laophatthananewspaper: ໂຍທາຍອມຮັບຜ່ານມາມີຫລາຍວຽກຍັງເຮັດບໍ່ໄດ້ດີ

ສະຫາຍ ດຣ ບຸນຈັນ ສີນທະວົງ ເລຂາຄະນະພັກ, ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ (ຍທຂ),ໄດ້ກ່າວໃນກອງປະຊຸມຄະນະພັກກະຊວງ (ຍທຂ) ໃນວັນທີ 7 ມັງກອນຜ່ານມານີ້, ໂດຍການໃຫ້ກຽດເຂົ້າຮ່ວມຂອງສະຫາຍເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ ຈູມມາລີ ໄຊຍະສອນ,ສະຫາຍ ສົມສະຫວາດ ເລັ່ງສະຫວັດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດການຜະລິດ ແລະ ຈໍລະຈອນ, ສະຫາຍ ດຣ ຄຳພັນ ພົມມະທັດກຳມະການສູນກາງພັກ, ຫົວໜ້າຫ້ອງວ່າການສູນກາງພັກ ວ່າ:ໃນໄລຍະຜ່ານ,ມີຫລາຍວຽກງານໃນຂະແໜງການຂອງຂອງຕົນຍັງເຮັດບໍ່ໄດ້ດີເທົ່າທີ່ຄວນ,ຈົນກາຍເປັນຈຸດອ່ອນຂໍ້ຄົງຄ້າງທີ່ແກ່ຍາວມາເປັນເວລາຫລາຍປີ,ໂດຍສະເພາະແມ່ນການລົງທຶນກໍ່ສ້າງເສັ້ນທາງຍັງບໍ່ທັນປະຕິບັດຕາມຂັ້ນຕອນດ້ານວິຊາການ,ວິໄນແຜນການ ເປັນຕົ້ນແມ່ນໂຄງການນອກແຜນ,ລາຄາຫົວໜ່ວຍການກໍ່ສ້າງສູງແຕ່ຄຸນນະພາບຂອງໂຄງການຕ່ຳ,ການຄຸ້ມຄອງການປຸກສ້າງໃນຕົວເມືອງບໍ່ໄປຕາມຜັງກຳນົດໄວ້,ການກວດການ້ຳໜັກລົດບັນທຸກຍັງບໍ່ສາມາດຄຸ້ມຄອງໄດ້ເຮັດໃຫ້ເສັ້ນທາງເປ່ເພກ່ອນກຳນົດ,ຂະນະດຽວກັນການແກ້ໄຂອຸປະຕິເຫດ,ການຈະລາຈອນແອອັດໃນຕົວເມືອງຍັງ

ເປັນສິ່ງທ້າທາຍສຳຄັນໃນການຊອກຫາມາດຕະການແກ້ໄຂ,ເຊິ່ງບັນຫາດັ່ງກ່າວຕົ້ນຕໍແມ່ນເກີດຈາກຄວາມຮັບຮູ້ເຂົ້າໃຈຕໍ່ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ ຂອງສະມາຊິກພັກ, ພະນັກງານຈຳນວນໜຶ່ງຍັງບໍ່ທັນເລິກເຊິ່ງ,ສະນັ້ນໃນກອງປະຊຸມສະຫລຸບສົກງົບປະມານປະຈຳປີ 2013-2014 ທີ່ຈະມີຂື້ນໃນຕົ້ນເດືອນມັງກອນ 2015 ນີ້ຈະໄດ້ພ້ອມກັນຄົ້ນຄວ້າປຶກສາຫາລືຫາວິທີການແກ້ໄຂວຽກຄ້າງຄາດັ່ງກ່າວໃຫ້ເປັນລະບົບຄົບຊຸດ.ຕໍ່ບັນຫາດັ່ງກ່າວ,ສະຫາຍເລຂາທິການໃຫຍ່,ປະທານປະເທດ ຈູມມາລີ ໄຊຍະສອນ ໄດ້ໃຫ້ກຽດໂອ້ລົມພ້ອມທັງຕີລາຄາວ່າ:ທັງໝົດນັ້ນ,ແມ່ນເກີດຈາກການນຳພາດ້ານການເມືອງ-ແນວຄິດ ຍັງບໍ່ທັນເລິກເຊິ່ງ, ມີບາງຮາກຖານພັກຍັງຖືເບົາຕໍ່ວຽກງານການເມືອງ-ແນວຄິດ ເຮັດໃຫ້ຄຸນທາດການເມືອງ, ຄຸນສົມບັດສີນທຳປະຕິວັດຂອງພະນັກງານ, ສະມາຊິກພັກຈຳນວນໜຶ່ງເຊື່ອມຖອຍ,ຄວາມຮັບພິຊອບການເມືອງບໍ່ສູງ, ຂາດຄວາມກະຕືລືລົ້ນໃນການປະຕິບັດໜ້າທີ່ວຽກງານ, ຍັງຖືເບົາຕໍ່ການຝຶກຝົນຕົນເອງ,ບໍ່ເປັນແບບຢ່າງໃນການປະຕິບັດໜ້າທີ່ວຽກງານ ແລະ ເກີດມີປະກົດການຫຍໍ້ທໍ້ຕ່າງໆ. ໂດຍສະເພາະແມ່ນການປະຕິບັດໂຄງການໃລັກສະນະຊັກຊ້າບໍ່ສຳເລັດຕາມກຳນົດ ຫລື ບາງໂຄງ ການພັດມີລັກສະນະຟ້າວຟັ່ງແລ່ນນຳເວລາເຮັດໃຫ້ບໍ່ຮັບປະກັນດ້ານມາດຕະຖານເຕັກນິກ, ເຮັດໃຫ້ນຳໃຊ້ບໍ່ໄດ້ຍາວນານເປ່ເພໄວກ່ອນກຳນົດ, ການແກ້ໄຂສະພາບການຈະລາຈອນແອອັດຍັງເຮັດບໍ່ໄດ້ດີ, ການຈັດສັນຄວາມເປັນລະບຽບຮຽບຮ້ອຍ,ຄວາມສະອາດຂອງຕົວເມືອງຍັງບໍ່ສົມຄູ່ກັບກັບການຂະຫຍາຍຕົວຂອງສັງຄົມ. ດັ່ງນັ້ນຂໍໃຫ້ຂະແໜງການ (ຍທຂ) ຮີບຮ້ອນຊອກຫາມາດຕະການແກ້ໄຂໃຫ້ມີປະສິດທິຜົນ,ໂດຍສະເພາະແມ່ນແກ້ໄຂການຈະລາຈອນແອອັດຕິດຂັດໃນຕົວເມືອງໃຫຍ່ໃຫ້ເປັນຮູບປະທຳໂດຍໄວ, ເຊິ່ງເປັນບັນຫາອັນຮີບດ່ວນໃນປັດຈຸບັນ.