງສະ ຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດເສດຖະກິດການຜະລິດ
ແລະ ຈໍລະຈອນ.
ງານຄັ້ງນີ້ ມີບັນດາຫົວໜ່ວຍທຸລະກິດ ແລະ ຜູ້ປະກອບການ
ເຟີນີເຈີໄມ້ໃນທົ່ວປະເທດນຳຜະລິດຕະພັນເຂົ້າຮ່ວມວາງສະແດງ ແລະ ຈຳໜ່າຍ ຫຼາຍ
ກ່ວາ250 ຫ້ອງ, ຈາກ 40 ຫົວໜ່ວຍທຸລະກິດ ເຊິ່ງປະກອບມີ: ຜະລິດຕະພັນ ໂຕະ, ຕັ່ງ ແລະ
ຜະລິດຕະພັນໄມ້ເເກະສະລັກທີ່ມີຄວາມສວາຍງາມ. ນອກຈາກນີ້ຍັງມີກິດຈະກຳທີ່ໜ້າສົນໃຈເຊັ່ນ:
ການແກະສະລັກໄມ້ເສດເຫຼືອ ປະກອບເຄື່ອງເຟີນີເຈີ, ຈັບສະຫຼາກມອບໂຊກ ແລະ ຫຼີ້ນເກມເອົາລາງວັນອື່ນໆ.
ທ່ານ ປະທານສະມາຄົມເຟີນີເຈີລາວ ຄຳໄພ່
ສົມຊະນະ ກ່າວວ່າ: ງານວາງສະແດງຄັ້ງນີ້ຈັດຂຶ້ນເພື່ອສະເຫຼີມ ສະຫຼອງ 2 ວັນປະຫວັດສາດຄື:
ວັນສ້າງຕັ້ງພັກປະຊາຊົນປະຕິວັດລາວຄົບຮອບ 60 ປີ ແລະ ວັນສະຖາປານາ ສປປ ລາວ ຄົບຮອບ
40 ປີ ໃນປີ 2015 ນີ້ ໃຫ້ມີຂະບວນຝົດຟື້ນ, ທັງເປັນການອະນຸລັກຮັກສາປ່າໄມ້,
ການນຳໃຊ້ໄມ້ໃຫ້ເກີດປະໂຫຍດສູງສຸດ ແລະ ຍືນຍົງ ນອກຈາກນີ້ກໍເພື່ອສົ່ງເສີມການຊື້ຂາຍ, ທັງເປັນການແລກປ່ຽນບົດຮຽນ,
ປະສົບການລະ ຫວ່າງບັນດາຫົວໜ່ວຍການຜະລິດດ້ວຍກັນ ແລະ ເປີດກ້ວາງຜູ້ຊົມໃຊ້ເຂົ້າເຖິງຜູ້ຜະລິດໂດຍກົງ,
ເພື່ອເຮັດໃຫ້ຜະລິດຕະພັນເຟີນີເຈີລາວອອກມາຮັບໃຊ້ສັງຄົມ, ພ້ອມທັງເປັນການສະແດງຜົນງານທີ່ໄດ້ໃຊ້ຫົວຄິດປະດິດສ້າງອອກແບບມາໂດຍໃຊ້ຄວາມຊຳນານ,
ຄວາມປະນິດໃຫ້ຂະຫາຍໂຕໃຫ້ສາມາດເຂົ້າສູ່ຕະຫຼາດພາກພື້ນ ແລະ ສາກົນໄດ້.
ໂດຍງານວາງສະແດງຜະລິດຕະພັນມີຂຶ້ນແຕ່ວັນທີ
5-11 ມັງກອນ 2015 ເຊິ່ງສະມາຄົມເຟີນີເຈີລາວຈະມີແຜນຈັດງານຂຶ້ນໃນທຸກໆປີ.
No comments:
Post a Comment