ທ່ານ ໄຊສີ ສັນຕິວົງ ລັດຖະມົນຕີວ່າການກະຊວງພາຍໃນ,
ຮອງປະທານຄະນະຊີ້ນຳລະດັບຊາດ ກ່ຽວກັບການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາ
ໄດ້ແຈ້ງຂ່າວ ໃນວັນທີ 8 ມັງກອນ ຜ່ານມານີ້ວ່າ: ການປະກາດນຳໃຊ້ຫຼຽນນາມມະຍົດ
“ ວິລະຊົນແຫ່ງຊາດ” ແລະ ຫຼຽນນາມມະຍົດ “ ພັດທະນາດີເດັ່ນແຫ່ງຊາດ” ແມ່ນປະຕິບັດຕາມລັດຖະດຳລັດຂອງທ່ານ ປະທານປະເທດແຫ່ງ
ສປປ ລາວ ວ່າດ້ວຍການຮັບຮອງ ແລະ ປະກາດໃຊ້ຫຼຽນນາມມະຍົດ “ ວິລະຊົນແຮງງານແຫ່ງຊາດ”
ແລະ ຫຼຽນນາມ ມະຍົດ “ ພັດທະນາດີເດັ່ນແຫ່ງຊາດ” ເພື່ອເປັນການປຸກລະດົມທົ່ວພັກ-ທົ່ວກອງທັບ
ແລະ ປວງຊົນລາວບັນດາເຜົ່າຕະຫຼອດເຖິງນັກທຸລະກິດ, ຊາວນາ, ຊາວສວນ ແລະ ຜູ້ປະກອບການ
ທີ່ພວມດຳລົງຊີວິດ ເຮັດວຽກຢູ່ພາຍໃນ ແລະ ຕ່າງປະເທດໃຫ້ມີຄວາມຈູບຈ້າວຫ້າວຫັນ
ບຸກໜ້າບືນຕົວອອກແຮງງານແຂ່ງຂັນຕາມຄໍາຂັວນ “ ຮັກຊາດ ແລະ ພັດທະນາ” ໃຫ້ເປັນຄະບວນຟົດຟື້ນ
ແລະ ສ້າງຜົນງານດີເດັ່ນຕ່າງໆເພື່ອຄຳນັບຮັບຕ້ອນ 2 ວັນປະຫວັດສາດ
ສຳຄັນຂອງພັກ
ແລະ ຂອງຊາດ ຄື: ວັນສ້າງຕັ້ງພັກປະຊາຊົນປະຕິວັດລາວຄົບຮອບ 60 ປີ ແລະ ວັນສະຖາປານາ
ສປປ ລາວ ຄົບຮອບ 40 ປີ ທັງເປັນການເອກອ້າງຜົນສຳເລັດໃຫຍ່ຫຼວງໃນການພັດທະນາປະເທດຊາດໃນໄລຍະຜ່ານມາພ້ອມທັງແມ່ນເປັນການສະແດງໃຫ້ເຫັນເຖິງນະໂຍບາຍອັນເປັນທຳຂອງພັກ
ແລະ ລັດຖະບານເຊິ່ງເວລາໃດກໍຮັບຮູ້ ແລະ ຈົດຈຳຜົນງານ, ຄຸນງາມຄວາມດີຂອງບຸກຄົນ,
ກົມກອງລວມໝູ່ທີ່ໄດ້ອຸທິດສະຕິປັນຍາເຫື່ອແຮງປະກອບສ່ວນເຂົ້າໃນພາລະກິດປົກປັກຮັກສາ
ແລະ ສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮືອງຕະຫຼອດມາ. ດັ່ງນັ້ນ ຄະນະຂີ້ນຳລະດັບຊາດ
ກ່ຽວກັບການແຂ່ງຂັນ-ຍ້ອງຍໍ ຮັກຊາດ ແລະ ພັດທະນາໄດ້ແຈ້ງມາຍັງບັນດາກະຊວງ-ອົງການ,
ນະຄອນ ຫຼວງ ແລະ ແຂວງ ໃນທົ່ວປະເທດຮັບຊາບ ແລະ ນຳໃຊ້ຫຼຽນນາມມະຍົດດັ່ງກ່າວເພື່ອຈັດຕັ້ງການຍ້ອງຍໍສັນລະເສີນໃຫ້ແກ່ບຸກຄົນ
ແລະ ກົມກອງລວມໝູ່ທັງພາຍໃນ ແລະ ຕ່າງປະເທດໃຫ້ຖືກຕ້ອງ. 
No comments:
Post a Comment